Контоевтар турнирдарын бриллианнаах мэтээлин ким ылыай?

Субуотаҕа, ахсынньы 4 күнүгэр Горнай улууһун киинигэр Бэрдьигэстээххэ – Россия спордун норуоттар икки ардыларынааҕы кылаастаах маастара, Беларусь Республикатын үтүөлээх маастара, аан дойду чемпиона Герман Контоев 50 сааһыгар уонна бырааттыы Герман, Александр Контоевтар 2001 сыллааҕы аан дойду чемпионатыгар өрөгөйдөрүгэр аналлаах, көҥүл тустууга республикатааҕы турнир ыытыллар.

Турнир эдэрдэргэ биэс ыйааһыҥҥа ыытыллар. Бүгүн киэһэ бөҕөстөр мандатнай хамыыһыйаны уонна ыйааһыннаныыны бардылар. Ол быһыытынан түһүлгэҕэ 9 хамаандаттан барыта 62 бөҕөс көбүөргэ күөн көрсөр буолла. Кэрэхсэбиллээҕэ диэн, бу күннэргэ Саха сиригэр кэлэн анал эрчиллиини бара сылдьар Монголия уонна Бурятия биирдиилээн бөҕөстөрө кыттыыны ылыахтара.

Мандатнай хамыыһыйа биллэрбитинэн, 57 кг – 20, 61 кг – 9, 70 кг – 16, 79 кг – 11 уонна 79-тан үөһэ кг – 6 бөҕөс суруттарбыт.

Бырагыраама быһыытынан хапсыһыылар, быйыл Манчаары оонньууларыгар анаан тутуллубут элбэх кыамталаах спортивнай комплекска сарсыарда 10:00 чаастан саҕаланаллар. Эбиэттэн киэһэ Герман Степанович Контоевы 50 сааһынан уонна бырааттыылар Болгариятааҕы кыайыыларын 20 сылынан үөрүүлээх чиэстээһин ыытыллыаҕа. Ол кэнниттэн турнир финал аҥарынааҕы киирсиилэрэ уонна финальнай хапсыһыылар буолуохтара.

Кыайыылаахтар сыаналаах бириистэринэн, “Киэргэ” ювелирнай салон анаан оҥорбут мэтээллэринэн уонна дипломнарынан наҕараадаланыахтара. Манна даҕатан эттэххэ, Герман туста сылдьыбыт ыйааһыныгар (57 кг) бастаабыт бөҕөс – бриллианнаах мэтээл хаһаайынынан буолуоҕа.

Манна маастардар Любомир Ашеин, Дьулустан Федотов, маастарга кандидаттар Петр Адамов, Айсен Алексеев, Юрий Анисимов, Валерий Андросов, Иван Степанов бааллар. Дьэ, хайалара бастыай?

«Дьулурҕан».

  

 

Добавить комментарий

Ваш адрес email не будет опубликован.