Хасавюрт көбүөрэ тугу түстүүр?

Ахсынньы 10-12 күннэригэр Хасавюрт куоракка Дагестан албан аатырбыт бөҕөстөрүн кэриэстэригэр улахан таһымнаах норуоттар икки ардыларынааҕы турнир буолаары турар. Бу турнир урут Умаханов аатынан турнирынан биллэрэ. Барыллааһын иһитиннэриинэн онно 15 дойду спортсменнара кытталлара күүтүллэр.

Саамай улахан ааттаах-суоллаах кыттааччынан АХШ-тан олимпийскай чемпион Кайл Снайдер буолуоҕа.

Бу түһүлгэҕэ саха тустууга кыһатын иитиллээччилэриттэн Виктор Рассадин, Дмитрий Аксенов, Петр Константинов, Алексей уонна Петр Копыловтар, Тимур Николаев, Ньургун Сергин, Максим Толмачев, Эдуард Григорьев, Константин Власов уо.д.а. кытталлара былааннанар.

Турнир кыайыылааҕа 150, иккис призёр 100 уонна үһүс миэстэлээх 50 тыһ. солк. харчынан бириэмийэлэниэҕэ. Оттон кыайыылааҕы бэлэмнээбит тренер 50 тыһ. солк. бэлиэтэниэҕэ.

Хапсыһыылар ахсынньы 10 күнүттэн саҕаланаллар. Бастаан көбүөргэ 57-65-74-86-97 кг ыйааһыннаахтар тахсаллар. Санатан эттэххэ, бөҕөстөр 2 киилэ ордуктаах буолаллара көҥүллэнэр.

“Дьулурҕан”.

Добавить комментарий

Ваш адрес email не будет опубликован.