Уһуйааччы уонна устудьуон: Олимпийскай эрэл училищетыгар «Икки сулус» куонкурус

Саха АССР төрүттэммитэ 100 сылыгар, Саха Өрөспүүбүлүкэтигэр Ийэ сылыгар аналлаах «Икки сулус» ырыа күрэҕэ Р.М. Дмитриев аатынан Олимпийскай эрэл училищетыгар үһүс төгүлүн буолан ааста. Тэрээһини тыл биридимиэттэрин бөлөҕө иилээн-саҕалаан ыытта.

Күрэстэһиини дьүүллүүр сүбэ сыаналаата. Бэрэссэдээтэлинэн ССРС уонна Саха Өрөспүүбүлүкэтин култууратын туйгуна, «Гражданскай килбиэн» бэлиэ хаһаайката Иванова Ефросинья Михайловна үлэлээтэ. Жюри састаабыгар Арассыыйа Үөрэҕириитин туйгуна, СӨ култууратын үтүөлээх үлэһитэ, СӨ култууратын туйгуна, «Гражданскай килбиэн» бэлиэ хаһаайына Иванов Валерий Герасимович, профком бэрэссэдээтэлэ Алексеева Ньургуйаана Николаевна, методист Никифорова Светлана Михайловна киирдилэр.

Куонкуруска элбэх оҕо уонна үлэһит кыттыбыта олус сэргэх буолла, уһуйааччы да, устудьуон да талааннара көһүннэ. 12 күөн күрэстэһээччи бииртэн биир чаҕылхай нүөмэрдэрин көрөөччүлэр олус астыннылар.

Күрэх түмүгүнэн III степеннээх дипломунан Кобяков Максим, Егоров Егор Тимофеевич, II степенннээх дипломунан Веревкин Ян, Неустроев Валериан Иннокентьевич, I степеннээх дипломунан Абрамов Сахаян, Матвеев Матвей Матвеевич наҕараадаланнылар.

Муҥутуур кыайыылаах үрдүк ааты ылары ситистилэр, көрөөччү биһирэбилин ыллылар: Лилиана Рожина, Павлова Валентина Валентиновна дуэттара. Куонкурус сонун арыйыытынан Баишев Айсен, Протодьяконов Петр Юрьевич ааттаннылар.

Тэрээһиҥҥэ училищебыт выпускниктара Заболоцкай А.И, Матвеев М.М, Сивцев К.А, Алексеев Е.П. көхтөөх кыттыыны ыллылар, анал бириис туруордулар.

Ону тэҥэ бастакы «Икки сулус» күрэхпит кыайыылааҕа, Т.Г. Десяткин аатынан Дьокуускайдааҕы Промышленнай техникум преподавателэ Андрей Захаров кэлэн ыалдьыттаата.

Эстрада ырыаһыттара Юрислав Гольдеров уонна Николай Новгородов-Сиэрдээх Сэһэн бэйэлэрин ырыаларынан тэрээһини киэргэттилэр.

«Икки сулус» быйылгы күрэҕин туһунан бэртээхэй өйдөбүл хаалла. Кэлэр сылга саҥа сулустар умайалларын эрэнэ кэтэһэбит.

Алла СИВЦЕВА, библиотекарь,

Людмила ГАВРИЛЬЕВА, саха тылын уонна литературатын учуутала.

Алла СИВЦЕВА хаартыскаҕа түһэриитэ.