Үлэбит сыаналаммытыгар махтал!

Дьокуускай куорат тустууга федерациятын 32 сыллаах историятыгар аан маҥнайгынан «За развитие спортивной борьбы» диэн түөскэ анньыллар бэлиэни уонна ону туоһулуур дастабырыанньаны федерация салайааччыта Руслан Михайлович Платонов – Саха Республикатын үтүөлээх тренерэ, бэтэрээннэргэ аан дойду икки төгүллээх чемпиона Иннокентий Семенович Кочкиҥҥа, РСФСР үөрэҕириитин туйгуна Егор Иннокентьевич Черкашиҥҥа уонна миэхэ туттартаата.

Р.М. Платонов – Дьокуускай тустууга федерациятын сэттис салайааччыта, бу дьоһун саҥаны киллэриитэ буолар. Бу иннинээҕи салайааччылар бары да үрдүк таһымнаахтык үлэлээн ааспыттара. Кинилэртэн куорат дьаһалтатын баһылыктара И.Ф. Михальчугу уонна А.С. Николаевы (билигин Саха Республикатын Ил Дархана) итиэннэ Россия академиятын чилиэн-корреспондена Л.Н. Владимировы чорботуом этэ.

Онтон бу үрдүк наҕараадаҕа, итэҕэлгэ, чиэскэ тиксибиттэр Дьокуускай оҕолоро тустуунан сибээстээн эт-хаан өртүнэн сайдыылаах, чөл олохтоох дьон буолалларын туһугар үһүөн холбоон 141 сылбытын анаатыбыт. Ону сөпкө сыаналаабыттарыгар федерация салалтатыгар Р.М. Платоновка, федерация толорооччу дириэктэрэ В.А. Кривошапкиҥҥа, эппиэттээх секретарь В.В. Уйгуровка уонна бу общественнай түмсүү бары чилиэттэригэр барҕа махталбытын тиэрдэбит!

Федот СОЛОВЬЕВ, РФ физическэй культуратын үтүөлээх үлэһитэ, көҥүл тустууга бэтэрээннэргэ аан дойду чемпиона.           

Добавить комментарий

Ваш адрес email не будет опубликован. Обязательные поля помечены *