Сонуннар

Ярыгин-2023: Анал бириистэргэ кимнээх тигистилэр?

Красноярскайга, спортивнай тустууга «Иван Ярыгин кубога» күрэхтэһии ыытыллан түмүктэннэ. Бары ыйааһыннарга кыайыылаахтар быһаарылыннылар. Кинилэргэ анал кубоктар, дипломнар, харчынан бириистэр туттарылыннылар. Кыайыылаахтар тренердэрэ эмиэ харчынан бириэмийэлэннилэр.

Ону тэҥэ олохсуйбут үгэс быһыытынан красноярскайдар өрүү сыаналаах бириистэри аныыллар. Манна даҕатан эттэххэ, күрэхтэһии кэмигэр көбүөр кытыытыгар ымсыырдыбыттыы, түөрт сабыс-саҥа массыына – лаампа уотугар кылабачыйан турбутугар, бу арааһа бириис быһыылаах диэбиппит да, онтукайбыт күрэхтэһии спонсорын рекламата эбит. Массыынаны кимиэхэ да биэрбэтилэр.

Ол оннугар, күрэхтэһиини үөрүүлээхтик түмүктээһиҥҥэ бастаан сүрүн сыанаҕа 79 киилэҕэ үһүстээбит Азрет Улумбашевы ыҥыран таһааран кэмбиэр туттардылар. Сэрэйдэххэ харчы буолуохтаах. Онтон Красноярскай куорат баһылыгын 250 тыһ. солк. сертификатын 97 кг ыйааһыҥҥа үһүс буолбут Игорь Овсянниковка, «Бастыҥ техникатын иһин» диэн бирииһи ыарахан ыйааһыҥҥа эмиэ үһүстээбит Эрик Джиоевка уонна Красноярскай кыраай губернаторын 300 тыһ. солк. сертификатын – дьахталларга 68 кг бастаабыт Ханум Велиеваҕа туттардылар.

Көрбүккүт курдук, анал бириистэр барыта красноярскайдарга ананна.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

199057
Бүгүн : 348