Ярыгин-2022: Бары Виктор Рассадиҥҥа «ыалдьабыт»!

Красноярскай. Быйылгы, Иван Ярыгин аатынан 33-с норуоттар икки ардыларынааҕы турнирга эр дьоннуун, дьахталлардыын барыта 11 дойдуттан 300-чэкэ спортсмен кытта сылдьар.

Бастакы күн түмүгүнэн бастыҥнар сиидэлэнэн, бүгүн киэһэ – 57, 61, 70 кг ыйааһыннарга ким ханнык мэтээли ыларын быһаарсыахтара.

Бүгүн, финалистарга хотторбуттар «уоскутар» диэн ааттыыр бөлөхтөрүгэр биһигиттэн 61 киилэҕэ икки уолбут туһунна. Ол курдук, Ф.Балтуевка сабырыйтарбыт Петр Константинов дагестанец Абдурахман Расуловка 3:9, оттон иккис финалист А.Магомедовка хотторбут Семен Владимиров – Азат Оганесяҥҥа (Казахстан) 11:12 ахсааннарынан кыһыылаахтык хотторон кэбистилэр. Баары баарынан эттэххэ, ити тустууларга мин биһиги уолаттарбыт кыайаллар дии санаабытым.

Кырдьык, хапсыһыыны көрө олорон, бөҕөстөрбүт бу утарсааччыларын тустар маастарыстыбаларынан баһыйар курдуктар эрээри, сыыһа-халты туттуулара наһаа элбэх. Константинов наһаа кэбэҕэстик атахтатар, оттон Владимиров төһө эмэ кыайан иһэн, уҥуоҕунан быдан уһун киһини кууһан ылан быраҕаары бэйэтэ тиэрэ баран түстэ. Ол киирсиилэр видеолара «Дьулурҕан» хаһыат ютуб-каналыгар бааллар. Тренердэр, ити хапсыһыылары үчүгэйдик үөрэтэн, спортсменнарын сыыһаларын-халтыларын туораталларыгар, хотторууну уруок оҥостоллоругар баҕарабыт.

Онон, бу ыйааһыҥҥа мэтээл кэлиэ диэн суоттаабыппыт – табыллыбата.

Бырагыраама быһыытынан биһиги бириэмэбитинэн киэһэ 19:30 чааска турниры үөрүүлээхтик аһыы буолар. Ол кэнниттэн финаллар 20 чаас 15 мүн. саҕаланыахтаахтар. Бары Виктор Рассадиҥҥа «ыалдьабыт»! Утарсааччыта – норуоттар икки ардыларынааҕы кылаастаах спорт маастара, кабардинец Анзор Закуев, аан дойду Кубогын-2019 кыайыылааҕа, Россия чемпионатын призёра.

Бу бөҕөстөр соторутааҕыта көбүөргэ көрсөн тураллар. Саҥа дьыл иннинэ Хасавюрка ыытыллыбыт турнирга Виктор Рассадин очукуонан ыраас кыайыыны ситиспитэ. Бу да сырыыга биһиги бөҕөспүт кыайарыгар баҕарабыт.

Бүгүҥҥү финаллар:

57 кг 1-2: Ахмед Идрисов (Дагестан) – Рамиз Гамзатов (Дагестан)

57 кг 3-5: Муса Мехтиханова (Дагестан) – Абзал Окенов (Казахстан)

57 кг 3-5: Азамат Тускаев (Хотугу Осетия) – Бекзат Алмаз Уллу (Кыргызстан).

61 кг 1-2: Абасгаджи Магомедов (Дагестан) – Федор Балтуев (Иркутскай)

61 кг 3-5: Абдурахман Расулов (Дагестан) – Улугбек Жолдозбеков (Кыргызстан)

61 кг 3-5: Зелимхан Абакаров (Албания) – Муслим Мехтиханов (Дагестан)

70 кг 1-2: Виктор Рассадин (Саха) – Анзор Закуев (КБР)

70 кг 3-5: Курбан Шираев (Дагестан) – Усман Шахгиреев Красноярск)

70 кг 3-5: Руслан Жендаев (Красноярск) – Алан Кудзоев (Хотугу Осетия).

«Дьулурҕан».

Добавить комментарий

Ваш адрес email не будет опубликован.