Бороҕон-2022: Республика үбүлүөйүгэр ананан ыытыллыаҕа

Эһиилги, 2022 сыл биһиги республикабытыгар ураты сыл – Саха автономията тэриллибитэ 100 сыллаах үбүлүөйдээх сыла. Дьэ, итинник кэрэ бэлиэ түгэннээх сыл биир улахан таһымнаах тэрээһининэн Уус Алдан улууһун киинигэр – Бороҕоҥҥо, Саха сирин норуоттарын VIII спортивнай оонньуулара буолуохтара.

Маныаха анаан Саха сирин норуоттарын VIII спортивнай оонньууларын бэлэмнээн уонна тэрийэн ыытыыга улуустааҕы дирекция тэриллибитэ. Дирекцияны, бу иннинэ Найахы нэһилиэгэр баһылыгынан үлэлээбит Петр Степанович Сивцев салайар. Киниттэн биһиги, дирекция үлэтин кылгастык билиһиннэрэригэр көрдөстүбүт:

-Билигин оонньууларга анаан улуус дьаһалтатынан бигэргэммит 13 анал хамыыһыйанан үлэлэр бара тураллар. Хамыыһыйалар бары анал былаан быһыытынан үлэлииллэр. Оонньууларга кэлбит дьону аһатыы, хонноруу, кинилэри Бороҕон иһигэр транспорынан хааччыйыы, ону таһынан сувенирнай бородууксуйа, атыы-эргиэн боппуруостара билигин күүскэ тураннар, бэлэмнэнэр үлэлэр саҕаланнылар.

Оонньууларга анаан Бороҕоҥҥо уонна Мындаабаҕа бара турар үс сүрүн тутууну таһынан, билигин благоустройствоҕа, ол аата, нэһилиэк көстүүтүн тупсарыыга, көҕөрдүүнү ыытыыга, ыраастааһыҥҥа, сквердэри тупсарыыга, өрөмүөҥҥэ үлэлэр барыахтара. Олорго билигин үбүлээһинин боппуруоһун быһаарса сылдьабыт.

ЖКХ хайысхатынан эмиэ туспа үлэлэр бара тураллар. Республиканскай суолталаах трасса кытыытыгар олорор нэһилиэктэр благоустройство былаанын ылыммыттара, онно ыалдьыттары көрсүүттэн саҕалаан киэргэтии үлэлэрэ барыахтаахтар. Онон Уус Алдан сиригэр-уотугар киирдибит да, оонньуу буоларын билиһиннэрэр көстүүлэр баар буолуохтара.

Ити курдук, культурнай-маассабай үлэлэр эмиэ былааннаналлар. Онно оонньууну үөрүүлээхтик аһыыны-сабыыны тэҥэ, Саха Республиката тэриллибитэ 100 сылыгар аналлаах тэрээһиннэр бааллар. Кылаабынай режиссерынан Сергей Васильевич Расторгуев буолуоҕа. Оонньууларга анаан улуус фондата үлэлиир. Онно олохтоохтор күүс-көмө буолан үлэлэспиттэрэ иккис сыллара түмүктэнэн эрэр.

Петр Павлов.    

Добавить комментарий

Ваш адрес email не будет опубликован. Обязательные поля помечены *