“Тарскай чемпионата быйыл хаһыс төгүлүн ыытылларый?”

Аллараа Бэстээххэ ыытыллаары турар Н.Н. Тарскай аатынан көҥүл тустууга Саха сирин биирдиилээн уонна хамаанданан бастыыр иһин чемпионата чугаһаатаҕын ахсын, бу түһүлгэ тула кэпсэтии, санаа атастаһыыта күүһүрэн иһэр. Дьон билигин барыта, биллэн турар, хамаандалар састааптарын билэ охсуохтарын баҕараллар, араас сылыктааһыннары-билгэлээһиннэри оҥороллор.

Бэҕэһээ, ытыктыыр киһим – Россия физическэй культураҕа уонна спорка туйгуна, Саха сирин физическэй культураҕа үтүөлээх үлэһитэ, Саха АССР спордун маастара, СР ХХ үйэҕэ спорка лауреата, Мэҥэ Хаҥалас улууһун бочуоттаах гражданина Афанасий Петрович Илларионов телефонунан билсэ сырытта уонна: «Быйыл хаһыс Тарскайый? Эн урут ааҕар этиҥ дии» диэн ыйытыылаах буолла.

Кырдьык, оруннаах ыйытыы. Онуоха мин тута Н.Н. Волков, А.А. Дмитриев саха тустуутун историятын туһунан кинигэлэрин арыйталаан, ааҕан-суоттаан көрдүм. Билэргит курдук, Саха сирин көҥүл тустууга бастакы чемпионата 1956 сыллаахха ыытыллыбыта. Тустуубут историята ити чемпионаттан ааҕыллар. Ааҕан көрдөххө, Аллараа Бэстээххэ ыытыллаары турар чемпионат 65-с эбит. Манна, ковид дьаҥынан сибээстээн 2020, 2021 сс. чемпионаттар ыытыллыбатахтарын санатар тоҕоостоох.

Оттон, Н.Н. Тарскай аатынан чемпионат хаһыс төгүлүн ыытылларый диэтэххэ, эмиэ ааҕан көрдөххө, быйыл 50-с төгүл, үбүлүөйдээх сыла эбит. Ол курдук, саха спордун аҕата, талааннаах салайааччы Николай Николаевич Тарскай аатынан көҥүл тустууга Саха АССР бастакы чемпионата 1963 сыллаахха тэриллибитэ. Ити чемпионат 1981 сылга диэри ыытыллан баран, сымыйа дьыалаҕа олоҕуран, тохтуу сылдьыбыта. Ол кэмҥэ республика чемпионата «Саха АССР Министрдэрин Сэбиэтин бирииһигэр» диэн ыытыллыбыта. Оттон, республика уонна Уус Алдан оройуонун общественностарын туруорсууларынан, Н.Н. Тарскай аата – Саха сирин көҥүл тустууга чемпионатыгар 1990 сыллаахха төннөрүллүбүтэ.

Дьэ, итинтэн ааҕан таһаардахха, 2020, 2021 сс. чемпионаттар ыытыллыбатахтарын үрдүнэн, бу күҥҥэ диэри барыта Н.Н. Тарскай аатынан көҥүл тустууга Саха сирин чемпионата 49-та ыытыллан кэлбит.

Бу, историческай чахчылар туһааннаах эрэ дьоҥҥо буолбакка, бүтүн республика спорка историятыгар киирэр бэлиэ түгэннэр.

Петр Павлов.         

Добавить комментарий

Ваш адрес email не будет опубликован.