Владимир Дмитриевич Данилов 85 сааһын туолла!

Бүгүн, сэтинньи 10 күнүгэр саха бастакы көлүөнэ тустууктарыттан биирдэстэрэ, ССРС спордун маастара Владимир Дмитриевич Данилов, дьоҥҥо-сэргэҕэ биллэринэн Бэһэлэйдээх Болуодьа юбилейдаах 85 сааһын туолла! Күн сирин сырдыгын көрбүт күҥҥүнэн иһирэхтик, истиҥник эҕэрдэлиибит! Саха алмааһыныы кытаанах доруобуйаны баҕарабыт! Эйигинэн киэн туттабыт!

Владимир Дмитриевич Сунтаар улууһугар 1936 сыллаахха сэтинньи 10 күнүгэр төрөөбүтэ. Көҥүл тустуунан 1955 с. дьарыктаммыта. Кинини тустууга уһуйааччыларынан С.А.Зедгенидзев уонна Н.И.Сафонов буолаллар. ССРС спордун маастарын нуорматын 1960 с. толорбута.

Көҥүл тустууга Саха АССР үс төгүллээх чемпиона (1960, 1961, 1966). РСФСР-64 чемпионатын үрүҥ көмүс призера, Слада тустууга аан дойду биэс төгүллээх чемпиона, аҕам саастаахтарга самбоҕа аан дойду уонна Азия түһүлгэтин кыайыылааҕа, бэтэрээн-маастардар көҥүл тустууга аан дойдуга бастыыр иһин күрэхтэһиилэригэр 1994 с. үрүҥ көмүс мэтээлинэн наҕараадаламмыта.

Владимир Данилов араас таһымнаах түһүлгэлэргэ Д.Мирзоев, А.Киракосян, Е.Тедеев, З.Абдулбеков, Н.Неустроев, А.Захаров, Н.Захаров, П.Алексеев, А.Ермолаев, С.Дмитриев курдук биллиилээх бөҕөстөрү кытта күөн көрсүбүтэ.

“Трудовые резервы” спортивнай обществоҕа тренердии сылдьан Гавриил Дмитриеви, Савва Колесовы, Константин, Николай Жироховтары, Валентин Иванову, Дмитрий Ючюгяевы, уо.д.а. эрчийбитэ.

В.Д. Данилов — ХХ үйэ спорка лауреата, самбоҕа уонна көҥүл тустууга спорт бочуоттаах маастара, Сунтаар улууһун бочуоттаах гражданина, милиция ветерана.

Кэнники кэмҥэ кини Бэһэлэйдээх Болуодьа диэн аатынан норуот ырыаһыта, тойуксут, оһуохайдьыт, олоҥхоһут, алгысчыт быһыытынан биллэр.

Хаартыскаҕа Владимир Дмитриевич Данилов ортоку (хаҥастан төрдүс) турар.

«Дьулур5ан».

Добавить комментарий

Ваш адрес email не будет опубликован. Обязательные поля помечены *