Ярыгин-2022: Виктор Рассадин финалга таҕыста!

Красноярскай. Өр кэтэспит күрэхтэһиибит дьэ бүгүн саҕаланан, тустууну таптааччылар күө-дьаа буоллубут. Бу иннинэ сайтпытыгар иһитиннэрбиппит курдук, бүгүн күрэхтэһии эр дьоҥҥо үс ыйааһыҥҥа ыытылынна. Итиэннэ саха тустуутун туһугар сэргэхсийии үөскээтэ.

Хамаанда саамай опыттаах тустууга, Россия чемпионатын хас да төгүллээх призера, студеннарга аан дойду чемпиона, аан дойду Кубогын кыайыылааҕа, норуоттар икки ардыларынаҕы кылаастаах спорт маастара Виктор Рассадин ситиһиилээхтик кыттан, биир дойдулаахтарын сэргэхситтэ.

Кини, сэрэбиэй быһыытынан, бастакы эргииргэ сынньаммыта. Иккискэ, бу иннинэ аан дойду икки төгуллээх призера Д.Грины (АХШ) хоппут Европа чемпиона дагестанец Курбан Шираевы кытта көрүстэ. Хапсыһыы эрдэттэн сэрэйиллибитин курдук сүрдээх тыҥааһыннаахтык барда. Манна Виктор туох да сыыһа-халты туттууну оҥорбокко, наар урутаан үлэлээн, утарсааччытын ыган тустан, түмүккэ 7:6 ахсаанынан кыайан таҕыста. Билэргит курдук, бу иннинэ Шираевка үстэ көрсөн үһүөннэригэр хотторон турар. Кэнникитин олох соторутааҕыта, Саҥа дьыл иннинэ Хасавюрка, «кириэс» диэн албаска киирэн биэрэн, очукуонан ыраастык хотторбута.

Маныаха тренердэр Иван Дмитриев уонна Артур Константинов хотторууну уруок оҥостон, Шираевы утары хайдах тустары толкуйдаан, былааннаах үлэни ыытан бу сырыыга кыайыы кэллэ диэххэ сөп. Виктор бүгүҥҥү тустууларын “Дьулурҕан” хаһыат ютуб-каналыгар өссө төгүл эргитэн көрүөххүтүн сөп.

Салгыы тустууларга Виктор Рассадин — казах Талгат Сырбаһы 12:1, Усман Шахгиреевы (Красноярскай) 6:1 ахсааннарынан эрэллээхтик кыайталаата.

Бүгүн саҕалаабыттар финаллара сарсын киэһэ буолар. Виктор Рассадиҥҥа улаханнык эрэнэбит. Кини опыттаах, улахан түһүлгэлэргэ буспут-хаппыт тустуук.

Атын уолаттарбытыттан, 61 киилэҕэ финалист Ф.Балтуевка кыранан сабырыйтарбыт Петр Константинов уоскутар бөлөххө киирэн Абдурахман Расуловтыын (Дагестан) уонна А.Магомедовка хотторбут Семен Владимиров – Азат Оганесянныын (Казахстан) киирсиэхтэрэ. Онон кинилэр мэтээл иһин киирсэр кыахтарын сүтэрэ иликтэр.

Финалга тустуохтара:

57 кг Рамиз Гамзатов (Дагестан) – Ахмед Идрисов (Дагестан).

61 кг Федор Балтуев (Иркутскай) – Абасгаджи Магомедов (Дагестан).

70 кг Виктор Рассадин (Саха сирэ) – Анзор Закуев (КБР).

Петр ПАВЛОВ.      

 

Добавить комментарий

Ваш адрес email не будет опубликован.