Лев Павлов – түһүлгэ чулуу бөҕөһө

Балаҕан ыйын 10-11 күннэригэр “Триумф” Спорка бэлэмнэнии киинигэр – олимпийскай чемпион, ССРС спордун үтүөлээх маастара уонна үтүөлээх тренерэ Роман Михайлович Дмитриев кэриэһигэр көҥүл тустууга эдэрдэргэ Бүтүн Россиятааҕы аһаҕас түһүлгэ ыытыллан түмүктэннэ.

Бу сырыыга, Роман Дмитриев 1972 сыллааҕы Олимпийскай оонньууларга кыайыытын үйэ аҥардаах үбүлүөйүгэр ананан ыытыллыбыт күрэхтэһиигэ – Армения, Беларусь, Монголия, Молдова курдук тас дойдулартан уонна Россия уонча регионуттан барыта 168 эдэр бөҕөс көбүөргэ тахсан күөн көрүстэ. Кинилэр уон ыйааһыҥҥа ким күүстээҕин, үчүгэй бэлэмнээҕин быһаарыстылар.

Түһүлгэ бочуоттаах ыалдьыттарынан Роман Михайлович кэргэнэ Антонина Софроновна Дмитриева уонна оҕолоро, Россия көҥүл тустууга эдэрдэргэ сүүмэрдэммит хамаандатын тренердэрэ: сүрүн тренер Абдусалам Гадисов, тренердэр Вадим Лалиев уонна Шамиль Кудиямагомедов буоллулар.

Икки кун устата икки көбүөрүнэн ыытыллыбыт тустуу түмүгэр Саха сирин хамаандата барыта 8 мэтээли: 1 кыһыл көмүс, 2 үрүҥ көмүс уонна 5 боруонса мэтээли ылары ситистэ. Манна сыһыары тутан эттэххэ, хамаанда биир баар-суох бастыҥ бөҕөһө – Россия эдэрдэргэ күрэхтэһиитин икки төгүллээх кыайыылааҕа, аан дойду түһүлгэтин призера Станислав Свинобоев эчэйиилээх буолан кыттыбата.

Олохтоохтортон Россия эдэрдэргэ күрэхтэһиитин призера, Н.Н. Тарскай аатынан Саха сирин улахан дьоҥҥо чемпионатын кыайыылааҕа Лев Павлов ордук үчүгэй көрдөрүүлэннэ. Кини биир дойдулаахтара П.Адамовы 11:0, А.Козловы 8:0, А.Репины 10:0, финалга тахсар иһин киирсиигэ бурят Ж.Баяндуевы 4:0 уонна быһаарыылаах хапсыһыыга Россия чемпиона, осетин Артём Гобаевы 2:1 ахсааннарынан кыайан, бастакы миэстэни эрэллээхтик ылла. Манан, быйыл саас Россия эдэрдэргэ күрэхтэһиитигэр быһаарыылаах киирсиигэ Гобаевка хотторуутун боруостаата. Лев Павлов – тренердэр Н.Р. Данилов, С.А. Павлов салалталарынан дьарыктанар.

Тэрийээччилэр быһаарыыларынан ыйааһын аайы бастаабыттар – 50-нии, иккистээбиттэр – 30-туу, үһүстээбиттэр – 15-тии, кыайыылаахтары бэлэмнээбит тренердэр 20-лии тыһ. солк. харчыга туоһу суруктары туттулар.

Күрэхтэһии түмүгүнэн Лев Павлов – “Түһүлгэ бастыҥ бөҕөһүнэн” ааттанна уонна Роман Михайлович дьиэ кэргэнин анал бирииһинэн наҕараадаланна. Манна даҕатан эттэххэ, 65 кг кыайыылааҕа Магомед Байтукаев – “Бастыҥ техникатын иһин”, 65 киилэҕэ иккистээбит Иван Потапов – “Кыайыыга дьулуурун иһин”, турнир призердара Валентин Бурнашев уонна Олег Фомин – “Көрөөччүлэр биһирэбиллэрин иһин” диэн, спонсордар олохтообут анал бириистэринэн наҕараадаланнылар.

Наҕараадалааһын кэнниттэн тута кыайыылааҕы суруналыыстар эҕэрдэлии көрүстүлэр.

–Кыайбыппыттан үөрэбин. Гобаевтыын сирэй көрсүүбүт ахсаана 1:1 буолла. Түһүлгэҕэ хас биирдии хапсыһыы барыта ыарахан. Мин эрдэттэн хайаан да бастыырдыы оҥостон туһуннум. Аны Россия эдэрдэргэ күһүҥҥү күрэхтэһиитигэр кыттыам. Быйылгы сыл тус бэйэбэр син ситиһиилээхтик ааһан эрэр. Биир дойдулаахтарбын салгыы үөрдэргэ сананабын. Сүрүн сыалым – эһиил Россия күрэхтэһиитигэр ситиһиилээхтик кыттыы”, – диэн Лев Павлов бэрт симиктик, сэмэйдик хоруйдаата.

Үбүлүөйдээх тэрээһин аҥардас тустуунан эрэ муҥурдаммата. Бочуоттаах ыалдьыттар кыттыылаах, Роман Дмитриев пааматынньыгар сүгүрүйүү сиэрэ-туома ыытылынна. Көбүөр биллиилээх маастардара эдэр бөҕөстөргө аһаҕас эрчиллиини тэрийдилэр. Роман Михайлович туһунан ахтыы киэһэтэ буолла. Сахаттан бастакы олимпийскай чемпион эһиил – 2023 сылга төрөөбүтэ 75 сылын дьоһуннук бэлиэтииргэ республикатааҕы анал хамыыһыйа тэриллэн, туох-ханнык үлэлэр ыытыллаллара быһаарылынна.

Петр ПАВЛОВ.

Ааптар хаартыскаҕа түһэриитэ.