Тарскай-2023: Чемпионакка бэлэмнэнии үгэннээн ыытыллар

Саха сиригэр физкультурнай хамсааһын тэриллибитэ 100 сылын бастакынан тустууктар саҕалыыллар. Ол курдук, тохсунньу 6-7 күннэригэр Чурапчыга, Н.Н. Тарскай кэриэһигэр көҥүл тустууга республикаҕа биирдиилээн уонна хамаанданан бастыыр иһин чемпионат ыытыллар.

Чемпионаты бэлэмнээн уонна тэрийэн ыытыы туһунан Чурапчы улууһун спорка управлениетын начальнига Дьулустан Васильевич Егоровтан билиһиннэрэригэр көрдөстүбүт. Кини бу иннинэ спортуправлениетын начальнигын солбуйааччынан, Оҕо спортивнай оскуолатын дириэктэринэн үлэлии сылдьыбыта.

-Чемпионакка бэлэмнэнии билигин бары хайысханан үгэннээн бара турар. Улуус хамаандатын састааба сбордана сылдьар. Тустуу буолуохтаах А.Федотов аатынан саала – 600 олорор миэстэлээх. Сааланы бэлэмнээһин Саҥа дьыл инниттэн ыытыллар. Тустуу икки көбүөрүнэн барыаҕа. Чурапчы агроколледжа анал помост оҥорбута, онон көбүөрдэр помост үрдүгэр буолуохтара.

Быһа холуйан, 130-ча кыттааччы, ону таһынан 40 тренер-представитель кэлиэхтээх диэн ааҕына сылдьабыт. Хамаандалары Чурапчытааҕы физическэй культура уонна спорт институтун уопсайыгар олохтуохпут.

Кылаабынай судьуйанан – норуоттар икки ардыларынааҕы категориялаах судьуйа Николай Дмитриевич Николаев үлэлиэҕэ. Чемпионаты «Саха» национальнай иһитиннэрэр-көрдөрөр хампаанньа телевизорга быһа көрдөрүөҕэ. Киирии төлөбүрдээх, бастакы күҥҥэ – 250, иккискэ – 300 солк.

Спорт туонатынан биллибит Чурапчы, саҥа үүммүт 2023 сыл бастакы улахан таһымнаах күрэхтэһиитин үрдүк таһымнаахтык тэрийэн ыытарыгар эрэнэбит!

Петр ПАВЛОВ.