Гранд-финал: Лауреаттарынан кимнээх буоллулар?

2021 сыл түмүгүнэн Саха сирин спорка бастыҥ спортсменнарын быһаарыы быйыл эмиэ норуот куоластааһынынан тэрилиннэ. Куоластааһын ахсынньы күннэригэр ыытылынна. Лауреаттар ааттарын бүгүн “Саха” национальнай көрдөрөр-иһитиннэрэр хампаанньа телевизорынан быһа биэриитигэр биллибит. Ол курдук түөрт бөлөххө үстүү элбэх куоластаах спортсменнар быһаарылыннылар.

Спорт олимпийскай көрүҥнэригэр

2021 сыл спорт олимпийскай көрүҥнэригэр эр дьоҥҥо бастыҥ спортсменынан көҥүл тустууга норуоттар икки ардыларынааҕы кылаастаах спорт маастара Арыйаан Тютрин буолла. Арыйаан – Беларусь Республикатын чемпионунан, аан дойду чемпионатын боруонса призёрунан, Иван Ярыгин уонна Александр Медведь ааттарынан улахан таһымнаах норуоттар икки ардыларынааҕы турнирдар кыайыылаахтара. Тренерэ – Иван Дмитриев.

Эдэрдэргэ бастыҥ спортсменынан Станислав Свинобоев талылынна. Быйыл кини көҥүл тустууга Россия күрэхтэһиитигэр бастаабыта, аан дойдуга үһүс миэстэлэммитэ итиэннэ Румынияҕа уонна Хотугу Македонияҕа ыытыллыбыт норуоттар икки ардыларынааҕы турнирдарга кыайбыта. Тренерэ – Василий Уваров.

Кэрэ аҥардарга 2021 сыл лауреатынан Россия марафоҥҥа чемпиона, норуоттар икки ардыларынааҕы кылаастаах спорт маастара Сардаана Трофимова талылынна. Тренерэ – Татьяна Жиркова.

Спорт олимпийскайа суох көрүҥнэригэр

Кэрэ аҥардарга бастыҥынан норуоттар икки ардыларынааҕы гроссмейстер Матрена Ноговицына буолла. Матрена – Саха сирин спорка историятыгар 100 харахтаах дуобакка бастакынан аан дойду чемпионун аатын ылла. Тренерэ – Николай Кычкин.

Бу номинацияҕа ааһан эрэр сыл бастыҥ спортсменынан боксёр Петр Васильев ааттанна. Кини профессиональнай боксаҕа түөрт киирсиини ыытан, барытыгар кыайыыны ситистэ. Тренерэ – Семен Лукин.

Бу бөлөххө дуобакка спорт маастара Альбина Большакова – Аан дойду Кубогар кыайан, аан дойду чемпионатыгар хамаанданан бастаан, 2021 сыл эдэрдэргэ бастыҥ спортсменынан талылынна. Тренерэ — Вячеслав Варламов.

Спорт адаптивнай көрүҥнэрин лауреаттара:  

Кэрэ аҥардарга – оҕунан ытыыга Токиотааҕы Паралимпиада боруонса призёра, Россия спордун үтүөлээх маастара Степанида Артахинова. Тренерэ – Андрей Иксман.

Эдэрдэргэ – пауэрлифтиҥҥа Аан дойду чемпионатын кыайыылааҕа Айаал Сивцев. Тренерэ – Петр Давыдов.

Күүстээх аҥардарга – пауэрлифтиҥҥэ уонна армрестлиҥҥэ Россия чемпионаттарын үрүҥ көмүс призердара Сергей Безносов. Тренерэ — Аркадий Степанов.

Спорт национальнай көрүҥнэрин бастыҥнара:

Кэрэ аҥардарга – Наталья Черноградская (мас-рестлинг) – Россия уонна Европа чемпиона, Манчаары оонньууларын кыайыылааҕа. Тренерэ — Алексей Агапов.

Эдэрдэргэ – спорт маастара Фаина Дмитриева (мас-рестлинг) Бүтүн Россиятааҕы турнир кыайыылааҕа, Россия чемпионатын призера. Тренерэ – Яна Захарова.

Күүстээх аҥардарга – Россия уонна Европа чемпиона, Манчаары оонньууларын кыайыылааҕа Сергей Фролкин (мас-рестлинг). Тренерэ — Виктор Докалов.

Бары лауреаттары уонна кинилэр тренердэрин эҕэрдэлиибит! Инникитин өссө улахан ситиһиилэри баҕарабыт!

«Дьулурҕан».

 

Добавить комментарий

Ваш адрес email не будет опубликован.