Сахамин Степановы билэҕит дуо?

Бэҕэһээ Украинаттан куһаҕан сурах кэллэ. Биир дойдулаахпыт, көҥүл тустууга ССРС спордун маастара Сахамин Степанов сырдык тыына быстыбытын туһунан. Кини 1971 сыллаахха ыам ыйын 21 күнүгэр Үөһээ Бүлүү оройуонугар төрөөбүтэ. Сахамин Степанов – саха бөҕөстөрүттэн бастакынан бундеслигаҕа ситиһиилээхтик кыттыбыта. Санатан эттэххэ, билигин Владимир Егоров уонна Михаил Иванов Германия кулуубунан чемпионатыгар эриэ-дэхси көрдөрүүлээхтэр.

Сахамин олох эдэригэр Украинаҕа барбыта. Спордунан дьарыгын салҕаабыта. Онон биһиги кини олоҕун, тустууга кэнники туох көрдөрүүлээҕин, ситиһиилээҕин туһунан билбэппит кэриэтэ.

Мин кини туһунан сэҥээрбитим ыраатта. Өссө 2015 сыллаахха биир дойдулааҕа, үс тустуу маастара Андрей Александровтан, уһун кэмҥэ Киевкэ олорбут ССРС спордун маастара Михаил Ноговицынтан, эмиэ Украинаҕа үөрэнэ сылдьыбыт норуоттар икки ардыларынааҕы кылаастаах спорт маастара Артур Константиновтан кылгастык Сахамин туһунан ыйыталаһан, тугу бэлиэтэммиппин билиһиннэрэрбин көҥүллээҥ.

Сахамин Степанов Үөһээ Бүлүү Кырыкый нэһилиэгиттэн төрүттээх. Биллиилээх хапсаҕайдьыт Степан Степанов — Түргэн төрөппүт уола. Көҥүл тустууга бастакы тренерэ Уус Алдантан сыдьааннаах, Кырыкый оскуолатын производствоҕа уруогун учуутала, общественнай тренер Дмитрий Дмитриевич Стручков буолар. Онтон оройуоннааҕы оҕо спортивнай оскуолатыгар ССРС спордун маастара Валерий Николаевич Семенов салалтатынан дьарыктаммыт. Михаил Васильевич салгыы кэпсээбитинэн, Сахамин 1986 сыллаахха Украинаҕа үөрэнэ кэлбит. Украинка диэн куоракка, онно СПТУ-га үөрэммит уонна тренер Олег Блиновка дьарыктаммыт. 48 киилэҕэ Украина эдэрдэргэ күрэхтэһиитигэр призердаабыт. Кэлин олохтоох кыыһы кэргэн ылбыт, оҕоломмут. Онтон 90-с сыллар саҕаланыыларыгар Блинов этиитинэн Германияҕа, бундеслига күрэхтэһиитигэр кыттыбыт.

Бундеслигаҕа кыттарын саҕана 48 уонна 52 кг ыйааһыннарга көҥүл уонна гректии-римнии тустууларга тустубут. Артур Константинович ахтыбытынан, Германияҕа ситиһиилээхтик кыттан, олоҕун син оҥосто сатаабыт, квартира-массыына ылыммыт. Кини манна, Саха сиригэр кэлиитин саҕана Сахамин саҥа Украинаҕа тиийбит. Онон Сахамины – оччолорго Украинаҕа үөрэммит Иван Друзьянов, Николай Дьячковскай үчүгэйдик билэр буолуохтаахтар диэбитэ.

Сахамин Степанов диэн аат – Саха сирин спордугар биллэр аат. Ол курдук, итинник ааттаах-суоллаах хапсаҕайдьыт да, боксёр даҕаны бааллар. Кинилэр, биһиги ахтар Сахамин Степановпыт аймахтара буолаллар, эмиэ Үөһээ Бүлүүттэн төрүттээхтэр.

2017 сыллаахха Киевкэ, Украина биллиилээх тустууктарын уонна тренердэрин бириистэригэр көҥүл тустууга норуоттар икки ардыларынааҕы турнирыгар бара сылдьыбытым. Онно Сахамин Степановы көрсөр санаалаах этим да, кыаллыбатаҕа. Билэр дьоно: ыҥырдыбыт, эттибит, ити кэлиэ, бу кэлиэ диэбиттэрэ да – кэлбэтэҕэ.

Тренерэ Олег Блинову көрсүбүтүм, кини миэхэ Лейпциг куорат тустууга кулуубун туһунан буклеты бэлэхтээбитэ. Онно кулууп састаабыгар Сахамин Степанов баара. Хаартыската эмиэ бэчээттэммит этэ. Кини 1991-1992 сылларга бундеслига күрэхтэһиитигэр Лейпциг кулуубун ситиһиилээхтик көмүскээбит. Кулууп биир күүстээх тустууга эбит. Кэлин 1995-1996 сс. бундеслигаҕа эмиэ кыттыбыт. Украинаттан тренер О.Блинов салайааччылаах хаһыа да эбиттэр. Холобур, Александр Блинов, Олег Бурбач, Олег Войчицкай.

Дьэ, атын дойдуга олохсуйбут саха биир тустууга суох буолбутун истэн баран, кинини кэриэстээн сырдатыыбыт итинник. Бука диэн, Сахамин Степанов туһунан ким тугу билэрин ахтаргыт буоллар. Мин эрэ буолбакка, саха тустууну таптааччылара кини спорка көрдөрүүлэрин, ситиһиилэрин сиһилии билиэхпитин баҕарабыт.

Петр ПАВЛОВ.        

Добавить комментарий

Ваш адрес email не будет опубликован.