Спорт министрэ суруналыыстары Бэчээт күнүнэн эҕэрдэлээтэ

Бүгүн Саха Республикатын физическэй культураҕа уонна спорка министерствота Россия Бэчээтин күнүнэн суруналыыстары эҕэрдэлээтэ!

Министр Иннокентий Юрьевич Григорьев уонна кини бастакы солбуйааччыта Леонид Николаевич Спиридонов ааспыт сыл түмүктэрин билиһиннэрдилэр, үүммүт сыл соруктарын туруордулар. Суруналыыстарга өйдөбүнньүк бэлэхтэри туттардылар уонна бырааһынньыктааҕы остуолу тартылар. Өссө ситиһиилээхтик үлэлииргэ ыҥырдылар.

Ааспыт сылга биһиги республикабытыгар барыта 400-тэн тахса күрэхтэһии ыытылынна. Оттон үүммүт сыл эмиэ элбэх күрэхтэһиилээх буолара күүтүллэр. Ол курдук, от ыйын саҥатыгар Уус Алдан улууһун киинигэр Саха Республикатын норуоттарын спортивнай VIII оонньуулара ыытыллыахтара. Бу оонньуулары көрсө сүүмэрдиир күрэхтэһиилэр саҕаланнылар. Тустууктар 80 бастыҥы таллылар.

Бэс ыйыгар Туймаада туонатыгар мас-рестлиҥҥэ аан дойду чемпионата ыытыллара былааннанар.

Сыл биир улахан күрэхтэһиитинэн от ыйыгар Владивосток куоракка “Азия оҕолоро” норуоттар икки ардыларынааҕы спортивнай оонньуулар буолуохтара. Аныгыскы оонньуулар 2024 сылга Дьокуускайга тэриллиэхтэрэ. Маны тэҥэ олунньуга Кытайга буолар Кыһыҥҥы Олимпийскай оонньуулары кэтээн көрүөхпүт.

Ону тэҥэ сайын Бразилияҕа, Сурдлимпиада буолуоҕа. Онно кыттарга суоттанан, биһиги спортсменнарбыт билигин күүстээх бэлэмнэниини бара сылдьаллар. Сотору сүүмэрдиир күрэхтэһиилэргэ кыттыахтара.

Оттон тустуу туһунан эттэххэ, быйыл Дьокуускайга үс норуоттар икки ардыларынааҕы турнир ыытыллара былааннанар. Кулун тутар саҥатыгар олимпийскай чемпион Роман Михайлович Дмитриев кэриэһигэр – эдэрдэргэ, бэс ыйыгар олимпийскай чемпион Павел Павлович Пинигин бирииһигэр – уолаттарга уонна алтынньы саҥатыгар улуу тренер Дмитрий Петрович Коркин кэриэһигэр – эр дьоҥҥо.

Министр эппитинэн, быйыл Р.М. Дмитриев турнира саҥа форматынан ыытыллар эбит. Ол курдук, биирдиилээн ыйааһыннарынан буолбакка, хамаандалар сирэй көрсөр, кубоктыҥы күрэхтэһии. Дьэ, интэриэһинэй түһүлгэни кэтэһэбит. Номнуо Беларусь уонна Узбекистан хамаандалара кытталларын биллэрбиттэр.

Бэлиэ түгэҥҥэ спортивнай суруналыыстар Владислав Коротов, Иван Ушницкай, Александр Васильев-Көрдүгэн, Иннокентий Киренскэй, Петр Павлов, Александр Посельскай, Ньургуйаана Егорова – маннык көрсүһүү тэриллибитигэр министерство салалтатыгар махталларын эттилэр, санааларын үллэһиннилэр. Ааспыт сылга, ыарахан ыарыыттан өлөн туораабыт биир идэлээхтэрбит Георгий Татариновы, Иннокентий Птицыны кэриэстээн аастылар.

“Дьулурҕан”.

Добавить комментарий

Ваш адрес email не будет опубликован.