Белград-2021: Ахтем Закиров финал аҥаарыгар таҕыста

Сербия киин куоратыгар Белградка, любительскай боксаҕа аан дойду 21-с чемпионата үгэннээн ыытылла турар. Эрдэ иһитиннэрбиппит курдук, чемпионат биир уратытынан, 13 ыйааһыҥҥа ыытыллар. Саха сирин спорду сэҥээрээччилэрин болҕомтолорун, биһиги билиҥҥи кэмҥэ бастыҥ боксербут, спорт үтүөлээх маастара Василий Егоров кыттар ыйааһыныгар киирсэр Ахтем Закиров тардар.

Санатан эттэххэ, быйыл күһүн Кемероваҕа буолбут Россия чемпионатыгар 51 кг бүтэһик быһаарыылаах көрсүһүүтүгэр Василий Егоров тэҥ киирсиигэ хотторуулааҕынан ааҕыллыбыта. Онон аан дойду чемпионатыгар барар быраабы Закиров ылбыта.

Белградка аан дойду чемпионатыгар 51 киилэҕэ барыта 32 кыттааччы баара. Кинилэртэн, Европа оонньууларын кыайыылааҕа (2019), Олимпиада-2016 кыттыылааҕа Артур Оганесян (Армения), Олимпиада-2016 чемпиона Хасанбой Дусматов (Узбекистан), аан дойду-2019, Олимпиада-2020 боруонса призера Сакен Бибосинов (Казахстан), аан дойду-2017 үһүс, Олимпиада-2016 иккис призердара Юберхен Мартинес (Колумбия) курдук ааттаах-суоллаах, опыттаах боксердар бааллара.

Ол эрээри, Оганесян – американец Хиллга 1:4, Дусматов – Бибосиновка 0:5, Мартинес – Бибосиновка 0:3 ахсааннарынан хотторон туораатылар. Манан сиэттэрэн эттэххэ, бу ыйааһыҥҥа казах Сакен Бибосинов үчүгэй таһымыгар сылдьар эбит.

Оттон Ахтем Закировы эттэххэ, кини бу чемпионакка бастаан испанец Сальвадору 4:1, финал 8/1-гэр венгр Бернаты 5:0, финал 4/1-гэр эквадорец Дельгадоны 3:2 ахсааннарынан кыайда. Аны, финал аҥаарыгар американец Хиллыын көрсүөҕэ.

Бөөлүүн, чемпионат чиэппэригэр киирсиилэр буоллулар. Онуоха 51 кг түмүк маннык буолла (кыайыылаахтар инники суруллаллар):

Роско Хилл (АХШ) – Федерико Серра (Италия)

Ахтем Закиров (Россия) – Луис Дельгадо (Эквадор)

Сакен Бибосинов (Казахстан) – Юберхен Мартинес (Колумбия)

Саенгпхет Танарат (Таиланд) – Масуд Юсифзаде (Азербайджан).

Онон сэтинньи 4 күнүгэр финалга тахсар иһин киирсиилэргэ көрсүөхтэрэ: Роско Хилл (АХШ) – Ахтем Закиров (Россия), Сакен Бибосинов (Казахстан) – Саенгпхет Танарат (Таиланд). Онтон финаллар сэтинньи 6 күнүгэр буолуохтара. Чемпионаттан быһа биэриини телевизорга МатчБоец каналга көрүөххэ сөп.

Ырытан көрдөххө, финал аҥаарыгар Россияттан, Казахстантан, Кубаттан – 5-тии, Таилантан, АХШ-тан – 4-түү, Францияттан, Азербайджантан – 3-түү боксёрдар таҕыстылар.

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *