Биһиги оскуолабыт выпускниктарыгар бэртээхэй сыл ааһан эрэр

Ааһан эрэр 2021 сыл миэхэ спорка икки саарык өйдөбүлү хаалларан эрэр. Ол, биллэн турар, ыарахан ыарыы содула… Олимпиада көрөөччүтэ суох буолан, уота-күүһэ ситэ умайбата курдук көрөбүн. Аны Олимпиада үгүс күрэхтэһиилэрин киһи сүгүн-саҕын булан көрбөт курдуга.

Биир бэйэм тустуу үгүһүн атын дойду көрдөрүүлэриттэн көрдүм, английскайдыы комментарийдаах эҥин. Оннооҕор Садулаев тустар күнүгэр Россия биир телеканала тустуу көрдөбөтөҕө. Манчаары оонньууларыгар сатаан сылдьыбакка, улахан хом санаалаахпын. Ютуб-блогердар үксүгэр күрэхтэһиилэри син бэрткэ сырдатар буолан эрэллэр. Улахан Махтал!

Мин ыалдьар футбольнай командам “Зенит” дойду чемпиона буолла! Үлэлиир 5 №-дээх оҕо спортивнай оскуолатын выпускниктарыгар бэртээхэй спортивнай сыл ааһан эрэр. Айаал Лазарев иккиһин Олимпиадаҕа кытынна, Сардаана Трофимова марафоҥҥа Россия чемпионатын кыайда, Изабелла Борисова 100 км сүүрүүгэ Россия чемпионатын кыайда, Аан дойдутааҕы кылаастаах спорт маастара буолла, Наталья Леонтьева марафон аҥарыгар сүүрүүгэ Россия чемпионатыгар үһүс буолбута, Рамир Николаев спортингтан стендевэй ытыыга көһөр санааланан, Краснодарга үөрэххэ киирдэ, онно Краснодар кыраайын трап ытыыга иккис призера буолла. Кинилэртэн Сардаана Трофимова, Изабелла Борисова саха спордугар балачча чорбойор ситиһиилээхтэр дии саныыбын. Манна өссө Матрена Ноговицына дьахталларга сүүс харахтаах дуобакка Аан дойду чемпионката буолбута тэҥнээх. Арыйаан Тютрин син киһини үөрдэр тустуу көрдөрөн эрэр. Дьоммутун аһара күүскэ «айдааран-куйдааран» хайҕаабакка, ээр сэмээр «санныга таптайыах», «сүүстэриттэн сыллыах»… Иннилэригэр өссө да элбэх күрэхтэһиилэр күүтэллэр.

Кэлэр дьылга абааһы ыарыыта суолбутуттан туора хаамыа диэн эрэниэххэ, чөл олохпут кэмигэр киириэ, чулуу спортсменнарбыт ситиһиилэриттэн үөрүөхпүт-долгуйуохпут! Оскуолам оҕолоро улахан убайдарын-эдьиийдэрин суолларынан эрэллээхтик үктэнэллэрэ буоллар!

Андрей ФИЛИППОВ.

Дьокуускай.

Добавить комментарий

Ваш адрес email не будет опубликован.