Ярыгин-2022: Мэтээл кэлиэ дуо?

Дьэ, бүгүҥҥүттэн Красноярскайга, Иван Ярыгин кэриэһигэр көҥүл тустууга норуоттар икки ардыларынааҕы 33-с турнир хапсыһыылара саҕаланаллар. Бэҕэһээ киэһэ бары ыйааһыннарга сэрэбиэй оҥоһулунна. Бастакы күн күрэхтэһиини үс ыйааһын саҕалыыр – 57, 61, 70 кг.

Мэтээл кэлиэ дуо? Бу ыйытыы элбэх тустууну таптааччылар өйдөрүн-санааларын үүйэ-хаайа тутар буолуохтаах. Туст санаабар, уолаттарбыт хайдах тустуохтарын сөбүн сылыктыырга холонуохха.

57 киилэҕэ барыта 26 бөҕөс суруттарбыт. Атын дойдулартан Монголия, Казахстан, Кыргызстан, Молдова, Беларусь бөҕөстөрө бааллар. Биһиги бөҕөстөрбүтүттэн Петр Копылов үөһэ бөлөххө киирбит, атын үс уолбут (Уйгулаан Иванов, Дьулус Федотов, Федор Постников) аллараа бөлөххө түбэспиттэр.

Бу ыйааһыҥҥа ааттаах-суоллаах, балачча ситиһиилээх тустууктарынан Азамат Тускаев, Начын Монгуш, Ахмед Идрисов, Рамиз Гамзатов, Жаргал Дамдинов буолаллар. Ол аата, кинилэр кыайаллар диэн буолбатах. Чуо, бу күҥҥэ ким үчүгэй туруктаах, ким үчүгэй бэлэмнээх, кыайыыга ордук дьулуурдаах – ол кыайыаҕа.

Петр Копылов бастаан монголу кытта тустар. Онно хоттоҕуна, Мехтиханов-Гармаев кыайыылааҕар тахсыаҕа. Бу бөлөххө өссө Монгуш, Идрисов бааллар.

Иккис бөлөххө Ивановтаах Постников бастакыларын кыайдахтарына, иккискэ бэйэлэрин кытта тустуохтарын сөп. Омос көрдөххө, Дьулус Федотов балаһыанньата куһаҕана суох. Чэ бээ, бириэмэни, буола илиги түргэтитиллибэт. Этэргэ дылы, көбүөр көрдөрүө.

Бу ыйааһыҥҥа иһэ үлүннэҕинэ биир боруонса мэтээл биһиэхэ кэллэҕинэ баһыыба курдук буолбут.

61 кг – 24 кыттааччы. Сэрэбиэй быһыытынан Петр Константинов үөһэ, Семен Владимиров аллараа бөлөххө киирбиттэр. Константинов бурят Федор Балтуевтыын тустар, оттон Владимиров – Ахмед Зубаировтыын. Тэҥ баайыылаах утарсааччылар, биһиги бөҕөстөрбүт ханнык да түгэҥҥэ кыайыахтаахтар.

Бу ыйааһыҥҥа бастыҥынан Россия уонна аан дойду чемпиона Абасгаджи Магомедов буолар. Эрдэ суруйбуттарынан, аан дойду чемпиона, Олимпиада призёра Томас Гилман кэлэр диэн этэ да, американец кэлбэтэх. Онон Магомедов-Гилман күүтүллүбүт хапсыһыылара буолбат буолбут.

Владимиров бастакы эргиири аастаҕына, салгыы эргииргэ Абасгаджи Магомедовтыын тустуоҕа.

Онон сэрэбиэйи ырытан көрдөххө уонна тус санаабар, бу ыйааһыҥҥа табылыннаҕына биир боруонса мэтээл кэлиэн сөп.

70 кг ыйааһыҥҥа 25 бөҕөс баар. Манна биһигиттэн Виктор Рассадин тустар. Кини бастакы эргииргэ сынньанар. Салгыы эргииргэ Курбан Шираев (Россия) – Джеймс Грин (АХШ) хапсыһыыларын кыайыылааҕар тахсыаҕа. Ханныгын да иһин, кытаанах сэрэбиэй. Ол да буоллар, биһиги Викторга мэтээли аҕалыа диэн эрэнэбит.

Бүгүн уолаттарбыт кимнээҕи кытта киирсэллэрий?

57 кг Петр Копылов – Мунх-Эрдэнэ Батхуяг (Монголия)

57 кг Уйгулаан Иванов – Дмитрий Шамела (Беларусь)

57 кг Дьулустан Федотов – Еламан Кадырсеит (Казахстан)

57 кг Федор Постников – Ананда Дашиев (Россия, Бурятия).

61 кг Петр Константинов – Федор Балтуев (Иркутскай)

61 кг Семен Владимиров – Ахмед Зубаиров (Дагестан)

70 кг Виктор Рассадин – Шираев (Россия)/Грин (АХШ).

Атын бөҕөстөрбүтүттэн Ньургун Скрябин (65 кг) сарсын Ньургун Сергин (92 кг) өйүүн тустууларын саҕалыыллар.

Бүгүн тустуу биһиги бириэмэбитинэн күнүс 13:00 чаастан саҕаланар. Уолаттарбытыгар барыларыгар ситиһиилээх тустууну баҕарабыт!

Хапсыһыылары манна көрүөххүтүн сөп:

Ковер 1: https://wrestlingtv.ru/stream/E6-9ZATt5S…

Ковер 2: https://wrestlingtv.ru/stream/ngxElij90G…

Ковер 3: https://wrestlingtv.ru/stream/hkuR9-A2r8…

Петр Павлов.

Добавить комментарий

Ваш адрес email не будет опубликован.