Ситэ олорботох олоҕун оҕолоро салгыахтара диэн эрэллээхпит

Бу орто дойдуга Дьылҕа хаан ыйааҕа сороххо тыйыс да буолар эбит. Убаастыыр доҕорбут, биир идэлээхпит, СӨ үөрэҕириитин туйгуна А.И. Иванов аатынан Сунтаардааҕы Олимпийскай эрэллэри бэлэмниир оҕо спортивнай оскуолатын үрдүк категориялаах тренерэ, тапталлаах кэргэн, түөрт оҕо амарах аҕата Герасим Романович Данилов соһуччу суорума суолламмыта, бу дьыл алтынньы 29 күнүгэр биир сыла туолла.

СӨ физическэй култуураҕа уонна спорка туйгуна, СӨ үөрэҕирии туйгуна, 2010-2017 сс. кыргыттарга сүүмэрдэммит хамаанда начаалынньыга, ССРС спордун маастара Семен Петрович Черкашин:

-2010 сыл алтынньы ыйга “Азия оҕолоро” норуоттар икки ардыларынааҕы 5-с спортивнай оонньууларга үчүгэй бэлэмнээх тиийэр инниттэн Спорт министиэристибэтин (М.Д. Гуляев) ыйааҕынан кыргыттар тустууларыгар старшай тренеринэн Ким Колодезников (Нерюнгри), хамаанда начаалынньыгынан мин ананабыт. Тустуук кыргыттардаах Нерюнгри, Томпо, Бүлүү, Уус Алдан, Нам, Үөһээ Дьааҥы, Сунтаар улуустарын оскуолаларыгар тирэҕирэн үлэбитин саҕалыыбыт.

Дьэ, мантан саҕалаан Гералыын, кини олоҕун тиһэх күннэригэр диэри биир санаанан салайтаран, олус иллээхтик, өйдөһөн үлэлээбиппит. Барыбыт иннигэр кыыс тустуутун хайдах сайыннарабыт диэн боппуруос турбута. Ол иннинэ, Олимпиада үрүҥ көмүс призёра Александр Иванов бирииһигэр ыытыллар Саха сирин үөрэнээччилэрин спартакиадатыгар кыргыттар тустууларын зачету таһынан киллэрэргэ туруорсубуппут. Онтукайбыт олоххо киириитэ – тренерскэй састаап ситиһиитинэн, инники хардыытынан буолбута.

Дьэ, бу спартакиадаҕа хайабытыттан да ордук Гера тэрийэр дьоҕура арыллыбыта. Сунтаар хамаандата бастакы миэстэҕэ тахсан үөрбүтэ-көппүтэ харахпар бу баарга дылы.

Бу күрэхтэһии түмүгүнэн республика кыргыттарга сүүмэрдэммит хамаандатын састааба торумнанан, 25 кыыһы автобуһунан Уус Алдан Сыырдааҕын оскуолатын базатыгар тиэйэн таһааран Герабынаан 21 хонуктаах үөрэтэр-эрчийэр түһүмэҕи тэрийбиппит.

Ити курдук Нерюнгри, Уус Алдан, Нам, Томпо, Сунтаар улуустарынан эрчиллиилэри тэрийэрбит, күрэхтэһэрбит. Сунтаардааҕы РССШОР базатыгар эрчиллэр кэммитигэр Бордоҥҥо А.Уаров бирииһигэр сүүмэрдэммит хамаанда кыргыттарын туһуннаран, олохтоох нэһилиэнньэ биһирэбилин ылбыппыт, “кыргыттар да дьэ тусталлар эбит” дэппиппит.

Соҕуруу куораттарынан эрчиллэн, күрэхтэһэн – иитиллээччилэрбит бэйэлэрин кыахтарыгар эрэнэллэрин ситиспиппит. Бу маннык тэрээһиннэргэ Герасим Романович биир бастакынан кэлбитэ эрэ баар буолааччы.

Россия таһымнаах элбэх күрэхтэһиилэргэ бииргэ сылдьарбыт, Герабытын өссө судьуйалатар этибит. Чебоксарыга, Россия күрэхтэһиитигэр кылаабынай судьуйа быһаарыытынан финальнай хапсыһыыларга арбитрынан үлэлээбитэ, соругу чиэстээхтик толорон анал бирииһинэн наҕараадаламмыта.

Ити курдук ситиһиилээхтик үлэлээн, “Азия оҕолоругар” 2012 сыллаахха – 15, 2016 сыллаахха – 9 мэтээли дойдубутугар илдьэ хаалбыппыт.

Гера биир, киһиттэн ураты хаачыстыбалаах, ханнык да коллективка түргэнник биир тылы булара. Спорка буоларын курдук үгүс мөккүөрдээх түгэннэр биһиэхэ да буолуталыыр этилэр. Ыга кыыһырсыы да түгэннэрин биһиги Герабыт сатаан мүлүрүтэр, сымнатар талааннааҕа. Бу сыллар тухары кини ыга кыыһыра сылдьарын хаһан да көрбөтөҕүм.

Өссө биир уратыта, төрөппүт оҕолорун Уйбаанчыгы, Романы, кыыһын Герданы олох кыра эрдэхтэриттэн тустуу абылаҥар иитиитэ буолар. Хайа да оҕоттон чорбоппокко, өссө ордук ирдэбиллээхтик эрчийэригэр ымсыыра саныырбыт. Рома саастыылаахтарыгар республика призера, Аммаҕа ыытыллыбыт спортивнай оонньуулар иккис миэстэлээҕэ. Оттон Герда Россия үһүс призера, эһиил Олимпийскай эрэл училищетын бүтэрэн, аҕатын баҕа санаатын салгыа диэн эрэнэбит.

Амма оонньууларын сабыллыытыгар, Бороҕоҥҥо ыытыллыахтаах спортивнай оонньууларга дьахталлар тустууларын киллэттэрэр баҕа санаалаахпын олус да үөрэн, туох кыах баарынан өйүүргэ бэлэмин тута биллэрэн, өр да өр кэпсэтэн арахсыбыппытын оччолорго хантан билиэхпитий, бу бүтэһик илэ кэпсэтиибит буоларын.

Герасим Романович үлэлээбит үлэтин, санаабыт ыра санаатын толорон – үлэлээбит коллектива кини аатын үйэтитэргэ үлэлэһиэ диэн эрэниллэр.

СӨ уонна РФ үтүөлээх тренерэ, СӨ дьахталларга хамаандатын старшай тренерэ, РФ спордун маастара Ким Кимович Колодезников:

-Герасим Романовиһы сэмэй, таһаарыылаах, эппиэтинэстээх тренеринэн, эрэллээх доҕор-атас быһыытынан билинэр этибит. Кини салалтатынан Сунтаар улууһун тустуук кыргыттара – Саха сирин, Уһук Илин, Россия күрэхтэһиилэригэр ситиһиилээхтик кытталлара. Ол курдук Намыына Прокопьева, Маша Игнатьева, Виолетта Черноградская, Герда Данилова – Уһук Илин федеральнай уокурук чемпионнарынан, призердарынан буолбуттара.

Намыына Прокопьева – Россия үөрэнээччилэрин спартакиадатын үһүс призера (2015), төрөппүт кыыһа Герда Данилова – Россия оскуола саастаах кыргыттарын үһүс призерунан буолбута.

Үлэбит саамай тахсыылаах кэминэн 2013 сылы этиэххэ сөп. Россия үөрэнээччилэрин спартакиадатыгар бэлэмнэнэр түһүмэх Уус Алдан Лөгөй орто оскуолатын базатыгар буолбута. Онно биир ый бэлэмнэнэн баран, Пенза куоракка күрэхтэһиигэ Саха сирин уолаттарга уонна кыргыттарга хамаандата уопсай түмүккэ Россияҕа бастакы миэстэни ылбыта. Бу түһүмэх кэмигэр Гера – ОФП, СФП, кросс дьарыктарыгар эппиэттээх тренеринэн үлэлээбитэ, сөптөөх ноҕуруусканы, хайысханы, дьулууру биэрбитэ.

Томпо улууһун, Сайдыы оҕо спортивнай оскуолатын дириэктэрэ, тренерэ, Россия физическэй култуураҕа уонна спорка туйгуна, СӨ физическэй култуураҕа уонна спорка үтүөлээх үлэһитэ, ССРС спордун маастара Михаил Дмитриевич Аммосов:

-Гера биһиги бастакы билсиһиибит 2011 сыллаахха Уус Алдаҥҥа, Сыырдаахха тэриллибит эрчиллии кэмигэр буолбута. Томпоттон икки кыыһым “Азия оҕолоро” оонньууларга кыттар хамаандаҕа киирэн, бэлэмнэнии бастакы түһүмэҕэр кыттыбыта.

Томпоҕо Новай бөһүөлэккэ ДЮСШ интернатыгар олорон икки нэдиэлэ эрчиллэн, ыытыллар күрэхтэһиигэ республика сүүмэрдэммит хамаандатын кытыннарыыга Герасим Романович активнай кыттыыны ылбыта. Эрчийбит кыргыттара чемпионнаан, призердаан, ситиһиилээхтик тустубуттара.

Гера бу орто дойдуттан суох буолбута биир сыл буолла. Бэйэм ааппыттан дириҥ кутурҕаммын биллэрэбин. Кини үөрэ-көтө сылдьара, иитиллээччилэригэр сыһыана, тренер быһыытынан талаана биһиэхэ холобур буолуоҕа.

Бүлүүттэн оҕо спортивнай оскуолатын тренерэ, СӨ үөрэҕириитин туйгуна Дмитрий Винокуров:

-Мин Герасим Романовиһы 2010 сыллаахха Нерюнгри куоракка Уһук Илин регион күрэхтэһиитигэр билсибитим, кини Сунтаар спортивнай оскуолатын опыттаах тренерэ этэ.

Ити кэмтэн ыла 2012, 2016 сс. “Азия оҕолоро” оонньууга бэлэмнэнэн, бииргэ үлэлээбиппит. Кыайыы үөрүүтүн, хотторуу хомолтотун бииргэ билбиппит.

Гераны тренер, педагог, иитээччи, судьуйа быһыытынан Саха сирин кыргыттарга хамаандатын биир чаҕылхай тренеринэн республика, Россия таһымыгар үрдүктүк сыаналыыллара. Былырыын эмискэ суох буолбутугар бары да соһуйан, хараастан хаалбыппыт. Гера ситэ олорботох олоҕун оҕолоро салгыахтара диэн эрэллээхпин.

Нерюнгри куорат көҥүл тустууга тренерэ Баир Булатович Цыденов:

-С Герасимом мы познакомились на первенстве РС (Я) по вольной борьбе среди девочек в 2011 году. Он тогда работал на соревнованиях арбитром. После этого знакомства мы очень плотно стали общаться, стали хорошими друзьями и приятелями. Постоянно встречались на соревнованиях. Он был очень добрым, общительным и надежным другом. С ним можно было пошутить, поговорить на любые темы. В нашей команде все любили и уважали Герасима. Очень любил свою семью, своих детей. Герасим очень рано ушел от нас. Но все равно, думаю, он смотрит и радуется с небес на нас и переживает за своих родных и друзей.

Бэчээккэ бэлэмнээтэ Семен ЧЕРКАШИН.

 

Добавить комментарий

Ваш адрес email не будет опубликован. Обязательные поля помечены *