Киевтээҕи турнирга сахалартан бастакы чемпион

Чурапчыга, Н.Н. Тарскай кэриэһигэр көҥүл тустууга Саха Республикатын биирдиилээн уонна хамаанданан бастыыр иһин чемпионатыгар тиийэ сылдьан соһуччу кэриэтэ уруккута биллиилээх тустуук Иван Кими көрсөн, хайдах эрэ, өр сүтэрсэн баран булсубут дьон курдук, истиҥник кэпсэттибит.

Биир кэмҥэ Иван Ким – оччолорго бастакы ыйааһыҥҥа (55 кг) Саха сирин тарбахха баттанар күүстээх тустуугунан биллэ сылдьыбыта.

Үөрүүлээҕэ баар, кини билигин таптыыр тустуутугар оҕолору дьарыктыыр эбит. Буолан баран, тустуу биһигэ буолбут Чурапчыга. Итини истэн мин сүрдээҕин астынным. Бэйэлэрин кэмнэригэр улаханнык туста сылдьыбыт дьон маастарыстыбаларын, билиилэрин-көрүүлэрин оҕолорго иҥэрэ, үөрэтэ-такайа сылдьаллара хайҕаллаах.

-2020 сылтан манна, А.И. Федотов аатынан спортивнай саалаҕа кыра оҕолору тустууга дьарыктыыбын, – диир Иван. – Барыта отучча оҕо сылдьар. Тыыппалаахтар бааллар, сотору бэйэлэрин биллэриэхтэрэ, ааттатыахтара.

Иван Ким – Сунтаар Элгээйититтэн төрүттээх, 1984 сыллаах. Сэттэ оҕолоох улахан ыал – алтыс оҕото. Көҥүл тустуунан маҥнайгы кылаастан дьарыктаммыт. Тустууга уһуйбут бастакы киһитинэн Тимофей Иванович Тимофеев буолар. Онтон кэлин, киин куоракка кэлэн Россия уонна Саха сирин үтүөлээх тренердэрэ Иван Николаевич уонна Степан Петрович Сивцевтэр салалталарынан эрчиллибит. Бастакы улахан ситиһиитэ, 1997 сыллаахха Ярославль куоракка Россия оҕолорго чемпиона.

Ваня 2002 сыллаахха Хабаровскайга ыытыллыбыт Дальнай Восток зонатын чемпионатыгар 55 киилэҕэ бастакы миэстэни ылан, көҥүл тустууга Россия спордун маастарын нуорматын толорбута.

Күннээн туста сылдьар кэмигэр Украинаҕа, Польшаҕа, Белоруссияҕа, Азербайджаҥҥа, Болгарияҕа, Турцияҕа ыытыллыбыт улахан таһымнаах түһүлгэлэргэ күүһүн холоммута. Өссө, 2004 сыллаахха Киевкэ, Украина албан ааттаах тустуууктарын уонна тренердэрин бириистэригэр норуоттар икки ардыларынааҕы турнирга уонна эмиэ ити сыл Польшаҕа буолбут улахан түһүлгэҕэ тэҥнээҕин булбатаҕа, кыайыы үөрүүтүн билбитэ. Манна даҕатан эттэххэ, Иван Ким – ити Киевтээҕи турнирга сахалартан бастакы уонна билиҥҥи кэмҥэ соҕотох чемпион.

Ити улахан турнирдарга уонна Россия чемпионаттарыгар Мавлет Батыров, Адам Батыров, Сэм Хенсон (АХШ), Юрий Голубь (Украина), Базар Базаргуруев, бырааттыы Герман уонна Александр Контоевтар курдук, уо.д.а. аатырбыт тустууктары кытта иэмэх мастыы эрийсибитэ.

Тустууну тэҥэ, хапсаҕайга эмиэ үчүгэй көрдөрүүлээх. Ол курдук, И.А. Халдеев, М.И. Эверстов ааттарынан күрэхтэһиилэргэ бастаабыта, бырааттыы Ноговицыннар түһүлгэлэригэр миэстэлэспитэ.

Үөрэҕин туһунан эттэххэ, Р.М. Дмитриев аатынан Олимпийскай эрэл училищетын уонна Тыа хаһаайыстыбатын государственнай академиятын ситиһиилээхтик үөрэнэн бүтэрбитэ.

Иван Ким икки оҕолоох ыал амарах аҕата. Киниэхэ тус олоҕор, дьиэ кэргэнигэр уонна үлэтигэр ситиһиилэри баҕарабыт. Сотору кэминэн иитиллээччилэрэ кыайыыны-хотууну ситиһэн, тренердэрин аатын дорҕоонноохтук ааттаталларыгар!

Дьэ, ити курдук, кини спорка олоҕун токоолоһон, ыйытыы күүһүнэн кылгастык сырдаттым. Иван бэрт сэмэй киһи. Ыһа-тоҕо кэпсии-ипсии, өрүкүйэ сылдьыбат, аҕыйах саҥалаах. Ол эрэн, ылсыбыт дьыалатыгар бэриниилээх. Биллэр тустуук, аны тренер быһыытынан биллэригэр баҕарабын.

Петр Павлов.   

 

Добавить комментарий

Ваш адрес email не будет опубликован. Обязательные поля помечены *

030935
Бүгүн : 117