Түһүлгэ бастыҥ бөҕөһө – Дьулус Федотов

Эрдэ суруйбуппут курдук, бүгүн Горнай улууһун киинигэр – Россия спордун норуоттар икки ардыларынааҕы кылаастаах маастара, Беларусь Республикатын үтүөлээх маастара, аан дойду чемпиона Герман Контоев 50 сааһыгар уонна бырааттыы Герман, Александр Контоевтар 2001 сыллааҕы аан дойду чемпионатыгар өрөгөйдөрүгэр аналлаах, көҥүл тустууга республикатааҕы турнир итиэннэ Герман Степанович Контоевы 50 сааһынан, бырааттыылар Болгариятааҕы кыайыыларын 20 сылынан үөрүүлээх чиэстээһин ыытылынна.

Чиэстээһиҥҥэ Саха Республикатын физическэй культураҕа уонна спорка министрэ Иннокентий Григорьев, Горнай улууһун баһылыга Никита Андреев, республика спорка тэрилтэлэрин салайааччылара, Мэҥэ Хаҥалас, Чурапчы улуустарын бэрэстэбиитэллэрэ, Горнай улууһун нэһилиэктэрэ, о.д.а. кыттыыны ыллылар, Герман уонна Александр Контоевтарга бочуоттаах ааттары, сыаналаах бэлэхтэри, харчынан бириэмийэни туттардылар. Ол курдук, Никита Андреев бырааттыыларга, үөрүүлээх быһыыга-майгыга «Горнай улууһун сайдыытыгар кылааттарын иһин» диэн анал бэлиэлэри уонна Герман Степановичка баһылык бириэмийэтин – 1,5 мөл. харчыга, оттон Александр Степановичка – 500 тыһ. солкуобайга туоһу суруктары туттарда.

Аныгы сайдыылаах үйэ ньыматынан — Минскэйтэн албан аатырбыт Александр Медведь уонна тренер Валентин Мурзенков эҕэрдэлэрэ экраҥҥа көрдөрүлүннэ.

Манна сыһыары тутан эттэххэ, аҕыйах хонуктааҕыта Саха Республикатын Ил Дархана Айсен Николаев бэйэтин ыйааҕынан – Саха сирин көҥүл тустууга сүүмэрдэммит хамаандатын старшай тренерэ Герман Степанович Контоевка, физическэй культура уонна спорт сайдыытыгар үтүөтүн иһин «Саха Республикатын физическэй культураҕа уонна спорка үтүөлээх үлэһитэ» бочуоттаах ааты иҥэрбитэ.

Түһүлгэҕэ 23-гэр диэри саастаахтар күөн көрүстүлэр. Онуоха турнир «Бастыҥ бөҕөһүнэн» — бастакы ыйааһыҥҥа кыайыылааҕынан тахсыбыт Үөһээ Бүлүү ыччата Дьулустаан Федотов буолла. Киниэхэ аан дойду чемпиона Герман Контоев бэйэтин аатыттан анал мэтээл туттарда.  Итини тэҥэ Егор Захаров — «Бастыҥ техникатын иһин», Вальтер Владимиров — «Эдэр кэскиллээх бөҕөс», Никита Хабаров — «Кыайыыга дьулуурун иһин» диэн спонсордар олохтообут анал бириистэринэн наҕараадаланнылар.

Бырааттыы Контоевтар бириистэригэр республикатааҕы турнир түмүгэ:

57 кг: 1. Дьулус Федотов (ЦСП), 2. Айсен Винокуров (ХИФУ), 3. Любомир Ашеин (ЦСП), 3. Дмитрий Илларионов (ХИФУ).

61 кг: 1. Александр Авелов (ХИФУ), 2. Ньургун Терентьев, 3. Дьулус Седалищев (иккиэн — ЦСП), 3. Гаврил Макаров (ОЭУ).

70 кг: 1. Егор Захаров (ХИФУ), 2. Вальтер Владимиров (ОЭУ), 3. Ньургустан Иванов (ЦСП), 3. Дьулусхан Тотонов (ХИФУ).

79 кг: 1. Буян Цыренов (Бурятия), 2. Петр Захаров (ЦСП), 3. Владимир Юмшанов (АГАТУ), 3. Одун Сергеев (ОЭУ).

+79 кг: 1. Никита Хабаров (ХИФУ), 2. Даниил Иванов, 3. Эдуард Максимов (иккиэн – ОЭУ).

Петр ПАВЛОВ.

Добавить комментарий

Ваш адрес email не будет опубликован.