UWW рейтинигэр мин санаам

Быйылгы сылтан саҕалаан Тустуу аан дойдутааҕы түмсүүтэ (UWW) тустууктар рейтиннэрин оҥорууга саҥа ааҕыыны киллэрбитэ. Ол быһыытынан, 2018 сылтан саҕалаан аан дойду чемпионатын, континеннар чемпионаттарын уонна түөрт турнир түмүгүнэн тустууктарга рейтинг очукуолара ааҕыллар.

Манна биир ноолоох, ити үөһэ ааттаммыт күрэхтэһиилэргэ бастаабыт тустуук очукуота – кини ыйааһыныгар хас киһи кыттыбытыттан тутулуктаах. Холобур, Европа чемпионатыгар 30 кыттааччытан бастаабыт тустуук 42 (12+30) рейтинг очукуотун ылар. Балаһыанньа быһыытынан, турнирдарга көбүөр хаһаайыттара биир ыйааһыҥҥа үстүү эрэ тустуугу киллэрэр бырааптаахтар.

Билиҥҥитэ континеннар чемпионаттара уонна үс рейтиннээх турнирдар ыытылыннылар. Онно, олохтоммут систиэмэҕэ олоҕуран 1 миэстэҕэ – 12, 2 миэстэҕэ – 10, 3 миэстэҕэ – 8, 5 миэстэҕэ – 6, 7 миэстэҕэ – 4 уонна 8 миэстэҕэ – 2 очукуо ааҕыллар. Оттон рейтиннээх турнирдарга: 1 миэстэҕэ – 8, 2 миэстэҕэ – 6, 3 миэстэҕэ – 4, 5 миэстэҕэ – 2 очукуо ааҕыллар.

Санатан эттэххэ, көҥүл тустууга рейтиннээх турнирдарынан – Иван Ярыгин (Россия, Красноярскай), Вахтанг Балавадзе (Грузия, Тбилиси), Яшар Догу (Турция, Стамбул), Александр Медведь (Белоруссия, Минскэй) турнирдара буолаллар.

Билиҥҥитэ үс бастакы турнирдар ыытылыннылар. Оттон А.Медведь турнира балаҕан ыйын 14-16 күннэригэр ыытыллыаҕа. Итиэннэ алтынньы 20-28 күннэригэр Венгрия киин куоратыгар Будапештка – аан дойду чемпионата ыытыллара хаалла.

Дьэ, бу күрэхтэһиилэр түмүктэринэн рейтинг оҥоһуллар. Ол рейтинг түмүгүнэн улахан таһымнаах күрэхтэһиилэргэ (аан дойду, Европа чемпионаттара, Олимпиада) тустууктары төһө рейтиннээхтэринэн көрөн аттаран туруоруохтара. Холобур, үөһэ бөлөххө – 1, 3, 5, аллараа бөлөххө – 2, 4, 6 рейтиннээх бөҕөстөр аттарыллан туруоруллуохтаахтар.

2018 сылга киирэн баран, континеннар чемпионаттарын уонна үс рейтиннээх турнирдар түмүктэринэн UWW рейтинэ билиҥҥитэ маннык:

57 кг 1. Заур Угуев (Россия) 42 очукуо 2. Томас Гилман (АХШ) 36 3. Сулейман Атли (Tурция) 32 4. Цохтбадрах Цевенсурен (Mонголия) 32 5. Хуреш Оол Дондук Оол (Россия) 30.
61 кг 1. Аббос Рахмонов (Узбекистан) 49 2. Гаджимурад Рашидов (Россия) 42 3. Бека Ломтадзе (Грузия) 41 4. Мирджалал Гасанзаде (Aзербайджан) 31 5. Нурислам Санаев (Kазахстан) 24.
65 кг 1. Ильяс Бекбулатов (Россия) 45 2. Бажранг Бажранг (Индия) 45 3. Даулет Ниязбеков (Kазахстан) 40 4. Мехран Насири (Иран) 39 5. Селахаттин Килисчалаян (Tурция) 39.
70 кг 1. Андрей Квятковскай (Украина) 51 2. Магомед Курбаналиев (Россия) 44 3. Зураб Якобашвили (Грузия) 43 4. Таймураз Салказанов (Словакия) 35 5. Мустафа Кайа (Tурция) 31.
74 кг 1. Франк Чамизо (Италия) 44 2. Бекзод Абдурахманов (Узбекистан) 37 3. Данияр Кайсанов (Kазахстан) 37 4. Мандахнаран Ганзориг (Mонголия) 32 5. Довлетмурад Оразгулижев (Tуркмения) 30.
79 кг 1. Ахмед Гаджимагомедов (Россия) 42 2. Жабраил Гасанов (Aзербайджан) 36 3. Рашид Курбанов (Узбекистан) 31 4. Кайл Дэйк (АХШ) 30 5. Мухаммет Котаноглу (Tурция) 30.
86 кг 1. Фатих Эрдин (Tурция) 76 2. Дэвид Тейлор (АХШ) 62 3. Артур Найфонов (Россия) 46 4. Сандро Аминашвили (Грузия) 41 5. Юриеску Торребланко (Куба) 37.
92 кг 1. Moхаммад Эбрахими (Иран) 51 2. Абдулрашид Садулаев (Россия) 41 3. Сердар Боке (Tурция) 40 4. Ираклий Мцитури (Грузия) 32 5. Анзор Уришев (Россия) 29.
97 кг 1. Владислав Байцаев (Россия) 38 2. Элизбар Одикадзе (Грузия) 37 3. Магомед Ибрагимов (Узбекистан) 36 4. Можтаба Голейж (Иран) 35 5. Мурази Мчедлидзе (Укратна) 31.
125 кг 1. Николас Гвяздовски (АХШ) 48 2. Данила Картавый (Украина) 40 3. Гено Петриашвили (Грузия) 37 4. Мурадин Кушхов (Россия) 35 5. Золбоо Нацагсурен (Mонголия) 35.

Бу күннэргэ UWW саҥа рейтининэн сибээстээн, элбэх киһи мин санаабын истиэн баҕарар. Ону мин, бу рейтинг чопчу күрэхтэһиилэр эрэ түмүктэринэн оҥоһулларын санатабын. Саҥа саҕалааһын хайдах-туох түмүктээх буоларын билигин этэр эрдэ. Хаһан баҕарар саҥа саҕалааһын бэйэтэ итэҕэстээх-быһаҕастаах буолааччы, онон бириэмэ көрдөрөн иһиэ диибин.

Чопчу бэйэм санаабын эттэхпинэ, рейтинг – UWW сыллааҕы календарыгар киллэриллибит күрэхтэһиилэр түмүктэринэн оҥоһуллара дэбигис этэ. Хайаан даҕаны ити үөһээ ааттаммыт күрэхтэһиилэр (аан дойду чемпионата, континеннар чемпионаттара, рейтиннээх турнирдар) эрэ түмүктэринэн буолбакка. Билиҥҥи туругунан рейтиннээх турнирдар кыттааччыларын географиялара уонна онно күүстээх тустууктар кыттыылара – санаа хоту буолбатах. Онон, дьиҥнээх, бүгүҥҥү күҥҥэ баар балаһыанньаны көрдөрбөт дии саныыбын.

Мин рейтинг оҥоһуутунан дьарыктаммытым ыраатта. Билигин рейтини сылга иккитэ оҥоробун: аан дойду чемпионатын иннинэ уонна сыл түмүгүнэн. Бэйэм оҥорбут рейтиммин сиэрдээх дии саныыбын. Рейтинг оҥоһуутун систиэмэтигэр дьон, исписэлиистэр санааларын истэ сатыыбын. Онон саҥаны-сонуну, уларытыылары киллэрэргэ дьулуһабын.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *