Дуобат добун түһүлгэтин саамай эдэр кыайыылааҕа Айсен Егоров

Сахабыт сиригэр дуобат сайдыытын түстээбит, чаҕылхай ситиһиилэринэн сахалар ааттарын киэҥ дойдубут уонна Аан дойду түһүлгэлэригэр ааттаппыт, бу мындыр оонньууга элбэх маастардары, гроссмейстердары иитэн таһаарбыт, сахалартан аан-бастакынан 100 харахтаах дуобакка норуоттар икки ардыларынааҕы кылаастаах спорт маастара буолбут Игорь Андреевич Никифоров сырдык кэриэһигэр 100 харахтаах дуобат добун түһүлгэтэ, Саха өрөспүүбүлүкэтин чөмпүйэнээтэ ахсынньы 24-26 күннэригэр Хаҥалас улууһун киинигэр Покровскайга тэрилиннэ.

Саха норуота былыр-былыргыттан туохха барытыгар дэгиттэр талааннаах омук быһыытынан биллэр. Дуобат оонньуута омос көрдөххө судургу курдугун иһин, ис дьиҥэр иҥэн-тоҥон биллэххэ киһини улам умсугута тардар уратылаах. Бу үтүө тэрээһиҥҥэ анаммыт улахан дуобат күрэҕин кылаабынай судьуйатынан, Бүтүн Арассыыйатааҕы категориялаах судьуйа Гаврил Винокуров үлэлээтэ. Саха өрөспүүбүлүкэтин дуобакка федерациятын вице-президенэ, спорт интеллектуальнай көрүҥнэригэр Киинин дириэктэрэ Юрий Никифоров кыттыыны ылла. Күрэхтэһии үс күн устата тохтообокко ыытылынна.

Ахсынньы 24 күнүгэр күрэхтэһии ыытыллыахтаах сиригэр, Олег Иванов дириэктэрдээх Спорт дыбарыаһыгар дуобат Киинин кэҥэс саалата үөрүүлээх быһыыга-майгыга аһыллыыта буолла. Кэскиллэрбитигэр оҕолорбутугар  усулуобуйа тэрилиннэ. Сүрүн  күрэхтэһиигэ саамай чулууттан чулуулар, бастыҥтан бастыҥнар, сытыы өйдөөхтөр 10 киһи Үрдүгү  лигаҕа күрэхтэстилэр. Кыттааччыларга 4 норуоттар икки ардыларынааҕы гроссмейстердар улахан да дьоҥҥо, оҕолорго да Аан дойду чөмпүйүөннэрэ оонньоотулар. Аан дойду 12 төгүллээх чөмпүйүөнэ Гаврил Колесов, Аан дойду икки төгүллээх чөмпүйүөнэ Андрей Федотов,  Арассыыйа, Европа чөмпүйүөннэрэ Иван Токусаров, Николай Гермогенов, ССРС спордун күүстээх маастара өрөспүүбүлүкэҕэ 100 харахтаах дуобакка 5 төгүллээх чөмпүйүөнэ Василий Кычкин, өрөспүүбүлүкэ 3 төгүллээх чөмпүйүөнэ Вячеслав Варламов бааллар. Онтон оҕолорго,  уолаттарга бэйэлэрин саастыылаахтарыгар Аан дойду, Европа, Арассыыйа чөмпүйүөннэрэ Хаҥаластан Айсен Егоров, Дьокуускай куораттан Алеша Большаков (Хаҥалас улууһуттан Булгунньахтаахтан төрүттээх Иван Павлов иитиллээччитэ), Мэҥэ Хаҥаластан Проня Говоров (тириэньэрэ Василий Куприянов) кытыннылар.

Иккис күн 64 харахтаах дуобакка Аан дойду 4 төгүллээх чөмпүйүөнэ гроссмейстер Николай Стручков уонна 100 харахтаах дуобакка Сахабыт сиригэр эр дьоҥҥо 3 төгүллээх чөмпүйүөнэ Вячеслав Варламов барыта 31 дуоскаҕа сеанс биэрдилэр.

Улахан таһымнаах күрэхтэһии туһунан, дуобакка Саха сирин үтүөлээх тириэньэрэ, Мэҥэ Хаҥалас Мэлдьэхситигэр Нам спортивнай оскуолатын филиалын тириэньэрэ Василий Куприянов санаатын үллэһиннэ:

СӨ спортка министиэристибэтэ сыл аайы эр дьоҥҥо уонна дьахталларга дуобакка Үрдүкү лигаҕа күрэхтэһиитэ Игорь Никифоров  аатынан ыытыллара олус сөптөөх. Урут 64 харахтаах дуобакка ситиһиилэр бааллара. Игорь Андреевич Никифоров бэйэтин кэмигэр100 харахтаах дуобакка сахалартан соҕотоҕун улаханы ситиспит, суолу тэлбит киһинэн буолар. Норуоттар икки ардыларынааҕы турнирдарга кыайталаабыта. Кини бэйэтин тус аптарытыатынан оччотооҕу үлэлиир кэмигэр, Саха сиригэр «Урожай» уопсастыбанан маастар нуормалаах Арассыыйа күрэхтэһиилэрин тэрийтэрэрэ, ол кини сөҕүмэр үтүөтэ.  Онно элбэх киһи ССРС спордун маастардара буолбуттара. Ол иһигэр мин эмиэ Сэбиэскэй Сойуус спордун маастарын нуорматын толорбутум. Бу күрэхтэһии кэлэр да өттүгэр саамай күүстээхтэри, чулуулары түмэ туруоҕа. Быйыл саамай күүстээх састаап түмсэн күөн көрүстүлэр.

Үс күн устата, күҥҥэ үстүү туурдаах дуобат добун түһүлгэтигэр Хаҥаластааҕы Оҕо спортивнай оскуолатын тириэньэрэ Александр Соломонов иитиллээччитэ, Покровскайтан 13 саастаах Айсен Егоров олус тахсыылаахтык оонньоото. Кини билигин  Норуоттар икки ардыларынааҕы Арктическай оскуола VII кылааһын үөрэнээччитэ. Айсен норуоттар икки ардыларынааҕы гроссмейстердары кытта бэрт хатыһыылаахтык оонньоон, 100 харахтаах дуобакка Саха өрөспүүбүлүкэтин чөмпүйэнээтин кыайыылааҕынан буолла. Пьедестал үрдүкү үктэлигэр таҕыста уонна Куубагы өрө көтөхтө. Кини дуобаты таптааччыларга уонна биир дойдулаахтарыгар улахан үөрүүнү аҕалла.

100 харахтаах дуобакка  Саха өрөспүүбүлүкэтигэр бастыыр иһин күрэхтэһиигэ Үрдүкү лигаҕа олус  табыллан оонньоотум. Бастаан маннык үчүгэйдик оонньуом диэн санаа суоҕа. Гроссмейстердары кытта оонньуурбар Гаврил Колесовы, Иван Токусаровы хоппутум, Николай Гермогеновтыын уонна Андрей Федотовтыын тэҥнэспитим. 9-с турга Вячеслав Варламовтыын оонньуурбар олус уустук балаһыанньаҕа киирэ сылдьыбытым. Хата утарылаһааччым тэҥнэһиини биллэрэн үөрдүм. Уопсайынан түөртэ кыайдым уонна биэстэ тэҥнэстим. Инникитин спорт маастарын нуорматын толорорго үлэлэһиэм, — диир бэрт дьоһуннаахтык  чөмпүйүөн Айсен Егоров.

Күрэхтэһиини Игорь Андреевич кэргэнэ, дуобакка ССРС спордун маастара Альбина Иннокентьевна уолунаан Игорь Игоревичтыын сыныйан  көрдүлэр. Уолбут Айсен Егоров бу ситиһиитигэр дуобат мындыр оонньуутугар сыһыаран, иитэн-такайан таһаарбыттарыгар биллэн турар, төрөппүттэригэр Виктор Викторович уонна Ирина Николаевна Егоровтарга, тус тириэньэригэр Александр Степанович Соломоновка уонна Виктор Прокопьевич Громов дириэктэрдээх Хаҥаластааҕы Оҕо спортивнай оскуолатын кэлэктиибигэр махтал үтүө тылларын аныыбыт.

Күрэхтэһии ыытыллыытыгар уонна тэрээһинигэр «РИК» ААУо генеральнай дириэктэрэ Петр Алексеев, Хаҥалас улууһун физическэй култуураҕа уонна спортка управлениета (салайааччы Ю.Ю. Никифоров, солб. Р.Д. Протодьяконов), спорт интеллектуальнай оонньууларыгар федерациятын бэрэссэдээтэлэ Родион Кононов, “Фаворит” автооскуола дириэктэрэ Михаил Винокуров, Покровскай куорат дьаһалтата (баһылык Петр Гермогенов), Хачыкаат нэһилиэгин дьаһалтата (баһылык Ирина Оболкина), «Радуга» ХЭТ дириэктэр Ольга Полторыхина, дуобат, саахымат федерациятыттан улуус дьокутаата Юрий Яковлев, Игорь Никифоров  кэргэнэ Альбина Иннокентьевна, уола Игорь Игоревич дьоһуннаах  көмөнү оҥордулар.

100 харахтаах  дуобакка (Үрдүкү лига)

Саха өрөспүүбүлүкэтин чөмпүйэнээтин призердара

1-кы миэстэ Айсен Егоров – Арассыыйа спордун маастарыгар кандидат, 13 очукуолаах (Хаҥалас улууһа).

2-с миэстэ Николай Гермогенов – норуоттар икки ардыларынааҕы гроссмейстер, 13 очукуолаах (Уус Алдан улууһа).

3-с миэстэ Вячеслав Варламов – Арассыыйа спордун маастара, 11 очукуолаах (Нам улууһа).

Уйбаан УЙГУУРАП.

 

Добавить комментарий

Ваш адрес email не будет опубликован.