Бороҕон оонньууларга бэлэмнэнэр

Билэргит курдук, эһиил, 2022 сылга Уус Алдан улууһун киинигэр Бороҕоҥҥо Саха сирин норуоттарын VIII спортивнай оонньуулара ыытыллыахтара. Онуоха билигин бастатан туран, сүрүн сорук – оонньууларга анаан тутуллар объектары ыйыллыбыт болдьохторугар үлэҕэ киллэрии буолар.

Оонньуулары бэлэмнээн уонна тэрийэн ыытыыны көрсө сүрүннээн спорка сыһыаннаах үс тутуу бигэргэтиллибитэ. Ол – 1000 киһи олорор миэстэлээх стадион, чэпчэки атлетикаҕа манежтаах элбэх кыамталаах чэбдигирдэр-спортивнай комплекс уонна Мындаабаҕа анал уопсайдаах спортивнай комплекс. Икки кэнники суруллубут тутуулар – национальнай бырайыак чэрчитинэн тутуллаллар.

Тэрийээччилэр этэллэринэн, стадион тутуллуутун былаана график быһыытынан тутуһуллан иһэр. Бороҕонноооҕу элбэх кыамталаах спортивнай комплексы тутууга кадр боппуруоһугар кыһалҕалар үөскээбиттэриттэн графиктан кыра хаалыы тахсыбытын, туһааннаах салалта болҕомтоҕо ылан, кылгас болдьоххо быһаарарга дьаһал ылла. Оттон Мындаабатааҕы спортивнай комплекска сотору дьиэ иһинээҕи үлэлэр саҕаланыахтара.

Ону тэҥэ оонньуулар кыттыылаахтарын түһэрии, аһатыы итиэннэ культурнай программаҕа сыһыаннаах тутууларга өрөмүөн үлэлэрэ ыытыллаллар.

Оонньуу программата бигэргэтилиннэ

Эһиил Уус Алдан улууһугар от ыйын 4-10 күннэригэр – Саха сирин норуоттарын VIII спортивнай оонньууларыгар спорду таптааччылар элбэх саҥа киллэриилэри көрүөхтэрэ. Ол курдук, оонньуу программатыгар баскетбол оннугар стритбол, чэпчэки атлетика көрүҥэр спортивнай хаамыы, итини тэҥэ ГТО комплексыгар күрэхтэһии киллэрилиннилэр.

Саха сирин норуоттарын VIII спортивнай оонньууларын балаһыанньатын – Саха Республикатын правительствотын вице-премьера, оонньуулары бэлэмнээн уонна тэрийэн ыытар республикатааҕы комиссия салайааччыта Сергей Местников уонна СР физическэй культураҕа, спорка министрэ Иннокентий Григорьев бигэргэтэн тураллар. Онно, Манчаары оонньууларын ыытыы опытынан бары санитарнай-эпидемиологическай ирдэбиллэр тутуһуллуохтара. Өскөтүн Манчаары оонньууларыгар сүүмэрдиир тэрээһиннэр ыытыллыбакка, тута финал буолбут эбит буоллаҕына, эпидемиологическай балаһыанньа тубустаҕына, Спортивнай оонньууларга бастыҥнары талыыны үс түһүмэҕинэн ыытарга былаанныыллар. Ол аата, син биир урукку сылларга курдук, бастаан улуустааҕы, онтон республикатааҕы сүүмэрдиир күрэхтэһиилэри тэрийэн баран, Бороҕоҥҥо чулуулары түмүү.

Санатан эттэххэ, оонньуу – Саха сирин 100 сыллаах үбүлүөйдээх сылыгар биир сүрүн тэрээһининэн буолуоҕа. Ону үрдүк таһымнаахтык тэрийэн ыытыы соруга турар.

Бөлөхтөр хайдах араарылыннылар?

Хамаандалар түөрт бөлөххө араарылыннылар. Ол курдук, бастакы бөлөххө Дьокуускай, Хаҥалас, Бүлүү, Ньурба, Нерюнгри, Мэҥэ Хаҥалас, Мирнэй, Алдан, Ленскэй уонна ХИФУ хамаандалара киирдилэр.

Иккис бөлөххө: Чурапчы, Амма, Нам, Уус Алдан-1, Уус Алдан-2, Сунтаар, Таатта, Үөһээ Бүлүү, Өлүөхумэ, АГАТУ, студеннар спортивнай союзтарын уонна оонньуулары бэлэмнээн, тэрийэн ыытарын быһыытынан уус алданнар икки хамаанданы туруораллара быһаарылынна.

Үһүс бөлөх: Кэбээйи, Томпо, Горнай, Өймөкөөн, Уус Маайа, Үөһээ Дьааҥы, Орто Халыма уонна Жатай.

Итиэннэ төрдүс бөлөххө хотугу уонна арктическай улуустар киирдилэр: Аллайыаха, Булуҥ, Анаабыр, Үөһээ Халыма, Усуйаана, Өлөөн, Муома, Эдьигээн, Аллараа Халыма, Эбээн Бытантай, Абый. Маннык араарыы улуустар олохтоохторун ахсаанынан уонна үөрэх кыһаларын састааптарынан аттаран оҥоһулунна.

Ханнык көрүҥнэр киирдилэр?

Бороҕоннооҕу спортивнай оонньууларга оҕолор уонна бэтэрээннэр киллэриллибэттэр, манна 18-тан үөһээ саастаах спортсменнар күөн көрсүөхтэрэ. Оонньуу балаһыанньатыгар олоҕуран, күрэхтэһии спорт 16 көрүҥэр ыытыллыаҕа: аэробика, 3х3 баскетбол, волейбол, мини-футбол, чэпчэки атлетика, остуол тенниһэ, көҥүл тустуу (дьахталлар тустуулара), дуобат, саахымат, оҕунан ытыы, буулдьанан ытыы, спортинг, бокс, гиирэ спорда, ГТО многоборьета, адаптивнай спорка – чэпчэки атлетика.

Үөһэ ыйбыппыт курдук, 3х3 баскетбол, ГТО комплексын многоборьета (хамаанда иккилии дьахтартан уонна эр дьонтон туруохтаах, түмүгэ уопсай хамаанданан түмүккэ ааҕыллар), чэпчэки атлетика программатыгар спортивнай хаамыы уонна спортивнай тустуу чэрчитинэн үс ыйааһыҥҥа дьахталлар тустуулара – саҥа сүүрээннэринэн буолуохтара. Адаптивнай спортан олорон эрэн волейбол суох буолуоҕа, ол оннугар дьүлэй, харахтарынан мөлтөх уонна куһаҕаннык хамсанар (ПОДА) спортсменнар чэпчэки атлетикаҕа күрэхтэһиэхтэрэ.

Чугастааҕы кэмҥэ Спортивнай оонньуу кылаабынай судьуйатынан ким буолара уонна оонньуу ымыыта быһаарыллыаҕа.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *