“Дьулурҕан” ыйытыга: Бастыҥ спортсменынан кими ааттыаҥ этэй?

Сылбыт түмүктэнэн эрэр. Онон олохсуйбут үгэһинэн, ханан даҕаны, ааһан эрэр сыл түмүктэрин таһаарыы, инникини түстээһин, бастыҥнары талыы үгэннээн турар кэмэ. Бу сырыыга биһиги спорт салайааччыларыттан да, спортсменнартан, тренердэттэн даҕаны буолбакка, көннөрү спорду таптааччылартан, биһиги хаһыаппытын таптаан ааҕааччылартан үс ыйытыкка хоруйдуулларыгар көрдөстүбүт.    

-2021 сыл спорка туох өйдөбүлү хаалларда?

-Кэлэр сылтан тугу күүтэҕин?

-Бастыҥ спортсменынан кими ааттыаҥ этэй?

Спорду таптааччы Аня Дмитриева: “2021 Токиотааҕы сайыҥҥы Олимпиада, спортсменнарбыт араас турнирга кыайыылара – үчүгэй өйдөбүлү үөскэттэ. Кэлэр сылга Саха сири оонньуулара биһиги улууска – Уус Алдаҥҥа үрдүк таһымнаахтык ыытыллара, спортсменнарбыт кыайыыларынан үөрдэллэрэ буоллар. Итиэннэ күрэхтэһиилэр көрөөччүлээх, турнирдар былааннаммыттарынан ыытыллаллара буоллар. Бастыҥ спортсменнар – Арыйаан Тютрин, Сардаана Трофимова”.

Спорду таптааччы Вячеслав Александров: “2021 сыл – горнайдар сыллара ааhан эрэр спорка, «Манчаары» оонньуута уонна бырааттыы Герман, Александр Контоевтар аан дойдуга тустууга үрдүкү чыпчаалы ылыыларын юбилейдаах сыла бэлиэтэннэ. Кэлэр 2022 сылтан кэтэһэрим диэн, дойдубар Бороҕоҥҥо Саха сирин норуоттарын 8-с Спортивнай оонньуулара ситиһиилээхтик ыытыллаллара буоллар диэн. Онтон бастыҥ спортсменынан биир дойдулаахпын Ариан Тютрины ааттыам этэ”.

Спорт бэтэрээнэ Николай Кронников: “Ааспыт сыл сүрүн өйдөбүлүнэн Токио Олимпиадата буолла. Ыарыынан сибээстээн сыл хойутаан да ыытылыннар, чаһы эргиирэ сөп түбэһэр буолан, телевизорынан үчүгэйдик көрөн астынныбыт. Хомолтото диэн, тустуук А.Лазарев трамвалаах буолан, туохха дьоҕурдааҕын көрдөрбөккө хаалла. Оттон үөрүүлээҕэ диэн, саха уола ыарахан ыйааһыҥҥа икки Олимпиадаҕа субуруччу кыттыыта да улахан ситиһии дии саныыбын. Степанида Артахинова мэтээл ылан улаханнык үөртэ, уһун сылга биир тэҥ ситиһиилээхтик кыттыыта, алҕас буолбатаҕын дакаастаата. Итиэннэ А.Тютрин аан дойдуга боруонса призердааһына, саха тустуута билигин да баарын, кэскиллээҕин дакаастаата. Биһиэхэ биир хомолтолооҕо, бэйэм тэрийсибит СахаВА 30 сыллаах юбилейын бэлэмнэнэн баран, ыыппакка хаалбыппыт буолар. Кэлэр сылга ыарыы намтаан, юбилейнай фестивальбытын этэҥҥэ ыытарбыт буоллар диэн уонна саха тустууктара аан дойду көбүөрүттэн мэтээл аҕалаллар ханнык диэн баҕалаахпын. Бастыҥ спортсмен – Арыйаан Тютрин диибин”.

Спорду таптааччы Федора Захарова: “Тустуук легионер уолаттарбыт ситиһиилэрэ астыннарар. Горнайга спортивнай түһүлгэҕэ саҥа ааттар тахсыбыттара үөрүүлээх. Россия таһымыгар бу буола турар биатлоҥҥа эстафетаҕа кыайыыларбытыттан астынным. Дьэ, кырдьык дьиҥнээх спортивнай дьулуур, кыах манна көһүннэ. Кэлэр сылга Уус Алдаҥҥа буолуохтаах Спортивнай оонньуулар көрөөччүлээх ыытыллаллара буоллар диэн улахан баҕа санаалаахпын. Уонна бу дьаҥ бүтэн, спортивнай саалаларбын толору үлэлээн, күрэхтэһиилэр хас биирдии нэһилиэктэргэ ыытыллан, дьон сэргэхсийэрэ буоллар. Сыл бастыҥ спортсменынан Владислав Андреевы, Степанида Артахинованы ааттыам этэ”.

Спорт бэтэрээнэ Иван Дедюкин: “Сардаана Трофимова, Василий Егоров Олимпиадаҕа кыттыбакка хаалбыттара хомотор. Манчаары оонньуулара таһымнаахтык барда. Тустууктар мөлтөх көрдөрүүлээхтэр. Ол оннугар уһуҥҥа сүүрүү, ытыы, бокса, дуобат көрдөрүүлэрэ үрдүк буолла. Уопсайынан. Саха сиригэр улахан спорка уонна дьон маассабайдык дьарыктаныытыгар, күрэхтэһиилэри тэрийиини саҥалыы, былааннаахтык оҥоруохха наада. Биир-икки көрүҥү өрө тутан, Аан дойдуга тахсыы сыыһата көһүннэ. ДЮСШ-тан саҕалаан көрүҥнэри, штаттары дьаарыстыахха. Тустууга олус элбэх тренер эбит, түмүк мөлтөх. Ытыыны олох күүскэ сайыннарыахха наада. Билигин ыччат дьарыктанар көрүҥэ элбээтэ. Саха хааныгар баар көрүҥнэри өйүөххэ, сайыннарыахха. Спортивнай оонньуулары үрдүк таһымҥа ыытыы, түмүгүн күүскэ ырытыы. Хоту улуустарга үлэ күүскэ ыытыллыан наада, ону өйүөххэ. Сыл бастыҥ спортсменнарынан – Сардаана Трофимованы, Арыйаан Тютрины, Матрена Ноговицынаны ааттыам этэ”.

Спорт бэтэрээнэ Степан Лыткин: «Бэрдьигэстээххэ хамсыгы-тойу аахсыбакка олус үрдүк күүрээннээх Баһылай Манчаары Оонньуулара ыытыллан ааспыта, саха саҥалааҕы барытын долгутта, биир өйгө-санааҕа түмтэ, саха омук буоларбытынан киэн туттууну аҕалла. Олус астык! Иккиһинэн, Өрөспүүбүлүкэ 100 cылыгар Бороҕоҥҥо ыытыллыахтаах  Норуоттар оонньуулара эмиэ үрдүк таһымнаах буолуо диэн эрэниллэр. Үсүһүнэн, Арыйаан Тютрин бастыҥ спортсменынан ааттанара, уолбут инникитин Парижка тиийэн олимпийскай мэтээли иилинэригэр төһүү буолуох этэ”.

Спорду таптааччы Сергей Колесов: “Сыл бастыҥ спортсмена, мин санаабар, олимпийскай көрүҥҥэ: Арыйаан Тютрин, национальнай көрүҥнэргэ: Егор Филиппов. Кэлэр сылтан көрөөччүлээх күрэхтэһиилэри, Дьокуускайга тустууга Россия чемпионата ыытыллыытын, өр тохтобул кэннэ тустууга Саха норуотуттан Россия, Европа, Аан дойду чемпионнарын, Кыһыҥҥы Олимпиадаҕа Россия сборнайыттан элбэх кыайыылары, чуолаан хоккейга, футболга Россия хамаандалара аан дойду чемпионатыгар кыттыыларын күүтэбин. Дьиҥинэн, баҕа санаа баһаам буоллаҕа…

2021 сыл үчүгэй өйдөбүллэрэ: хамсык ыарыы да буоллар, Олимпиада ыытыллыбыта, Россия хамаандата Олимпиадаҕа төһө кыалларынан кыайыылары бэлэхтээбитэ, чуолаан көҥүл тустууга 3 кыһыл көмүс мэтээл, спортивнай гимнастикаҕа эр дьоҥҥо кыһыл көмүс мэтээл, Кытай, Япония гимнастарын кыайан, Саха сиригэр аан дойдуга Арыйаан Тютрин, Европаҕа Эдуард Григорьев – боруонса, Россияҕа Станислав Свинобоев эдэрдэртэн кыһыл көмүс мэтээллэр кэлиилэрэ. Ярыгин турнирыттан кыһыл уонна үрүҥ көмүс мэтээллэр кэлиилэрэ. Дыгын оонньуута ыытыллыбыта, Егор Филиппов троҥҥа төннүүтэ…

Оттон мөкү өйдөбүллэрэ: күрэхтэһиилэр көрөөччүтэ суох ыытыллыылара, Россия футболга сборнайа Аан дойду чемпионатыгар кыттар быраабы ыларын куоттарбыт түгэнэ, Арыйаан Тютрин Аан дойду күрэхтэһиитин өссө үрдүк суолталаах мэтээлин ылар түгэнин мүччү туппута”.

Спорду таптааччы Лазарь Рожин: “Ох саанан ытыыга, дзюдоҕо, хайыһарга Россияҕа, о.д.а. көрүҥнэргэ кэккэ ситиһиилэр бааллар. Онон бу көрүҥнэргэ сөптөөх үп-харчы көрдөххө улахан ситиһии кэлиэн сөп эбит. Онуоха эбии олимпийскай көрүҥнэр.

Кэлэр сылга Саха сиригэр мас тардыһыытыгар аан дойду чемпионата уонна Пекин куоракка Кыһыҥҥы Олимпийскай оонньуулар буолаллар. Манна сэмээр улахан ситиһиилэри күүтэбин.

Бастыҥ спортсменынан дуобакка аан дойду чемпиона Матрена Ноговицынаны этэбин. Сыыспат буоллахпына, соҕотох көрдөрүү аан дойду чемпионатыгар”.

Спорду таптааччы Тимофей Габышев: “1. 2021 сылга пандемия кэмигэр Токиоҕа буолан ааспыт сайыҥҥы Олимпиада уонна уот-буруо быыһыгар Бэрдигэстээххэ буолбут «Манчаары оонньуулара». 2. Олимпийскай көрүҥнэргэ кыайыылары уонна спортсменнарбыт сборнайга киирэллэрин күүтэбин, Париж-2024 чугаһаата. 3. Бастыҥ спортсменынан кими ааттыаҥ этэй? Арыйаан Тютрин!”

Спорду таптааччы Гаврил Скрябин: “2021 сыл спорка сайыҥҥы XXXII Олимпийскай оонньуулар үчүгэй өйдөбүллэри хааллардылар. Оттон 2022 сылга Кыһыҥҥы Олимпийскай оонньуулары уонна футболга аан дойду чемпионатын кэтэһэбин. Айаал Лазарев Олимпийскай оонньууга кыттыыта, Арыйаан Тютрин аан дойдуга миэстэлэһэн ыалдьаачыларыгар эрэли үөскэттэ”.

Спорт эйгэтин үлэһитэ Андрей Филиппов: “Ааһан эрэр 2021 сыл спорка икки саарык өйдөбүлү хаалларан эрэр. Ол, биллэн турар, ыарахан ыарыы содула. Олимпиада көрөөччүтэ суох буолан, уота-күүһэ ситэ умайбата курдук көрөбүн. Үлэлиир 5 №-дээх оҕо спортивнай оскуолатын выпускниктара бэртээхэй сылы аһаран эрэллэр. Айаал Лазарев иккиһин Олимпиадаҕа кытынна, Сардаана Трофимова марафоҥҥа Россия чемпионатын кыайда, Изабелла Борисова 100 км сүүрүүгэ Россия чемпионатын кыайда, аан дойдутааҕы кылаастаах спорт маастара буолла, Наталья Леонтьева марафон аҥарыгар сүүрүүгэ Россия чемпионатыгар үһүс буолбута, Рамир Николаев спортингтан стендовай ытыыга көһөр санааланан Краснодарга үөрэххэ киирдэ, онно Краснодар кыраайын трап ытыыга иккис призера буолла. Кинилэртэн Сардаана Трофимова, Изабелла Борисова саха спордугар балачча чорбойор ситиһиилээхтэр дии саныыбын, манна өссө Матрена Ноговицына дьахталларга сүүс харахтаах дуобакка Аан дойду чемпионката буолбута тэҥнээх дии саныыбын, Арыйаан Тютрин син киһини үөрдэр тустууну көрдөрөн эрэр.

Кэлэр сылга абааһы ыарыыта суолбутуттан туора хаамыа диэн эрэниэххэ, чөл олохпут кэмигэр киириэ, чулуу спортсменнарбыт ситиһиилэриттэн үөрүөхпүт-долгуйуохпут! Оскуолам оҕолоро улахан убайдарын-эдьиийдэрин суолларынан эрэллээхтик үктэнэллэрэ буоллар!”

Спорду таптааччы Валерий Ефремов: “2021сылга биллэн турар, Токиоҕа буолбут сайыҥҥы Олимпийскай оонньуулар үчүгэй өйдөбүлү хааллардылар. 2022 сылга саха тустуутугар соһуччу улахан ситиһиини күүтэбин. Бастыҥ спортсменынан Арыйаан Тютрины ааттыам этэ, аан дойду чемпионатын боруонса мэтээлэ күндү”.

”Дьулурҕан”.

Добавить комментарий

Ваш адрес email не будет опубликован.