Иван Ярыгин-2023: Массыыналар бириискэ дуо?

Красноярскайга «Иван Ярыгин кубога» үгэннээн ыытылла турар. Күрэхтэһии буолар сирэ – саала сиэдэрэйдик киэргэтиллибит. Хапсыһыылар үс көбүөрүнэн ыытыллаллар. Күрэхтэһии саҕаланыаҕыттан «С» көбүөр таһыгар сабыс саҥа түөрт массыына кылабачыйан турар.

Урукку сылларга Ярыгин аатынан турнирга – кыайыылаахтарга массыына бириис олохтуу сылдьыбыттара. Ону санаан, бу эмиэ бастыҥ спортсменнарга бириис быһыытынан көрдөрүүгэ турар дии санаабытым. Ол туһунан сэмээр информация көрдүү сатаатым даҕаны, ким да тугу да эппэт да, кэпсээбэт даҕаны.

Күрэхтэһии иккис күнүгэр туох баар хорсуммун киллэрэн, массыыналар турар сүрүн түһүлгэлэригэр киирэн, дьонтон ыйыппытым, бу бириис буолбатах эбит – реклама дииллэр. Дьиҥэ бириис да эбитэ буоллар, куһаҕана суох буолуо этэ дии саныыбын.

Хас сыл ахсын красноярскайдар бу турнир бастыҥнарыгар улахан бириистэри олохтууллар. Ол эрээри, тоҕо эрэ ол бириистэрин наар бэйэлэрин эрэ дьонноругар биэрэллэр. Быйыл да оннук буолара буолуо. Көрүөхпүт. Биллэриэхпит.

Онон түмүктээн эттэххэ, массыыналар бириис буолбатахтар эбит.

Петр ПАВЛОВ.