ММА спорт дуо?

«ММА – бои без правил» диэни Россияҕа кэнники интернетинэн этистилэр даҕаны, ыҥыртаан ылан охсуһуннарар буоллулар.

Биһиги кыра кылааска үөрэнэ сырыттахпытына, улахан кылаас уолаттара охсуһуннарар этилэр. Бастаан киксэрэллэр: «Бу уолу кытта охсуһаҕын дуо?», — диэн.

«Суох ини, туох буруйугар мин кинилиин охсуһуохтаахпытый?» — итинник диэн буолумматаҕыҥ үрдүнэн, син биир туох эмит сылтах булаллар.

«Эн бу уолу кыратык охсон көр эрэ», «Эн тоҕо тураҕын эйигин оҕуста дии»…

«Пахай, кыыс курдук эбит. Куттанан турар» эҥин дииллэр. Дьэ, онуоха кыыс буолумаары уолаттар охсуһар этилэр. Эбэтэр переменэ кэмигэр, кимнээх эрэ мөккүстүлэр да, «тахсан быһаарсыҥ!» диэн охсуһуннараллар этилэр. Ол эрээри, ким эмит оҕунна да туруорар этилэр. Билигин клеткэ иһигэр киһини баттаан сытан сирэйин ибили биликтииллэр. Нуучча «лежащего не бьют » диэн өһүн хоһооно умнуллубут.

Быраабылата суох киирсиигэ, кыргыттары тиийэ охсуһуннараллар. Кырасаабысса кыргыттар киирсэн бүтүүлэригэр, сирэйдэрэ-харахтара бүттэтэ суох көҕөрөн, көрүөхтэн сүөргү дьүһүннэнэллэр.

“Бои без правил” киирсээччилэр интернетинэн этиһэллэр, араас тылынан бэйэлэрин түһэрсэллэр. Соруйан киксиһиннэртээччилэр да бааллар. Устунан тэрийээччилэр аҕалан клеткэ иһигэр хаайан, охсуһуннараллар. Урут омуктар ыттары, кыыллары охсуһуннаран сатыылларын көрөн сөҕөр этибит.

Билигин улахан куораттарга мээнэ дьону тутан ылан, эмиэ охсуһуннарар идэлэннилэр. Кумах куттулар, өтүүнэн күрүө тартылар да, ринга бэлэм. Бииринэн эмиэ мээнэ илиилэрэ кыһыйан, уулуссаҕа итирик дьону, кырдьаҕас да дьону охсон холонуохтааҕар, рингэҕэ бэйэтин көрдөрдүҥ диэтэхтэрэ.

Тэрийээччилэр таҥастарыгар «Хочешь драться? Дерись в ринге» диэн суруктаахтар.

Россия ММА-тыгар охсуһааччылар интернетинэн этиһэ сатаан баран, омугунан арахсан да охсуспут түгэннэрэ эмиэ баар.

Бу оннугар бокса, кикбоксинг, тустуу ордук эбит.

Интернетинэн үксүн блогердар итиннигинэн дьарыктанан саатыыллар. Араас видеолары оҥорон ыытан харчы оҥостоллор. Үксүн дагестаннар баппат айдааннаахтар. Магомед Исмаилов Минеевка хотторон баран бэйэтэ үөхсүбүтүн, түһэрбитин-холуннарбытын устан ыытар. Хотторбут абатын-сататын аһаҕастык этэр. Онуоха куйаар ситимигэр суруппут дьоно (подписчиктар) кыһытаары араас киксиһиннэрэр тыллары суруйаллар. Ол аайы илбистээх итии хаана көхсүгэр көймөстөр.

Ол да буоллар, нууччаларга киэҥ көҕүстээх үтүө санаалаах бөҕөстөр бааллар. Федор Емельяненко, Виталий Минаков, Александр Шлеменко, Андрей Корешков, Александр Волков, Анатолий Токов, Александр Сарнавскай курдук байыастар утарылаһааччыларын кытта тылларынан ыыстаспаттар, күүстэрин-кыахтарын рингэ, клеткэ иһигэр көрдөрөллөр.

ОРОДЬУМААН.

23.10.2021.

Добавить комментарий

Ваш адрес email не будет опубликован. Обязательные поля помечены *