Арыйаан Тютрин: “Кыайыыга эрэллээх этим”

Улуу тренер Д.П. Коркин аатынан көҥүл тустууга норуоттар икки ардыларынааҕы турнир 57 киилэҕэ кыайыылааҕынан биир дойдулаахпыт, Белоруссия чемпиона, аан дойду чемпионатын призера Арыйаан Тютрин буолла.

–Быйылгы турнир састаап өттүнэн наһаа күүстээх буолла, – диир Арыйаан. – Кыайыылаахтар кэккэлэригэр киирэммин, санаабын ситтим. Белоруссияттан саҥа кэлэн, Саха сирин бириэмэтигэр кыайан ситэ киирбэккэ сылдьар курдукпун. Онон хас биирдии киирсиим наһаа ыараханнык ааста. Дойдубар, дьиэбэр хайаан да бастыахтаахпын диэн сыал-сорук туруорунан, бэйэбэр эрэллээх этим. Бастакы миэстэни ыламмын, дьоммун-сэргэбин үөртүм дии саныыбын. Аны тохсунньуга ыытыллар Беларусь Республикатын чемпионатыгар бэлэмнэнэбин.

Турнирга кини утуу-субуу Любомир Ашеины 10:0, таджик Мухамад Икромовы 12:8, Димчик Батомункуевы (Белоруссия) 5:4, Уйгулан Иванову 3:2 уонна финалга кубинец Рейнери Ортеганы 3:2 ахсааннарынан кыайталаата.

Кыайыылаах Арыйаан Тютрины уонна кини тренерэ Иван Дмитриеви эҕэрдэлиибит!

“Дьулур5ан”.