Денис Назаров чемпион буоларын бигэргэттэ!

Майа орто оскуолатын 10-с кылааһын үөрэнээччитэ Денис Назаров саахымакка улахан дьон ортотугар өрөспүүбүлүкэҕэ иккитэ субуруччу бастаата. 2019 с. соһуччу бастаабытыгар, улахаттар болҕомтолорун уурбаккалар, алҕас кэриэтэ кыайда диэн саахыматчыттар ортолоругар санаа баар этэ. Былырыын пандемиянан сылтаан чемпионат ыытыллыбатаҕа.

Быйыл Денис күрэхтэһиини хотторууттан саҕалаабытыгар, элбэх специалист итинник буолуохтаах диэн киниэхэ эрэммэттэрин эппиттэрэ. Ол эрээри, биир киһи – Денис тус тренерэ Владимир Мэндеич Таппыров «уһун илистиилээх чемпионат устатыгар форматыгар киириэҕэ, бастыыр иһин үлэлиэҕэ» — диэн эрэллээхтик эппитэ. Ол туолан, Денис тууртан туурга дьоһун, бары өттүнэн ситэри ааҕыллыбыт, чочуллубут партиялары оонньотон, иккистээн чемпион аатын ылан, инники ситиһиитэ алҕас буолбатаҕын бигэргэттэ.

Сүрүн утарсааччыларын маастардары, өрөспүүбүлүкэ 4 төгүллээх чемпионун Дмитрий Егоровы, өрөспүүбүлүкэ чемпионун Василий Васильевы, «Северное сияние» өрөспүүбүлүкэтээҕи саахымат фестивалын кыайыылааҕын Нариман Мустафины, уус алданнар эрэллэрин, ФИДЕ саахымакка маастарын Айсен Местниковы сирэй көрсүһүүгэ сүрдээх тыҥааһыннаах, сыра-сылба баранар киирсиитигэр баһыйан, бэринэргэ күһэйдэ.

Денис өрөспүүбүлүкэҕэ улахан дьон ортотугар кыайыыта Мэҥэ-Хаҥалас саахыматын историятыгар бастакы түбэлтэ, оттон өрөспүүбүлүкэ историятыгар оскуола үөрэнээччитэ улахан дьоҥҥо аан бастаан чемпионнаата. Онон мэҥэлэр кэскиллээх саахыматчыппытынан киэн туттабыт.

Денис бу ситиһиитигэр бастакы тренердэрэ Анастасия Иннокентьевна Харитонова, Гаврил Колосов, Дениһи салгыы такайан саахымат биллиилээх маастарыгар туттарбыт энтузиаст саахыматчыт Ульяна Спиридоновна Шишигина уонна төрөппүттэрэ улахан үтүөлээхтэр. Ол эрээри, Денис оҕолорго ДВФО икки төгүллээх, улахан дьоҥҥо өрөспүүбүлүкэ икки төгүллээх чемпиона, эдэрдэргэ Белоруссия Орша куоратыгар ыытыллыбыт норуоттар икки ардыларынааҕы турнир чемпиона буоларыгар, Россия чемпионаттарыгар ситиһиилээхтик кыттарыгар төһүү күүһүнэн буолбут, маастарыстыбатын чочуйбут киһинэн Ленинград саахыматын оскуолатын ааспыт, ФИДЕ саахымакка маастара, өрөспүүбүлүкэ бастыҥ тренерэ, Саха сирин саахыматчыт дьиэ кэргэнин үгэһин салҕааччы Владимир Мэндеич Таппыров буолар (Мэндэ Таппыров саахымакка ССРС спордун маастара этэ).

Билиҥҥи туругунан Дениһи олунньу 1 күнүгэр Оршаҕа (Белоруссия) уонна Череповецка ыытыллыахтаах норуоттар икки ардыларынааҕы турнирдарга ыҥырдылар. Орша турнирын белорустар международнай маастарга бастакы балл ылар турнир быһыытынан, норуоттар икки ардыларынааҕы таһымнаах маастардар, гроссмейстердар кыттыылаах ыыталлар. Онон, Денис өссө үрдүк чыпчаалга дабайарыгар олук буолар күрэхтэһиилэринэн буолаллар.

Санатан эттэххэ, чемпионакка иккис миэстэни Василий Васильев (Уус Алдан), үсүһү Руслан Пахомов (Сунтаар) ыллылар. Ити курдук, Саха сирин 73-с чемпионатыгар алта күүстээхтэр ахсааннарыгар киирдилэр: Нариман Мустафин (Дьокуускай), Айсен Местников (Дьокуускай), Арсений Чумаевскай (Дьокуускай).

Гаврил МАКСИМОВ.

Добавить комментарий

Ваш адрес email не будет опубликован.