Саҥа спортивнай көстүүм бааттаах, байанайдаах буоллун!

Бүгүн, “Триумф” Спорка бэлэмнэнии киинигэр республика көҥүл тустууга сүүмэрдэммит хамаандатын спортсменнарыгар уонна тренердэригэр “Таҥас” фирма саҥа спортивнай форматын үөрүүлээхтик туттарыыта буолла. Киһи кэрэхсиирэ диэн, маннык бэлиэ түгэн үтүө үгэскэ кубулуйда.

Билигин “Триумфка” тустууктар үөрэтэр-эрчийэр түмсүүлэрэ буола турар. Онно сөп түбэһиннэрэн, киэһээҥҥи дьарык иннинэ кылаабынай тренер Александр Оконешников хамаандатынан, спортсменнар кэккэлээн турбуттарын кэннэ, сүүмэрдэммит хамаандаҕа киирэр тустууктары уонна тренердэри биирдии-биирдии, испииһэк быһыытынан ыҥыран таһааран, пакеттаах саҥа спортивнай көстүүмнэри үөрүүлээх быһыыга-майгыга туттартаатылар.

Түгэнинэн туһанан, “Таҥас” фирма салайааччыта Александр Максимовтан, бэйэтин санаатын үллэстэригэр көрдөстүм.

Биһиги төһө кыалларынан, спортсменнарбытыгар көмөлөһөр, өйүүр санаалаахпыт. Тустуук уолаттарбытыгар өссө да улахан ситиһиилэри баҕарабыт. Кинилэргэ итэҕэйэбит, эрэнэбит. Ити формаларга биһиги үгэс быһыытынан бэйэбит сахалыы харысхалларбытын туттабыт. Бэйэбит стилбит баар буолбут курдук саныыбыт. Маннык, боксёрдарга эмиэ экипировка биэрээччибит. Спартакиадаларга улуус сүүмэрдэммит хамаандаларыгар, үлэ коллективтарыгар эҥин спортивнай форманы сакаас быһыытынан оҥорон биэрэбит. Оттон бу тустууктарга уонна боксёрдарга бэйэбит баҕа өртүнэн көмөлөһөбүт.

Санатан эттэххэ, “Таҥас” фирма формаларын “Ураса молл” ТЦ (2 этээскэ) уонна «Туймаада» ТРК (5 этээскэ) баар фирменнай маҕаһыыннарыттан атыылаһыаххытын сөп.

Саҥа спортивнай көстүүм спортсменнарбытыгар бааттаах, байанайдаах буоллун! Ситиһии сиэттиһэн истин!

Петр ПАВЛОВ.

Ааптар хаартыскаҕа түһэриитэ.       

Добавить комментарий

Ваш адрес email не будет опубликован. Обязательные поля помечены *