Тарскай-2023: Анал бириистэр кимнээххэ туттарылыннылар?

Н.Н. Тарскай кэриэһигэр Саха Республикатын уолаттарга көҥүл тустууга күрэхтэһиитин түмүгүн туһунан сырдатыыны салгыыбыт. Ханнык баҕарар күрэхтэһии таһыма тэрээһинтэн тутулуктаах. Бу күрэхтэһии элбэх бириистээх, наҕараадалаах буолбутугар бастатан туран, уолаттарга республика сүүмэрдэммит хамаандатын кылаабынай тренерэ, СР уонна РФ үтүөлээх тренерэ Степан Петрович Сивцевкэ махтаныахтаахпыт.

Кини сүүрэн-көтөн, кэпсэтэн, тустууктары тэҥэ, тренердэр, судьуйалар үлэлэрэ сөптөөхтүк сыаналанна. Күрэхтэһии хаамыытын сиһилии биллэрэн, кэпсээн ыыппыт тренер, спорт маастара Егор Яковлев (Чурапчы) эмиэ өйдөбүнньүк бэлэҕинэн бэлиэтэннэ. Кини маннык күрэхтэһиигэ былырыын эмиэ судьуйа-комментаторынан үлэлээбитэ.

Тэрийээччилэр туруорсууларынан бу күрэхтэһиигэ “Бастыҥ бөҕөс”, “Кыайыыга дьулуурун иһин” уонна “Кыраһыабай хапсыһыы иһин” диэн анал бириистэр олохтоммуттара. Онуоха «Бастыҥ бөҕөскө» диэн анал бирииһи Н.Н. Тарскай биир дойдулаахтара, Уус Алдан улууһун дьаһалтата (баһылык А.В. Федотов) туруорбута – 55 киилэҕэ бастаабыт Максим Григорьевка (Уус Алдан), «Кыайыыга дьулуурун иһин» диэн “Өрөгөй” Спорка бэлэмнэнии киинэ (дириэктэр М.Д. Пахомов) олохтообут бирииһэ – 51 кг кыайыылааҕа Сэмэн Сивцевкэ (Уус Алдан), оттон “Кыайыыга дьулуурун иһин” диэн Р.М. Дмитриев аатынан Олимпийскай эрэллэри бэлэмниир училище (дириэктэр С.С. Чердонов) бирииһэ – 48 киилэҕэ быһаарыылаах хапсыһыы кыттыылаахтарыгар Роман Кириллиҥҥэ (Сунтаар) уонна Михаил Осиповка (Ньурба) туттарылынна.

Маны таһынан Н.Н. Тарскай төрөөбүт дойдутун, Уус Алдан Баатаҕайын нэһилиэгин (баһылык М.М. Белолюбскай) анал бирииһэ 65 кг иккис буолбут Сергей Петуховка (Уус Алдан) ананна.

Үчүгэй бириистэрдээх, элбэх наҕараадалардаах күрэхтэһиини илэ харахтарынан көрө сылдьан Саха Республикатын физическэй культураҕа уонна спорка министрэ Леонид Спиридонов уонна Томпо улууһун тренерэ Александр Мосорин бэйэлэрин ааттарынан бириис туруоран, түһүлгэни киэргэттилэр. Ол курдук, кинилэр харчынан бириэмийэлэрин хаһаайыттарынан туһааннааҕынан – 60 киилэҕэ тэҥнээҕин булбатах, утарсааччыларыгар биир да баалы биэрбэтэх Константин Слепцов (Мэҥэ Хаҥалас) уонна 92 кг бастаабыт Владимир Басов (Чурапчы) буоллулар.

Маны тэҥэ, үчүгэй үлэлээх судьуйалар – Республикатааҕы оҕо спордун холбоһуктаах оскуолата (дириэктэр эбээһинэһин толорооччу М.И. Варламов) олохтообут бириистэринэн наҕараадаланнылар. Ол курдук, күрэхтэһии бастыҥ судьуйатынан Петр Соловьев (Уус Алдан) буолла.

Петр ПАВЛОВ.

Ааптар хаартыскаҕа түһэриилэрэ.