Сүүмэрдиир күрэхтэһиилэр хаһан, ханна буолуохтарай?

2022 сыл биһиги республикабыт олоҕор биир сүрүн тэрээһининэн – аны сайын Бороҕоҥҥо ыытыллыахтаах Саха сирин норуоттарын VIII Спортивнай оонньуулара буолуохтара. Оонньуулар, балаһыанньаҕа олоҕуран үс түһүмэҕинэн ыытыллаллара былааннанар. Ол курдук, бастакы түһүмэх улуустар, куораттар иһинээҕи сүүмэрдиир күрэхтэһиилэр, иккис түһүмэх – республикатааҕы сүүмэрдиир күрэхтэһиилэр, дьэ уонна үһүс, бүтэһиктээх түһүмэх – Бороҕоҥҥо түмсэн күүстээхтэри быһаарсыы.

Республикатааҕы сүүмэрдиир (квалификационнай) күрэхтэһиилэр хаһан, ханна буолаллара былааннанан турар. Ол быһыытынан, тохсунньу 7-9 күннэригэр Н.Н. Тарскай кэриэһигэр көҥүл тустууга Саха Республикатын чемпионата ыытыллыаҕа. Чемпионаты Аллараа Бэстээххэ саҥа үлэҕэ киллэриллибит Т.А. Пинегин аатынан спортивнай комплекска бэлэмнээн уонна тэрийэн ыытарга Мэҥэ Хаҥалас улууһун дьаһалтата сайаапка түһэрбитэ.

Ити курдук, олунньуга мини-футболга республика чемпионата Ленскэйгэ, 64 харахтаах дуобакка хамаанданан чемпионат уонна А.Петров кэриэһигэр СР боксаҕа чемпионата – Дьокуускайга буолаллара былааннанна.

Кулун тутарга көҥүл тустууга республикатааҕы таһымнаах турнир Бэрдьигэстээххэ (Горнай), саахымакка хамаанданан чемпионат, И.И. Кулачиков аатынан СР гиирэҕэ чемпионата, волейболга республика 2-с лигатын дьахталларга уонна эр дьоҥҥо чемпионаттара, мини-футболга Саха сирин 2-с лигатын чемпионата – Дьокуускайга, волейболга республика 1-кы лигатын дьахталларга уонна эр дьоҥҥо чемпионаттара – Чурапчыга, фитнес-аэробикаҕа СР чемпионата – Намҥа ыытыллыахтара.

Муус устарга Дьокуускай куорат көҥүл тустууга чемпионата уонна остуол тенниһигэр Саха сирин чемпионата буолуохтара.

Ыам ыйыгар баскетболга (3х3) Саха Республикатын чемпионата – Дьокуускайга ыытыллыа.

Итиэннэ бэс ыйыгар оҕунан ытыыга, чэпчэки атлетикаҕа, спортиҥҥа республика чемпионаттара, баскетболга уонна чэпчэки атлетикаҕа квалификационнай турнирдар бары Дьокуускайга ыытыллаллара былааҥҥа турар.

Дьэ, бу ааттаммыт чемпионаттар, күрэхтэһиилэр, турнирдар түмүктэринэн бастыҥнар талыллан, сүүмэрдэнэн, аны сайын Бороҕоҥҥо ыытыллар Саха сирин норуоттарын VIII Спортивнай оонньууларыгар күөн көрсүөхтэрэ.

«Дьулурҕан».     

Добавить комментарий

Ваш адрес email не будет опубликован.