Владислав Андреевы улахан спортан атаарыы тэрээһиннэрэ

Ахсынньы 21-22 күннэригэр Ньурба оройуонугар аатырбыт бөҕөс Андреев Владиславы улахан спортан үөрүүлээхтик атаарыы тэрээһиннэрэ ыытыллаллар. Владислав Андреев бүгүн сарсыарда Белоруссия көҥүл тустууга сүүмэрдэммит хамаандатын кылаабынай тренерэ Иван Янковскайы кытта Мирнэйгэ көтөн кэллилэр.

Олохтоохтор киэн туттар уолларын төһө кыалларынан үчүгэйдик, үрдүк таһымҥа көрсөргө соруктаналлар.

Ол курдук, бүгүн киэһэ улуус дьаһалтатын дьиэтигэр Ньурба баһылыга Алексей Михайлович Иннокентьевы кытта көрсүһүү буолла. Оттон сарсын, ахсынньы 21 күнүгэр сарсыарда Антоновка оскуолатыгар учууталлары, үөрэнээччилэри, салгыы улуустааҕы Оҕо спортивнай оскуолатын коллективын кытта көрсүһүүлэр былааннаналлар. Онтон Хатыҥ Сыһыы тустууга саалатыгар Владислав Андреев уонна Иван Янковскай маастар-кылаас тэрийэн ыытыахтара.

Ахсынньы 22 күнүгэр сарсыарда 10 чаастан – Белоруссия элбэх төгүллээх чемпиона, Европа чемпионатын 4 төгүллээх призера, аан дойду чемпионатын боруонса медалиһа, Аан дойду Кубогын хаһаайына, элбэх норуоттар икки ардыларынааҕы турнирдар кыайыылаахтара, Ньурба оройуонун бочуоттаах гражданина Владислав Витальевич Андреевы улахан спортан атаарыы чиэстээһинэ уонна көҥүл тустууга аһаҕас республикатааҕы түһүлгэ саҕаланар.

Санатан эттэххэ, күрэхтэһии икки ыйааһыҥҥа ыытыллар: 57 уонна 61 кг. Кыайыылаахтар харчынан ботуччу бириэмийэни тутуохтара. Ол курдук, бастаабыттар – 100, иккистээбиттэр – 60, үһүстээбиттэр – 30 тыһ. солк. харчынан наҕараадаланыахтара.

Петр Павлов.     

Добавить комментарий

Ваш адрес email не будет опубликован.