Владимир Егоров: “2022 сыл үтүө түмүктээх буолла”

Көҥүл тустууга Европа чемпиона Владимир Егоров Саха сирин чулуу спортсменынан буолбутун тэҥэ, “Дьулурҕан” хаһыат быһаарыытынан – 2022 сыл түмүгүнэн республика бастыҥ спортсменынан ааттанна.

Владимиры бу үрдүк сыанабылынан эҕэрдэлээн туран, аҕыйах ыйытыыга хоруйдууругар көрдөстүбүт.

–Владимир, дьэ хайдах сыл ааста дии саныыгын?

-2022 сыл биһиги дьиэ кэргэҥҥэ элбэх үтүө түгэннэри бэлэхтээтэ. Бастатан туран, дьиэ кэргэммэр саҥа киһи эбиллибитэ. Кыыс оҕо. Онон кэргэммэр улаханнык махтанабын! Иккиһинэн, көҥүл тустууга Европа чемпионатын кыһыл көмүс мэтээлин аҕаллыбыт. Онон үчүгэй сыл ааһан эрэр. Уонна оттон бу… (сыл чулуу спортсмена буолбутун туоһулуур наҕараадаларын көрдөрөр – П.П.).

-Ханнык баҕарар спортсмеҥҥа, кини тренерэ – саамай чугас киһитэ. Тренердэрин туһунан тугу этиэххин сөбүй?

-Бастатан туран, Александр Анатольевич Софроновка махтанабын! Кинилиин күн аайы сибээстэһэ сылдьабыт. Кэпсэтэбит. Куруук миигин өйүүр. Спортсмен усулуобуйатын боппуруоһун барытын быһаарсар. Ити курдук, тренер Артур Константинович Константиновы кытта бииргэ үлэлэһэбит. Кини миэхэ техника өртүгэр үлэлиирбэр көмөлөһөр. Албастары чочуйабыт, сыыһаларбытын-алҕастарбытын көннөрүнэргэ дьулуһабыт. Онон тренердэрбэр махталым улахан.

-Арба да, аҕыйах хонуктааҕыта 2022 сыл түмүгүнэн Хотугу Македония бастыҥ бөҕөһө буолбуккунан эҕэрдэ!

-Махтал! Бастыҥ спортсмен буоллун диэн биллэрбиттэрэ. Лауреаттары чиэстээһин ахсынньы 27 күнүгэр Скопьеҕа буолар. Онно ыҥырдылар, барарга былааннанабын.

–Владимир, инники былааннаргын кыратык сэгэтэн биэриэҥ дуо?

-Бу Саҥа дьыл кэмигэр Германияҕа, спортивнай тустууга кулууптар икки ардыларынааҕы бундеслига күрэхтэһиитигэр кыттабын. Биһиги хамаандабыт финал 8/1-гэр таҕыста. Онно тустабын. Итинтэн салгыы, Европа чемпионатын иннинэ – Болгарияҕа Дан Колов, Турцияҕа Яшар Догу турнирдара ыытыллаллар. Итилэргэ кыттарга суоттанабын. Дьэ, ол кэнниттэн үчүгэйдик бэлэмнэнэн баран, Европа чемпионатыгар барабын.

-Владимир, дьэ, кырдьык даҕаны, спортсмен олоҕо олох уоскулаҥа суох эбит. Эйигин өссө төгүл эҕэрдэлиибин! Ханна да сырыттаргын, саха спордун аатын өрүү үрдүктүк тута сылдьаргар бараҕабын.

Петр ПАВЛОВ. 23.12.2022