Ярыгин-2022: Көбүөргэ ыҥырыллар Ньургун Скрябин!

Красноярскай. Икки төгүллээх олимпийскай чемпион Иван Ярыгин сырдык кэриэһигэр 33-с төгүлүн ыытыллар көҥүл тустууга норуоттар икки ардыларынааҕы турнир иккис күнүгэр күрэхтэһиини 65, 79, 125 кг ыйааһыннаахтар саҕалыыллар. Манна саха тустууга кыһатын иитиллээччилэриттэн Европа чемпионатын үрүҥ көмүс призёра, Беларусь чемпиона, норуоттар икки ардыларынааҕы кылаастаах спорт маастара Ньургун Скрябин баар.

65 киилэҕэ 29 кыттааччы тустар. Ньургун Скрябин үөһэ бөлөххө киирбит. Бастакы утарсааччыта – Москваттан сылдьар дагестанец Шамиль Мамедов, былырыын эдэрдэргэ Россия уонна аан дойду күрэхтэһиилэрин кыайыылааҕа. Саҥа дьыл аҕай иннинэ Хасавюрка улахан таһымнаах норуоттар икки ардыларынааҕы турнирга эмиэ бастаабыта. Талааннаах эдэр тустуук.

Билэргит курдук, Ньургун соторутааҕыта Солигорскай куоракка ыытыллыбыт Беларусь Республикатын чемпионатыгар холкутук бастаабыта. Улахан үөрүйэхтээх бөҕөс билигин даҕаны буораҕа кураанах. Бэйэтин сөбүлээн туттар хамсаныытыгар, албаһыгар киллэрдэҕинэ, кими баҕарар суулуур кыахтаах.

Манна даҕатан эттэххэ, Ньургун – Ярыгин турнирыгар 2016 сыллаахха бастыы, 2015 сыллаахха үһүстүү сылдьыбыта. Бу да сырыыга мэтээлгэ тигистэҕинэ киһи соһуйбат.

Бу ыйааһыҥҥа састаап күүстээх диэххэ сөп. Ол курдук, Ньургун бөлөҕөр тувинец Начын Куулар, бурят Даша Шарастепанов, монгол Тумур Тулга, Албанияҕа көспүт чечен Дудаев бааллар. Оттон аллараа бөлөххө Рамазан Ферзалиев, Ахмед Чакаев, американец Маккенна, тувинец Кежик Чымба, дагестанец Кудиев, бурят Булат Батоев курдук биллэр бөҕөстөр бааллар.

Турнир иккис күнүн хапсыһыылара биһиги бириэмэбитинэн эмиэ күнүс 13:00 чаастан саҕаланаллар. Тустууну көтүтүмэҥ, бэйэҕит уолаттаргытыгар «ыалдьыҥ».

Петр Павлов.

Добавить комментарий

Ваш адрес email не будет опубликован.