Николай Николаевич, күн сирин көрбүт кэрэ бэлиэ күҥҥүнэн!

Бүгүн, Уус Алдан улууһун уонна Чэриктэй нэһилиэгин бочуоттаах гражданина, Д.П. Коркин аатынан Саха Республикатын Государственнай бириэмийэтин лауреата Николай Николаевич Рожин төрөөбүт күнэ. Кини 72 сааһын туолла. Эҕэрдэлиибит!

Н.Н. Рожин – педагогическай наука кандидата, Саха Республикатын үтүөлээх тренерэ, Россия физическэй культуратын уонна спордун туйгуна, көҥүл тустууга ССРС, хапсаҕайга Саха АССР спордун маастара, норуоттар икки ардыларынааҕы категориялаах судьуйа, көҥүл тустууга республика түөрт төгүллээх чемпиона, бэтэрээн-маастардарга аан дойду чемпионатын кыайыылааҕа.

Николай Николаевич көҕүлээһининэн 2001 с. М.К. Аммосов аатынан Саха государственнай университетын иһинэн Физическэй культура институтугар спортивнай тустуу кафедрата тэриллибитэ. 2002-2004 сс. үөрэх дьылыгар СГУ тустууга хамаандата Н.Н. Рожин салалтатынан Российскай Федерация үрдүк үөрэҕин кыһаларын ортолоругар чемпионнаабыта.

Тренер быһыытынан 2001 с. аан дойду чемпионун аатын сүкпүт, Олимпийскай оонньууларга төрдүс миэстэни ылбыт Герман Контоевы, норуоттар икки ардыларынааҕы кылаастаах спорт маастара, 1998 с. Россия сүүмэрдэммит хамаандатын састаабыгар Стильватер к. (АХШ) Аан дойду Кубогын ылбыт Андрей Яковлевы, Советскай Союз уолаттарга уонна эдэрдэргэ күрэхтэһиилэрин иккис призера, спорт маастара Андрей Христофоровы, Россия чемпиона уонна призера, норуоттар икки ардыларынааҕы кылаастаах спорт маастара Екатерина Мельникованы, Европа чемпионатын боруонса призера, Бундеслига (Германия) хас даҕаны төгүллээх чемпиона Владимир Егоровы уо.д.а. элбэх күүстээх бөҕөстөрү иитэн-такайан таһаарбыта.

Билигин Н.Н. Рожин көҥүл тустуу курдук спорт кэрэхсэбиллээх көрүҥэр кыргыттары эрчийэр. Кини үөрэнээччилэрэ Россия уонна норуоттар икки ардыларынааҕы турнирдарга өрүү үрдүк көрдөрүүлэри ситиһэллэр.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *