Ярыгин-2022: Виктор Рассадин – түһүлгэ кыайыылааҕа!

Красноярскай. Иван Ярыгин кэриэһигэр көҥүл тустууга норуоттар икки ардыларынааҕы 33-с турнир бастакы финаллара ыытылыннылар. Бырагыраама быһыытынан бастаан 57, 61, 70 кг ыйааһыннаахтар, ким мэтээл ыларын быһаарыстылар.

Эрдэ суруйбуппут курдук, быйылгы турнирга хамаанда саамай опыттаах бөҕөһө Виктор Рассадин ситиһиилээхтик туһунна. Сүрүн утарсааччытын, уруккута үстэ хотторо сылдьыбыт киһитин дагестанец Курбан Шираевы, Азия чемпиона казах Талгат Сырбаһы, красноярец Усман Шахгиреевы эрэллээхтик кыайталаан финалга таҕыста. Онно кини Россия чемпионатын призёра, аан дойду Кубогын кыайыылааҕа, норуоттар икки ардыларынааҕы кылаастаах спорт маастара, кабардинец Анзор Закуевы кытта туһунна.

Хапсыһыыны хара маҥнайгыттан Виктор сытыытык саҕалаата. Киһитин дэлби хамсатан, көхтөөҕүн көрдөрөн, бастаан сэрэтии бэрдэрдэ (1:0), салгыы атахха киирэн охторон (2:0), маҥнайгы түһүмэҕи эрэллээхтик саҕалаата.

Иккис түһүмэххэ киирэн, биир түгэҥҥэ Закуев уолбутун тиэрэ көтөн, биирдэ чорбос гына түстэ (4:3). Биһиги, хапсыһыыны быһа биэриигэ көрө олорор дьон ыксыыбыт. Арай, Виктор холку. Кини кыайыыга эрэллээх буолан, балаһыанньаны тута көннөрдө уонна түмүккэ 9:4 ахсаанынан дьоһун кыайыыны ситистэ. Маладьыас! Тустууну таптааччылары, бүтүн саха дьонун үөртэ, сэргэхситтэ.

Ылан көрдөххө, күүс-уох, быһыы-таһаа өттүнэн сиппит-хоппут, сайдыбыт. Тустуута даҕаны тупсубут. Сыыһа-халты туттууну таһаарбата, бэйэтин күүһүгэр эрэлэ улааппыт диэн сыаналыахха сөп.

Дьиҥэ Виктор Рассадин – буспут-хаппыт, улахан кыайыылары ситиһэр кыахтаах спортсмен буолара эрдэттэн биллэрэ. Ол эрээри, бу иннинэ киниэхэ бэрт кыра тиийбэккэ, тус кыаҕын кыранан ситэ туһаммакка сылдьыбыта. Кырдьык, кини олоҕор барыта баара, түһүү-тахсыы, кыайыы-хотторуу. Ону Виктор эрэллээхтик туораан, таптыыр кыыһын кытта холбоһон, олоҕун оҥостон, дьарыгар сыал-сорук туруоран, өйүн-санаатын тутан, тулалыыр дьонун киниэхэ эрэллэрин, көмөлөрүн өйдөөн, дьэ арыллан тустан эрэр.

Онуоха Виктор Рассадин бу кыайыытыгар бастатан туран, кини тус тренердэрин Артур Константиновы, Иван Дмитриеви, хамаанда кылаабынай тренерэ Александр Оконешниковы, Спорт уонна Тустуу салайааччыларын, куруук күүс-көмө, өйөбүл буолар дьонун барыларын эҕэрдэлиибит!

Салгыы тугуй? Бу, Ярыгин түһүлгэтин түмүгүнэн, эрдэ этиллибитинэн, кыайыылаахтар кулун тутар бүтүүтэ Венгрия киин куоратыгар буолар Европа чемпионатыгар кыттыахтаахтар. Виктор бу ылыммыт тэтимин ыһыктыбакка, салгыы ситиһиилээхтик кыттарыгар баҕарабыт! Ситиһии сиэттиһэн истиҥ.

Аны бүгүн турнирга икки бөҕөспүт кыттар. Ньургун Скрябин (65 кг) “уоскутар” бөлөххө киирэн монгол Тумур-Очир Тулганы кытта тустар. Оттон хамаанда хапытаана Ньургун Сергин (92 кг) бастакы хапсыһыытыгар молдован Г.Цырланы кытта киирсэр. Уолаттарбытыгар «ыалдьыахха», уолаттарбытыгар эрэниэххэ!

Хапсыһыылар биһиги бириэмэбитинэн күнүс 13:00 чаастан саҕаланаллар.

Петр Павлов.    

Добавить комментарий

Ваш адрес email не будет опубликован.