Кыайыыга дьулуурдаах Варя

Бу саас Бөтүҥҥэ Николай Алексеев — Матбор аатынан көҥүл тустууга сэттэ саастаах Варя Явловская 16 уолу кыайан чемпион үрдүк аатын сүгэн соһуппута да, сөхтөрбүтэ да. Билигин Варя Е.С. Сивцев — Таллан Бүрэ аатынан Бөтүҥ орто оскуолатыгар 2-с кылааска ситиһиилээхтик үөрэнэ сылдьар.

Алтынньы 2-3 күннэригэр Санкт-Петербурга «Легион» спортивнай кулууп тэрийиитинэн, оҕолорго көҥүл тустууга бастыыр иһин аһаҕас турнир буолан ааста. Күрэхтэһиигэ кыра саастаах кыргыттар уонна уолаттар күөн көрүстүлэр. Манна Варя чаҕылхайдык киирсэн, боруонса мэтээли ылары ситиһэн, республика дьонун-сэргэтин үөртэ. Бу туһунан кини аҕатыттан Юрий Явловскайтан сиһилии билистибит:

«Биһиги дьиэ кэргэммитинээн оҕолорбут сайдалларын, спордунан дьарыктаналларын туһугар бары кыахпытын уурабыт. Сорохтор: «кыыс оҕону хайдах итинник көрүҥҥэ дьарыктанарын буойбаккыт» дииллэр. Варя бэйэтэ туспа характердаах, күүстээх санаалаах, тустуунан баҕаран туран дьарыктанар. Баҕарбат оҕону атын дьарыкка модьуйар туһата суох дии саныыбын. Кинини оскуолабыт физкультураҕа учуутала Владислав Бандеров дьарыктыыр, эбии сайдарыгар биһиги күүс-көмө буолабыт.

Санкт-Петербурга бу өрөбүллэргэ «Легион» СК көҥүл тустууга ыыппыт күрэхтэһиитигэр Варя 30 киилэ ыйааһыннаах кыргыттар бөлөхтөрүгэр туһунна. Ыйааһыннарыгар алталар этэ, бэйэтин ыйааһына 27 киилэ, онон кыратык ыарырҕатта уонна утарылаһааччылара биир сыл аҕалар. Ол да буоллар кыыспыт ситиһиититтэн астынныбыт, бэйэтэ да олуһун үөрдэ. Биир киирсиитигэр 0:8 ахсаанынан кыайтаран иһэн утарсааччытын лаппаахытыгар сытыаран ыраас кыайыыны ситиспитэ. Оттон 3-с миэстэни былдьаһыытыгар очколара 6:6 тэҥнэһэн утарсааччытын туһатыгар хотторон иһэн, “кыбытыы” албаһын туһанан эмиэ лаппаахытыгар сытыаран боруонса мэтээли ылары ситистэ. Ити албаһы бу соторутааҕыта үөрэппитэ, туттан көрбөтөҕө, хата, ити тустарыгар олус бэркэ туһанна.

Ыраах сиргэ баран күрэхтэһэргэ элбэх үп эрэйиллэр. Сайын дьоммут-сэргэбит көмө харчы хомуйаннар, онон билиэт ыламмыт киэҥ сиргэ, улахан куоракка кыттар чиэстэммиппит. Күрэхтэһии «Баскет холл» спортивнай кулуупка буолбута, хата, чугас аймахтарбыт баар буоланнар онно олордубут. Оҕо улахан турнирдарга күрэхтэстэҕинэ сайдар, инникитигэр күүс-уох, баҕа-санаа эбиллэр. Ахсынньыга Санкт-Петербурга көҥүл тустуунан дириҥэтэн дьарыктыыр интернаттаах оскуола сүүмэрдиир турнирыгар кытта барарга баҕа санаалаахпыт».

Варя төһө да спорт биир ыарахан көрүҥүнэн дьарыктаннар, оскуолатын уруоктарыгар кыһанан үөрэнэр. Иллэҥ кэмигэр кумааҕыттан араас оҥоһуктары кырыйар.

Хорсун санаалаах, кыайыыга дьулуурдаах Варяҕа үөрэҕэр ситиһиилэри, сөбүлээн дьарыктанар тустуутугар чыпчааллары баҕарабыт!

Семен АРГУНОВ, “Эҥсиэли” хаһыат корреспондена.

Нам.

 

Добавить комментарий

Ваш адрес email не будет опубликован. Обязательные поля помечены *