Тарскай-2023: Былырыын хайдах этэй?

Н.Н. Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин чемпионата былырыын тохсунньу 8-9 күннэригэр Аллараа Бэстээххэ (Мэҥэ Хаҥалас), саҥа үлэҕэ киллэриллибит “Парус” спортивнай комплекска ыытыллыбыта.

Чемпионакка республика 29 хамаандатыттан барыта 293 бөҕөс күөн көрсүбүтэ.

Икки күннээх күрэхтэһии түмүгүнэн бэйэлэрин ыйааһыннарыгар чемпионнаабыттара: 57 кг – Лев Павлов (Сунтаар), 61 кг – Петр Константинов (ХИФУ), 65 кг – Эдуард Григорьев (Чурапчы), 70 кг – Айсен Потапов (Дьааҥы), 74 кг – Виктор Рассадин (Орто Халыма), 79 кг – Константин Власов (Мэҥэ Хаҥалас), 86 кг – Герман Устинов (Ньурба), 92 кг – Иннокентий Иннокентьев (Үөһээ Бүлүү), 97 кг – Ньургун Сергин (Мирнэй), 125 кг – Никита Хабаров (ХИФУ).

Оттон хамаанданан кыайыыны көбүөр хаһаайыттара – мэҥэ хаҥаластар (хамаанда салайааччыта А.Г. Птицын) ситиспиттэрэ. Иккис миэстэни Чурапчы хамаандата (салайааччылар К.Н. Захаров, Д.Р. Неустроев) ылбыта. Үһүс бириистээх миэстэҕэ Сунтаар хамаандата (салайааччы С.А. Павлов) тахсыбыта.

Буолан ааспыт чемпионат биир сүрүн соругунан, ити сыл сайыныгар Бороҕоҥҥо (Уус Алдан) ыытыллар Саха сирин норуоттарын VIII спортивнай оонньууларыгар кыттааччылары сүүмэрдээһин буолбута. Онон, инники сыаллаах буолан, хамаандалар эрдэттэн ох курдук оҥостон кэлбиттэрэ, састаап күүстээх этэ. Оттон быйыл дьэ хайдах буолар? Ханнык хамаанда бастыай?

Былырыыҥҥы кыайыылаахтар – мэҥэлэр быйыл да састааптара күүстээх: Петр Копылов, Айсиэн Винокуров, Уйгулан Иванов, Владислав Кривошапкин, Станислав Свинобоев, Константин Власов, Софрон Софронов уо.д.а. бааллар.

Санатан эттэххэ, ковид дьаҥынан сибээстээн 2020, 2021 сылларга республика көҥүл тустууга чемпионаттара ыытыллыбатахтара.

“Дьулурҕан”.