Вадим Данилов – аан дойду чемпионатын үрүҥ көмүс призёра!

Греция Лутраки куоратыгар аҕам саастаах бөҕөстөр аан дойдуга бастыыр иһин чемпионаттара ыытылла турар. Эрдэ суруйбуппут курдук, бу чемпионакка саха тустууга кыһатын икки бэрэстэбиитэлэ кытынна.

Вадим Данилов – чемпионат Д дивизионугар, 51-56 саастаахтарга 70 киилэҕэ диэри туһунна. Бастаан француз Седдик Мехаданы кытта киирсиэхтээҕин, анарааҥыта тоҕо эрэ туста тахсыбакка, биһиги бөҕөспүтүгэр кыайыы быһа бэриллибитэ. Онтон финалга тахсар иһин киирсиигэ дагестанец Умарасхаб Магомедовы 3:0 ахсаанынан хоппута.

Ким бастыырын быһаарар кытаанах хапсыһыыга бөҕөспүт американец Стивен Хортону кытта көрүстэ. Утарсааччыта иҥиир-ситии, Вадимтан уҥуоҕунан быдан үрдүк тустуук. Бастакы түһүмэх 2:0 биһиги бөҕөспүт туһатыгар түмүктэммитэ. Иккискэ киирэн эмиэ, этэргэ дылы, характердар киирсиилэригэр, Вадимҥа тоҕо эрэ сэрэтии биэрдилэр. Ол да буоллар, ахсаан син биир кини туһатыгар 2:1 этэ. Хапсыһыы бүтэрэ бу олох кэлбитигэр, хайдах эрэ кэтэһэ сылдьыбыт курдук, Хортон атахха киирэн киһибитин суулларан, 2 баалы ылар уонна устунан 3:2 ахсаанынан кыайан тахсар. Дьэ, кыһыылаах хотторуу. Этэргэ дылы, кыһыл көмүһү, чемпион аатын мүччү тутта.

Чэ, туох буолуой? Иккис миэстэ да – үчүгэй ситиһии! Бу көрдөрүүтүнэн Вадим Петрович спорка бэриниилээҕин, уһун үйэлээҕин, тустууга сүгүрүйэрин өссө төгүл көрдөрдө итиэннэ атыттарга үтүө холобур буолла диэн сыаналыахтаахпыт.

Үөскээбит тоҕоостоох түгэнинэн туһанан Вадим Данилов туһунан билиһиннэрдэххэ, кини – Уус Алдан улууһун Бэрт Ууһун нэһилиэгиттэн төрүттээх, оскуолаҕа үөрэнэ сылдьан ССРС спордун маастара, Саха АССР үтүөлээх тренерэ Н.Н. Константинов салалтатынан дьарыктаммыта. Хапсаҕайга П.Алексеев аатынан республика чемпионатын кыайыылааҕа (2008), икки төгүл боруонса призера (2006, 2011). Көҥүл тустууга Н.Алексеев бирииһигэр Саха сирин бэтэрээннэргэ үс төгүллээх чемпиона (2015, 2016, 2017), Россия чемпионатын үрүҥ көмүс призера (2015), Калининградка ыытыллыбыт норуоттар икки ардыларынааҕы турнир үһүс призера (2018), бэтэрээннэргэ аан дойду чемпионатын боруонса (Афины, 2015) уонна үрүҥ көмүс (Скопье, 2018) призердара.

СР үөрэҕириитин туйгуна, хапсаҕайга СР спордун маастара. СР спордун национальнай көрүҥэ сайдыытыгар кылаатын, Физическэй культура уонна спорт, «Урожай» спортивнай уопсастыба, Уус Алдаҥҥа үөрэхтээһин, Бэрт Ууһун уонна Мүрү нэһилиэктэрин социальнай-экономическай сайдыыларыгар кылаатын иһин анал бэлиэлэринэн наҕараадаламмыта.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *