Ярыгин-2023: Почтовай маркаҕа Виктор Рассадин

Красноярскайга ыытылла турар спортивнай тустууга «Иван Ярыгин кубога» норуоттар икки ардыларынааҕы күрэхтэһии кэмигэр, бу улахан тэрээһиҥҥэ анаан почтовай карточканы сүрэхтээһин сиэрэ-туома буолла.

Кэрэхсэбиллээҕэ баар, почтовай марка – бу баай историялаах улахан таһымнаах түһүлгэ элбэх араас эгэлгэ түгэннэриттэн талыллан, биһиги бөҕөспүт Виктор Рассадин (хаҥаһа) туста сылдьар хаартыскатынан оҥоьуллубут.

Хаартыскаҕа, былырыын Красноярскайдааҕы тустуу 70 киилэҕэ бүтэһик быһаарыылаах хапсыһыыта көрдөрүллэр. Онно Виктор Рассадин кабардинец Анзор Закуевы эрэллээхтик кыайан, бэйэтин ыйааһыныгар бастакы миэстэни ылбыта.

Санатан эттэххэ, былырыын Саха сирин хамаандата биир кыһыл көмүс мэтээллээх (Виктор Рассадин) эбит буоллаҕына, быйыл биир дойдулаахтарбыт үс мэтээллэннилэр (Александра Карамзина, Севиль Назарова, Константин Капрынов).

Петр ПАВЛОВ.