Бороҕон-2022: Ааспыт оонньуулары ыыппыт аммалар ыалдьыттаатылар

Бүгүн, сэтинньи 24 күнүгэр биһиги улууспутугар Саха сирин норуоттарын VII спортивнай оонньууларын тэрийэн ыыппыт Амма улууһун дэлэгээссийэтэ ыалдьыттаата. Бөлөҕү улуус баһылыга Николай Архипов салайан сырытта.

Биллэрин курдук, эһиил Уйгу сирэ – Уус Алдаҥҥа  Саха сирин норуоттарын VIII спортивнай оонньуулара ыытыллыахтара. Онон ааспыт оонньуулары ыыппыт, тэрийбит аммалар сүбэ-соргу буола кэлбиттэр. Эбиэт иннинэ спортивнай тэрээһин ыытыллыахтаах, билигин тутулла турар эбийиэктэри көрдүлэр уонна биирдии хайысхаларынан туох ыарахаттар, ситэриллибэтэхтэр көрсүллүбүттэрин билиһиннэрдилэр, ону туоратарга сүбэлэри биэрдилэр.

Эбиэттэн киэһээ дэлэгээссийэ кэлэр оонньуулары тэрийиини сүрүннээччилэри уонна улуус кииниттэн чугас олорор I Хоро, Хоро, Бэрт Ууһун уонна II Лөгөй нэһилиэктэрин баһылыктарын кытары көрүстүлэр. Кэпсэтиини саҕалыырыгар Амма баһылыга Николай Архипов бастатан туран, тупсаҕай көстүүгэ сүрүн болҕомтону уурарга эттэ. Араас дьэрэкээн сибэкки баара улаханнык тупсарар эбит диэтэ. Манна эрдэттэн анаан дьарыктанар тэрилтэ баар буоларыгар болҕомтону уурарга сүбэлээтэ. Оччоҕо биир тэҥ үүнүүлээх, кэрэ көстүүлээх буолуохтааҕын бэлиэтээтэ.

Кыттааччылар, тэрийээччилэр сырыылара харгыһа суох буоларыгар анал диспетчерскэй сулууспа үлэлээбитин эттэ. Итини тэҥэ оонньуулар иннилэринэ хас бээтинсэ ахсын улахан субуотунньуктарга, оонньуулар кэмнэригэр волонтердааһыҥҥа нэһилиэнньэ көхтөөхтүк кыттыбытын бэлиэтээ. Уопсайа 1540-ча волонтер кыттыбыт. “Оонньуулар саҕаланаллара 100 хонук хаалла” анал аахсыйа ыытыллыбыта нэһилиэнньэни улаханнык сэргэхсиппит, көҕүлээбит. Сырдатыыга болҕомто уураннар, улуус көрдөрөр-иһитиннэрэр эйгэлэрин барыларын ыҥыраннар, тэрээһин хаамыытын билиһиннэрэр медиа-тур тэрийбиттэр. Бу оонньууларга бэлэмнэнии хайдах баран иһэрин билиһиннэригэ өрөспүүбүлүкэҕэ улахан сэҥээриини ылбыт. Николай Архипович көрдөрөр-иһитиннэрэр эйгэ дьоно ордук ирдэбиллээх уонна сонуну кэмигэр тиэрдиигэ саамай тутаах дьон буолалларынан кинилэргэ болҕомтону уурарга сүбэлээтэ.

Мунньахха сылдьыбыттар араас ыйытыыларыгар улахан спортивнай тэрээһини ыытыыга улахан уопуту мунньуммут дьон быһыытынан аммалар бэрт сиһилии хоруйдары биэрдилэр. Түмүккэ улахан тэрээһин хайдаҕар ыалдьыттар санааларыттан өйдөбүл уурулларыттан, хас биирдии бытархайыгар тиийэ болҕомто ууруллуохтааҕар сүбэлээтилэр уонна кэлэр оонньуулар да үрдүк тэрээһиннээхтик ыытыллыахтара уонна ыалдьыттарга үтүө эрэ өйдөбүл иҥиэ диэн эрэнэллэрин биллэрдилэр.

Афанасий КОПЫРИН.

Уус Алдан.

Добавить комментарий

Ваш адрес email не будет опубликован. Обязательные поля помечены *