Гректии-римнии тустааччыларбыт ситиһиилэрэ

Сэтинньи 25-26 күннэригэр Владивосток куоракка Дальнай Восток федеральнай уокуругун гректии-римнии тустууга чемпионатыгар биһиги бөҕөстөрбүт ситиһиилээхтик кытыннылар.

Ол курдук, Федор Устинов 63 киилэҕэ кыайыыны ситистэ. Финалга кини бэйэтин хамаандатын киһитэ Артур Константиновы хотто. Владислав Павлов 72 кг эмиэ иккис буолла. Оттон Семен Стручков (60 кг) уонна Сергей Павлов (72 кг) үһүс миэстэлэри ыллылар.

Бу иннинэ Федор Устинов Омскайга уонна Барнаулга буолбут Бүтүн Россиятааҕы турнирдарга иккис миэстэлэргэ тахсыбыта. Омскайга, Россия үтүөлээх тренерэ Ю.А. Крикуха кэриэһигэр түһүлгэҕэ биһигиттэн өссө Родион Степанов (55 кг) уонна Андрей Слепцов (130 кг) үһүс миэстэлэри ылбыттара.

Манна даҕатан эттэххэ, Крихуха уонна Кишицкай турнирдара маастар нуормалаах этилэр. Онон, ити күрэхтэһиилэргэ ситиһиилээхтик кыттыбыт Амма ыччата Федор Устинов салгыы, Дальнай Восток чемпионатыгар бастакы миэстэни ылан, Россия спордун маастарын нуорматын толордо. Ити курдук, кэнники күрэхтэһиилэргэ Владислав Павлов уонна Семен Стручков эриэ-дэхси көрдөрүүлэнэн – маастарга кандидат нуорматын толордулар.

Тустуук уолаттарбытын уонна кинилэр тренердэрэ М.М. Матвеевы, К.И. Павловы, Р.И. Аджины бу ситиһиилэринэн эҕэрдэлиибит! Итиэннэ ситиһииттэн уоскуйан хаалбакка, салгыы өссө дьаныардаахтык дьарыктанан үрдүк көрдөрүүлэри дабайалларыгар баҕарабыт.

Бу ситиһиилэринэн туһаайан гректии-римнии тустуу тренердэрэ – Саха Республикатын спортивнай тустууга федерациятыгар (вице-президент Дмитрий Румович Ушницкайга), Варвара Николаевна Погодаеваҕа, “Атлетикс” маҕаһыыҥҥа, “Слобода” эргиэн дьиэтигэр (дириэктэр Иван Васильевич Заровняевка), Эбээн Бытантай улууһун дьаһалтатыгар, Олимпийскай эрэл училищетын дириэктэрэ Семен Сергеевич Чердоновка күүс-көмө, өйөбүл буолбуттарын иһин барҕа махталларын тиэрдэллэр.

“Дьулурҕан”.  

Хаартыскаҕа: пьедестал иккис үктэлигэр – Федор Устинов.