Туохтан да хааччахтаммат спорт көрүҥэ

Үһүс саас оскуолатын тэрийиитинэн Комсомол 100 сылыгар аналлаах бэтэрээннэргэ хабылыкка, хаамыскаҕа уонна дартска биирдиилэн уонна хамаанданан бастыыр иһин күрэхтэһиилэрэ онлайн ситиминэн ыытылынна. Онно 8 хамаанда уонна 31 биирдиилээн спортсменнар Амматтан, Уус Алдантан, Мэҥэ Хаҥаластан, Ньурбаттан, Намтан, Бүлүүттэн, Горнайтан уонна Дьокуускайтан кытыннылар.

Түмүк маннык буолла, биирдиилээн бастыыр иһин хабылыкка дьахталларга:

1.Никифорова Наталья Николаевна (Дьокуускай)

2.Аммосова Альбина Афанасьевна (Ньурба)

3.Иванова Лариса Михайловна (Ньурба).

Эр дьоҥҥо:

1.Аргунов Гаврил Дмитриевич (Мэҥэ Хаҥалас)

2.Борисов Василий Васильевич (Мэҥэ Хаҥалас)

3.Иванов Дмитрий Гаврильевич (Дьокуускай).

Хаамыскаҕа дьахталларга:

1.Мартынова Акулина Константиновна (Мэҥэ Хаҥалас)

2.Никифорова Наталья Николаевна (Дьокуускай)

3.Иванова Лариса Михайловна (Ньурба).

Эр дьоҥҥо:

1.Иванов Гаврил Гаврильевич (Бүлүү)

2.Борисов Василий Васильевич (Мэҥэ Хаҥалас)

3.Иванов Дмитрий Гаврильевич (Дьокуускай).

Хамаанданан: Дьокуускай – 1 миэстэ, Мэҥэ Хаҥалас – иккис, Бүлүү – үһүс.

Дартска дьахталларга:

1 — Иванова Яна Дмитриевна (Мэҥэ Хаҥалас, 260 очко),

2 — Новгородова Надежда Николаевна (Нам улууһа, 160 очко),

3 — Дягтерева Прасковья Афанасьевна (Уус Алдан, 140 очко).

Эр дьоҥҥо:

1 — Марков Алексей Алексеевич (Нам улууһа, 240 очко),

2 — Черемкин Виктор Петрович (Мэҥэ Хаҥалас, 220 очко),

3 — Максимов Владимир Афанасьевич (Дьокуускай, 200 очко), Копырин Прокопий Семенович (Уус Алдан, 200 очко) буоллулар.

Саамай кырдьаҕас оонньооччуларынан Намтан 89 саастаах Петров Егор Иванович, 71 саастаах  Лукинова Мария Львовна  ааттаннылар. Онтон саамай ыраахтан кыттыбыт киһинэн Ньурба Күндээдэтиттэн Аммосова Альбина Афангасьевна буолла.

Күрэхтэһии кэнниттэн туох санаалар үөскээтилэр?

Бастакынан, хабылык-хаамыска диэн өбүгэлэрбит остуол оонньууларын күн бүгүнүгэр диэри  илдьэ кэлбиппитигэр бэтэрээннэрбит улахан үтүөлээхтэр.

Иккиһинэн, бу оонньуулар спорт национальнай көрүҥүн быһыытынан Манчаары оонньууларыгар 2017 сылтан бигэтик киирбиттэрэр төрүт үгэспит үйэтийэригэр улахан суолталаах.

Үсүһүнэн, хабылык-хаамыска спорт көрүҥүн быһыытынан саамай киэҥ араҥаны хабар, чөл олоҕу пропагандалыыр көрүҥ буолар.  Оҕо саадын иитиллээччилэриттэн саҕалаан бүдүгүрэ кырдьыбыт кырдьаҕастар да оонньуур көрүҥнэрэ. Ону бу күрэхтэһиигэ Намтан 89 саастаах Петров Егор Иванович, дьахталларга Үөһээ Бүлүүттэн 81 саастаах Винокурова Екатерина Иннокентьевна кыттыбыттара туоһулуур. Петров Егор Иванович хабылыкка 3 бочуоттаах миэстэҕэ таҕыста, көрдөрүүтэ 1 мүн. 07 сөк.! Дьэ хайдаҕый, эдэрдэр да итини ситиспэт көрдөрүүлэрэ. Бу кырдьаҕас биир да күрэхтэһиини көтүппэт, барытыгар кыттар.

Төрдүһүнэн, спорт диэн баран муннукка ытаабыт, эдэр саастарын спорка анаабыт дьон сааһыран да баран, спортивнай тыыннара уостубакка бу көрүҥҥэ көһөн, спортивнай үйэлэрин ситиһиилээхтик уһата сылдьаллар. Ол курдук, Үөһээ Бүлүүттэн Степан Родионов хапсаҕай, көҥүл тустуу маастара хабылыкка-хамыскаҕа киирсэн, ХХ Манчаары оонньууларын чемпиона буолбута. Эдэр сааһыгар боксанан, остуол тенниһинэн уонна да атын көрүҥнэринэн республика таһымыгар күүстээхтик дьарыктана сылдьыбыт Мэҥэ Хаҥаластан Борисов Василий Васильевич бу көрүҥҥэ көһө,  хаһыс да төгүлүн республикаҕа чемпионнаата. Көрдөрүүтэ сөҕүмэр: хабылыга мүнүүтэни кыайбат, хаамыската — 40/1. Ити СӨ спордун маастарын нормативын холкутук аһарар көрдөрүү. Ол курдук эдэр саастарыгар спордунан дьарыгыра сылдьыбыт Гаврил, Дмитрий Ивановтар 70 саастарын аастылар да, хабылыкка-хаамыскаҕа биир да күрэхтэһиини көтүппэккэ оонньууллар уонна 3 иһиттэн түспэттэр.

Бэсиһинэн, пандемия туран, спорт бары көрүҥнэрэ 2 сыл тохтоон турар кэмнэригэр хаамыска-хабылык онлайн ньыманан тохтообокко,  бары былааннаммыт күрэхтэр ыытылла тураллар. Онон бу көрүҥмүт кэм ирдэбилигэр да, хааччахтааһыныгар да  сөп түбэһэн биэрдэ.

Алтыһынан, спорт атын көрүҥүнэн ситиһиилээхтик дьарыктанар эдэр спортсменнар, холобур, Бүлүүттэн көҥүл тустууга спорт маастара Захаров Андрей Андреевич эмиэ бу көрүҥҥэ көһөн, спорт маастарын нуорматын саҥа быраабылаҕа бастакынан толордо, республика 3 төгүллээх абсолютнай чемпиона буолла. Быйыл Өлүөхүмэҕэ ыытыллыбыт Олоҥхо ыһыаҕар хапсаҕайга, хаамыскаҕа-хабылыкка иккиэннэригэр абсолютнай чемпион буолла уонна «Алмазы Анабара» компания сүрүн бирииһин 50 тыһыынча солкуобай сертификаты тутта. Мас тардыһыытыгар Аан Дойду абсолютнай чемпиона Фролкин иннигэр түстэ, онтон аҕыйах хонон баран Манчаары оонньууларыгар, Бэрдьигэстээххэ эмиэ иннин кимиэхэ да биэрбэтэ. Онон бу көрүҥ киһини дэгиттэр эрчийэр да диэххэ сөп эбит.

Түмүкпэр күрэхтэһиини тэрийэн ыыппыт Үһүс саас оскуолатын дириэктэригэр Прядезникова Пелагея Юрьевнаҕа махталбын тириэрдэбин. Бу тэрилтэ бэтэрээннэргэ анаан сылын аайы спорт атын да көрүҥнэригэр күрэхтэһиилэри ыытан, пенсияҕа олорор кырдьаҕастары улаханнык сэргэхситэр. Итиэннэ чөл олоҕу дьыалатынан пропагандалыыр общественнай тэрилтэ буолар!

Хабырыыл УЙБАНЫАП, хабылыксыт-хаамыскаһыт, үлэ, спорт бэтэрээнэ.  

Добавить комментарий

Ваш адрес email не будет опубликован. Обязательные поля помечены *