Олимпиецтар бэлэмнэниини Алдаҥҥа бараллар

Эһиил олунньуга Пекиҥҥэ (Кытай) ыытыллыахтаах XXIV Кыһыҥҥы олимпийскай оонньуулар иннилэринэ Россия хайыһарга сүүмэрдэммит хамаандата Алданнааҕы, олимпийскай эрэллэри бэлэмниир спортивнай оскуола трассатыгар үөрэтэр-эрчийэр түмсүү үгэнигэр сылдьар.

Хамаанда састаабыгар 18 спортсмен баар. Кинилэр ортолоругар аан дойду чемпионатын эстафетаҕа икки төгүллээх үрүҥ көмүс призера, 2018 сыллааҕы Олимпиада үрүҥ көмүс уонна боруонса мэтээллэрин хаһаайына, спорт үтүөлээх маастара Андрей Ларьков; аан дойду 2021 с. чемпионатын эстафетаҕа иккис миэстэлээҕэ, 2019 с. кыһыҥҥы Универсиада үс төгүллээх кыайыылааҕа, эдэрдэргэ аан дойду күрэхтэһиитин икки төгүллээх чемпиона Иван Якумишкин; Россия чемпиона, аан дойду эдэрдэргэ күрэхтэһиитин кыайыылааҕа, норуоттар икки ардыларынааҕы кылаастаах спорт маастара Сергей Ардашев уо.д.а. биллиилээх хайыһардьыттар бааллар.

Үөрэтэр-эрчийэр түмсүү Россия сүүмэрдэммит хамаандатын старшай тренерэ, Россия үтүөлээх тренерэ Олег Перевозчиков салалтатынан ыытылла турар.

Перевозчиков бөлөҕүн кытта биһиги уолбут Александр Клуген (Ленскэй) бииргэ дьарыктанар. Ону тэҥэ үөрэтэр-эрчиллэр түмсүүгэ тренердэр Виктор Леонидович Васильев, Альберт Талгатович Сафаров иитиллээччилэрэ эмиэ эрчиллэ сылдьаллар. Биир тылынан, Саха сириттэн элбэх оҕо дьарыктана сылдьара киһини үөрдэр, — диир, Алданнааҕы хайыһар спортивнай базатын дириэктэрин солбуйааччы Михаил Чугунов.

Бүгүн, алтынньы 28 күнүгэр үөрэтэр-эрчийэр түмсүү кэмигэр хайыһардьыттар хонтуруоллуур сүүрүүлэрэ ыытылынна. Онно эр дьоҥҥо 43, дьахталларга 6 спортсмен кыттыыны ылла.

Ол курдук эр дьон көҥүл ньыманан 12,9 км сүүрүүлэригэр Иван Якумишкин (Тюменьскай уобалас) – 0:31:16, оттон дьахталлар 5 км сырсыыларыгар Елизавета Шалабода (Приморскай кыраай) – 0:13:44 бастыҥ бириэмэни көрдөрдүлэр.

Хонтуруоллуур сүүрүүлэр 6-лыы бастыҥ көрдөрүүлээхтэрэ:

Эр дьоҥҥо – 1. Иван Якумишкин (Тюмень, 0:31:16), 2. Эдуард Латыпов (0:31:58), 3. Даниил Серохвостов (0:32:02), 4. Андрей Мельниченко (Красноярскай, 0:32:07), 5. Кирилл Киливнюк (Красноярскай, 0:32:19), 6. Илья Порошкин (Коми, 0:32:29).

Саха сирин хайыһардьыттарыттан Александр Филиппов 22-с, Ярослав Котлярчук 24-с, Дмитрий Егоров 27-с, Никита Шестаков 28-с, Антон Дегесов 33-с бириэмэни көрдөрдүлэр.

Дьахталларга – 1. Елизавета Шалабода (Приморскай, 0:13:44), 2. Ольга Кучерук (Тюмень, 0:14:43), 3. Арина Перевозчикова (Удмуртия, 0:15:16), 4. Дарья Радионова (Саха сирэ, 0:15:25), 5. Евгения Сергеева (Саха сирэ, 0:15:37), 6. Людмила Бронникова (Саха сирэ, 0:17:18).

Петр ПАВЛОВ.

Николай ЕНОХОВ хаартыскаҕа түһэриитигэр: кыайыылаах Иван Якумишкин.    

Добавить комментарий

Ваш адрес email не будет опубликован. Обязательные поля помечены *