Вадим Данилов финалга таҕыста!

Греция Лутраки куоратыгар көҥүл тустууга бэтэрээннэргэ аан дойду чемпионата үгэннээн бара турар. Бүгүн көбүөргэ Д дивизион (51-56 саастаахтар) 70 кг ыйааһыныгар иккис кыттааччыбыт – Уус Алдан бөҕөһө, хапсаҕайга Саха Республикатын спордун маастара Вадим Данилов таҕыста.

Кини бөлөҕөр түөрт кыттааччы баара. Бастакы эргииргэ Вадим француһу кытта тустуохтаах этэ, ол эрээри, утарсааччыта биллибэт биричиинэнэн туста тахсыбата. Ол кэмҥэ россиянин Магомедов болгар Саровы 6:0 ахсаанынан эрэллээхтик хоппута.

Онтон чочумча буолаат, көбүөргэ Вадим Данилов – Умар Асхаб Магомедов тахсаллар. Биһиги бөҕөспүт хапсыһыыны сытыытык, эрчимнээхтик саҕалаата. Бастакы түһүмэххэ бэйэни тургутан көрүү буолла. Онуоха дагестанец көҕө суохтук тустарын иһин сэрэтии биэрдилэр. Онон бастакы түһүмэх 1:0 ахсаанынан Данилов туһатыгар буолла. Онтон иккис түһүмэххэ киирэн, Вадим киһитин атаҕыттан ылан охторон эбии 2 баллы сурунна. Онон түмүккэ 3:0 ахсаанынан кыайыыны ситистэ.

Итинэн Вадим Данилов финалга таҕыста. Кини утарсааччытынан американец Стивен Ортон буолла. Финал программа быһыытынан, Дьокуускай бириэмэтинэн 24:00-03:00 чааска буолар. Быһа биэриини UWW сайтыгар көрүөххэ сөп.

Бөҕөспүтүгэр ситиһиини баҕарабыт!

Петр ПАВЛОВ.     

Добавить комментарий

Ваш адрес email не будет опубликован. Обязательные поля помечены *