Олимпийскай чемпионнар тоҕо намыһахтык сыаналаннылар?

Тустуу аан дойдутааҕы түмсүүтэ (UWW) 2021 сыл түмүгүнэн ыйааһыннарынан бастыҥнары быһаарда. Итиэннэ рейтинг быһыытынан бастыҥ бөҕөстөргө харчынан бириэмийэни олохтоото. Ол курдук, 1-кы рейтиннээх тустуук 10, иккис – 7 уонна үһүс – 3 тыһыынча долларынан бэлиэтэниэҕэ.

Бу, саҥа сүүрээн диэххэ сөп. Урукку сылларга – спортивнай тустуу үс көрүҥэр (гректии-римнии, көҥүл уонна дьахталлар тустуулара) үстүү чулууну талаллара уонна бириэмийэлииллэрэ. Онтон бу сырыыга үс көрүҥҥэ ыйааһыннарынан 3-түү бастыҥ көрдөрүүлээх бөҕөстөргө бириэмийэ олохтоноро быһаарылынна.

Санатан эттэххэ, рейтинг очколара – Олимпийскай оонньуу, аан дойду уонна континеннар чемпионаттарын итиэннэ рейтиннээх турнирдар түмүктэринэн ааҕыллар.

Көҥүл тустууга 2021 сыл түмүгүнэн рейтинг маннык буолла:  

57 кг

  1. Томас Гилман (АХШ) – 86 очко
  2. Завур Угуев (Россия) – 68
  3. Рави Кумар (Индия) – 64.

61 кг

  1. Абасгаджи Магомедов (Россия) – 80 очко
  2. Дейтон Фикс (АХШ) – 40
  3. Адлан Аскаров (Казахстан) – 38.

65 кг

1.Такуто Отогуро (Япония) – 88 очко

  1. Загир Шахиев (Россия) – 80
  2. Баджранг Пуния (Индия) – 58.

70 кг

  1. Магомедмурад Гаджиев (Польша) – 60 очко
  2. Алек Панталео (АХШ) – 46
  3. Эрназар Акматалиев (Кыргызстан) – 40.

74 кг

  1. Кайл Дэйк (АХШ) – 106 очко
  2. Заурбек Сидаков (Россия) – 68
  3. Франк Чамизо (Италия) – 66.

79 кг

  1. Джордан Барроуз (АХШ) – 60 очко
  2. Ника Кенчадзе (Грузия) – 41
  3. Мохаммад Ноходи (Иран) – 40.

86 кг

  1. Дэвид Тейлор (АХШ) – 126 очко
  2. Хасан Яздани (Иран) – 124
  3. Артур Найфонов (Россия) – 71 очко.

92 кг

  1. Камран Гасемпур (Иран) – 76 очко
  2. Магомед Курбанов (Россия) – 58
  3. Осман Нурмагомедов (Азербайджан) – 39.

97 кг

  1. Абдулрашид Садулаев (Россия) – 128 очко
  2. Кайл Снайдер (АХШ) – 102
  3. Алишер Ергали (Казахстан) – 68.

125 кг

  1. Гено Петриашвили (Грузия) – 98 очко
  2. Амир Заре (Иран) – 98

3.Таха Акгуль (Турция) – 69.

Бастаан рейтини көрөөт, олимпийскай чемпионнар тоҕо намыһахтык сыаналаннылар дии санаабытым. Онтукам, рейтинг UWW иһинэн ылыллыбыт балаһыанньаҕа олоҕуран оҥоһуллубутун билэн баран биирдэ уоскуйдум. Манна биири этиэххэ сөп. Тустууга рейтиннээх турнирдар ыытыллар буолбуттара аҕыйах сыл буолла. Ол эрээри, календарнай былааннара табыллыбат аатыран, кэккэ дойдулар, сорох күүстээх тустууктар – рейтиннээх турнирдары аанньа аахайбаттар. Быйыл, бириэмийэ олохтоммутун кэнниттэн дьэ, инникитин ылсаллар ини?

Дьиҥэ, рейтиннээх турнирдар ыытыллаллара саамай сөп. Ити билиҥҥи кэм ирдэбилэ. Быраабылатын быһыытынан сыл устата 4-5 рейтиннээх турнир ыытыллан баран, сыл түмүктэниитэ ахсынньы ыйга финальнай күрэхтэһии тэриллиэхтээх этэ да, ол тоҕо эрэ кыаллыбакка сылдьар. Дьэ, ол финальнай турнир кыайыылаахтара эрэ улахан бириэмийэнэн наҕараадаланыахтаахтар уонна сыл түмүгүнэн бастыҥнарынан ааҕыллыахтаахтар. Онтон бу сырыыга UWW быһа суолу тутуста, этэргэ дылы, улаханнык түбүгүрбэккэ, күүстээхтэри үрдүттэн рейтинг ааҕыытынан быһаарда.

Бу рейтиҥҥэ саха тустууга иитиллээччилэриттэн Арыйаан Тюрин (Беларусь) 57 киилэҕэ 7-с, Эдуард Григорьев (Польша) 61 киилэҕэ 15-с, Айаал Лазарев (Кыргызстан) 125 кг ыйааһыҥҥа 16-с миэстэлэри ыллылар.

Петр Павлов.

 

Добавить комментарий

Ваш адрес email не будет опубликован.