Быыстапкаҕа туруоруллубут хас биирдии экспонат сүрдээх күндү

«Строительнай» атыы-эргиэн киинин быыстапкалыыр саалатыгар «Коркинныы олоруохха. Коркинныы айыахха!» диэн быыстапка үгэннээн үлэлиир.

Стручкова Марианна Васильевна, Е.Ярославскай аатынан кыраайы үөрэтэр музей быыстапка салаатыгар сэбиэдиссэйэ:

-Быйыл төрдүс төгүлүн бу быыстапкаҕа кытта сылдьабыт. Сүрдээх үчүгэй бырайыагы Татьяна Афанасьевна Гоголева толкуйдаан, иилээн-саҕалаан, биһигини, интэриэстээх дьону дьаһайан, туһааннаах тэрилтэлэри бэйэтигэр тардан, дьон-сэргэ биһирээн, кэлэн үлэлэһэ сылдьабыт. Былырыыҥҥы маннык быыстапкаҕа биһиги Дмитрий Петрович Булуҥҥа үөрэнэ сылдьан олорбут паартатын көрдөрүүгэ туруорбуппут. Паартаны биһиги үлэһиппит Михаил Егорович Друзьянов булан, Спорт министиэристибэтин уонна биллиилээх дьон көмөлөрүнэн тиэйэн-көтөҕөн аҕалбыттара. Итиэннэ биһиги республикатааҕы музейбыт фондатыгар үөрэ-көтө туттарбыта. Онтон быйыл биһиги музейбыт бу быыстапкаҕа автономия 100 сылынан уонна Ийэ сылынан итиэннэ саамай сүрүнэ, Роман Дмитриев олимпийскай чемпион буолбута 50 сылыгар анаан, онно сыһыаннаах экспонаттары аҕаллыбыт.

Дмитрий Петрович Коркин тус маллара биһиги музейбытыгар аҕыйаҕа суох диэххэ сөп. Кэргэнэ Александра Семеновна 1985 с. наҕараадаларын туттарбыта. Онтон кэнники 2014-2015 сс. эбии киирбиттэрэ. Докумуоннар, кэтэ сылдьыбыт таҥаһа, тутта сылдьыбыт тэриллэрэ…

Оттон Роман Михайлович туһунан туспа этэр буоллахха, музейбытыгар «Великий Боотур покоривший Олимп» диэн быыстапка тура сылдьыбыта. Онно хас эмэ сылы быһа таптайыллан, сүүсчэкэ предмет киирбитэ. Холобур, Роман Михайлович олимпийскай кыһыл көмүс уонна үрүҥ көмүс мэтээллэрэ, атын да улахан таһымнаах күрэхтэһиилэргэ ситиһиилээхтик кыттан ылбыт мэтээллэрэ коллекция быһыытынан киирбитэ. Итини кини дьиэ кэргэнэ биэрбититтэн биһиги сүрдээҕин киэн туттабыт. Онон, Роман Михайлович Дмитриев олоҕун көрдөрөр музейнай предметтэр Саха сирин достояниета буолар, ону ааһан государственнай каталогка киирэн, хас биирдии мал – биһиги дойдубут, Россия баайа-дуола буола сылдьар.

Быыстапкаҕа туруоруллубут хас биирдии экспонат сүрдээх күндү. Онон ханныгы эрэ чорботор кыаҕым суох. Эдэр ыччакка, улуу киһи хайдах үөрэммитин көрдөрөр, туоһулуур бу диплома баар. Онно зачетнай ведомоһыгар хас биирдии предмеккэ ханнык сыананы ылбыта сурулла сылдьар. Дьэ, ону, ыччаттар, Дмитрий Петрович хайдах үөрэммитин кэлэн көрөллөрүгэр ыҥырабыт.

Петр Павлов.

Ааптар хаартыскаҕа түһэриилэрэ.