Министр «Тайм Аутка» тугу кэпсээтэ?

Бүгүн, «Саха» НКИХ күөх экраныгар уонна «Тэтим» радиотыгар тэҥинэн быһа эфиргэ Николай Бястинов «Тайм Аут» спорт туһунан биэриитигэр Саха Республикатын физическэй культураҕа уонна спорка министрэ Иннокентий Юрьевич Григорьев ыалдьыттаата. Кини бу, ахсынньы ыйга буолаары турар күрэхтэһиилэр хайдах быһыылаахтык ыытыллалларын туһунан кэпсээтэ.

Төһө даҕаны иккис сылын ковид дьаҥа бүрүүкээбитин үрдүнэн, ааһан эрэ сылга Сахабыт сиригэр – кикбоксиҥҥа Россия чемпионата, Роман Дмитриев кэриэһигэр көҥүл тустууга эрдэрдэргэ норуоттар икки ардыларынааҕы турнир, спорт национальнай көрүҥнэригэр «Манчаары оонньуулара» уонна сахалыы многоборьеҕа «Дыгын оонньуулара» тэрээһиннээхтик ыытылыннылар диэн бэлиэтээтэ.

2021 сылга республика спортсменнарыттан, Степанида Артахинова оҕунан ытыыга Токиотааҕы сайыҥҥы Олимпийскай оонньууларга боруонса мэтээли ылан – дьоһун ситиһиилэммитин ыйда. Ити курдук, спорт министрэ эппитинэн, 3 спортсмеммыт аан дойду чемпионнарын аатын ыллылар.

Ахсынньы 12 күнүгэр, мас-рестлиҥҥэ Саха Республикатын үтүөлээх тренерэ Федор Матвеевич Дегтярев кэриэһигэр Саха сирин муҥутуур кыайыылаахтарын быһаарар чемпионат сытыы киирсиилэрин «Саха» НКИХ быһа көрдөрүөҕэ.

Манна даҕатан эттэххэ, ковидынан сибээстээн күрэхтэһиилэр бары көрөөччүтэ суох ыытыллаллара ыйылынна.

Салгыы билиһиннэрдэххэ, ахсынньы 23 күнүгэр СР физическэй культураҕа уонна спорка министиэристибэтин коллегиятын сылы түмүктүүр тэрээһинэ ыытыллыа. Ол курдук, семинар буолуо, “төгүрүк остуоллар” тэриллиэхтэрэ, мунньах тэриллиэ. Сарсыныгар республика салалтатын таһымыгар улуу убайдарбыт Павел Пинигин, Роман Дмитриев, Александр Иванов Монреаллааҕы Олимпиадаҕа өрөгөйдөрүн бэлиэтиир тэрээһин ыытыллыаҕа. Оттон 25-с чыыһылаҕа 2021 сыл түмүгүнэн бастыҥ спортсменнар ааттара биллиэҕэ.

Эһиилги 2022 сыл улахан таһымнаах күрэхтэһиилэринэн – Уус Алдан киинигэр Бороҕоҥҥо Саха сирин норуоттарын 8-с спортивнай оонньуулара уонна Владивостокка «Азия оҕолоро» норуоттар икки ардыларынааҕы сайыҥҥы спортивнай оонньуулар буолуохтара.

Дьэ, министр тугу кэпсээбитин кылгастык сырдаттахха итинник.

«Дьулурҕан».  

Добавить комментарий

Ваш адрес email не будет опубликован.