Александр Додохов курдук тустууктар тахса турдуннар

Ньурбаҕа, көҥүл тустууга ССРС, хапсаҕайга Саха АССР спортарын маастара Александр Иванович Додохов сырдык кэриэһигэр оҕолорго күрэхтэһии буолан ааста.  

Күрэхтэһии саҥа ааттары таһаарар, успуорт үрдүк чыпчаалыгар ыҥырар, үүнэр көлүөнэҕэ сөптөөх суолу ыйан биэрэр, чөл-чэгиэн олоххо угуйар сыаллаах-соруктаах, көҥүл тустуу көбүөрэ үтүө үгэскэ олоҕуран төрдүс төгүлүн ыытылынна. Күрэхтэһиигэ биир дойдулаахпыт көҥүл тустууга Арассыыйа успуордун маастара, хапсаҕай тустуу маастара, 2022 сылга Тыва Өрөспүүбүлүкэтигэр Кызыл куоракка ыытыллыбыт Арассыыйа чемпионатын боруонса призера Айхаан  Антонов ыалдьыттаан түһүлгэ таһымын  үрдэттэ .

Көҥүл тустуу муҥура биллибэт киэҥ далай, соччонон уустук уонна саҥаттан саҥа таһымҥа тахсар буолан спортсменнары, тренердэри, тустууну таптааччылары абылыыр сүдү күүстээх. Бу тэрээһини “Чаппанда нэһилиэгэ” Муниципальнай тэриллии дьаһалтата уонна Ньурбатааҕы оҕо успуорка оскуолата тэрийэн ыытта. Күөх Ньурба көҥүл тустууга көбүөрүттэн Александр Додохов курдук тустууктар тахса турдуннар.

Ньурбатааҕы оҕо успуордун оскуолатын сонуннара.

Сайыына Саввинова хаартыскаҕа түһэриилэрэ.